UISA LEH MIZOTE
Kan pi leh pute hunlai aṭanga kan vulh ṭhin ui chungchangah hian ngaihdan a in rual lo hle mai.
Kum 2/3 liam taah khan Punjab Assembly House-ah MLA pakhat Ajit Singh Mofar chuan an khaw laia ui tla mai mai tual ui tam tak chu hmarchhak lamah uisa an ei ṭhin tih hriain ui te chu hmarchhaka thawn vek mai a duh thu a sawi a, titi pawh a ti tam hle a nih kha. Aizawlah ngei pawh ui hmangaihtu pawl leh uisa sera eizawngte ngaihdan leh duh dan a inpersan viau mai.
Chutihlaiin - China, Indonesia, Taiwan, Philippines, Laos, Vietnam leh Mexico-ah te pawh ui sa hi an lo ei nasa ve tho mai. Hnam upa China ho hian Confucius hunlai daih tawh khan an lo ei tawh a, an hmanlai chanchin ziahna (Zhou Dynasty hunlai) ah pawh ransa ei tura vulh an ziah zingah - vawk, kel leh ui an lo ti daih tawh.
Mexico ram cheng hmasa Aztecs ho pawh khan uisa an ei ṭhin. Asia ram rau rau zingah Vietnam ho khian an uar zual emaw tih tur a ni. An khawpui Hanoi a thingpui dawrah te phei chuan uisa an siam nasa a, sa dang ai pawhin a to zawk ṭhin.
Indonesia-ah chuan Batak Toba culure nena inzawmna nei zingah uisa ei an tam a, an hun pawimawh bikah te an ei uar zual. Korean ho hian uisa soup (Bosintang) an nei a, a hrana siam (breed) aṭangin an soup hi an siam ṭhin a ni awm e.
Seoul 1988 leh Beijing Olympic tun hnaia neihah thingpui dawr Menu uisa an telh loh chungchang te leh uisa hrim hrim chanchin hi Internet lamah tam tak en tur a awm.
Taiwan leh Phi-lippines-ah te hian tun hnuah ui talh hi an khap na a, thingpui dawr ṭhenkhatah hmuh tur a la awm tho. Tin South Korea leh China-ah pawh khawvel hmun hrang hrang aṭanga Olympic mikhual an haw hnu chuan thingpui dawr menu dan chu a khauh chhun zawm vak lo a ni awm e.
Mizoten ui thisen lum sa dang aia mihring taksa tana
ṭha turin an ngai deuh a; natna chauh ni lovin sex-ah pawh pui thei tur anga ngaihna pawh a awm e.
Mizo culture-ah hian uisa hi a bet tlat a, hma khawsang aṭangin kan lo ei ṭhin tih pawh kan inthawina sa zinga a tel ve avang hian a chiang hle awm e. Kan pi leh pute kha ei leh bar an hniang hnar em em lo tih kan hria a, chu chuan inthawina sa kha inthawi nan chauh ni lovin an ei nghal ṭhin a.
Khawthlang ram (European/ Western) ho in an chin ve loh vang emaw hmanlai
aṭanga an pi leh puten an chin dan chu ram dang mi thlatu hran daihten an lo tih ve ngaih loh vang maia khapburna dan lek mai ai chuan hmanlai
aṭanga an lo tih ṭhin an culture-a bet tlat chu a ei duh apiang tana ban phak mai turin an la siam reng hlawm.
Taiwan leh Phili-ppines te anga dan siam a, chu dan hmang thlapa kan la khap ve si loh chuan Aizawla Uisa dawr te leh restaurent ṭhenkhata uisa plate menu a telh te hi chuti mai chuan a tawp dawn lo.
- Hruaia Kawlni