Khawchhak tlang dunga ASI hmalakna

Archaeological Survey of India (ASI) North East Circle (Gauhati) mi 9-te chuan Lungphunliana lungphunte zir chiang tur leh Vangchhe daia kawtchhuah ropui Plan & Estimate duang turin Dt. 7. 5. 2015 (Thursday) khan Aizawl an lo thleng a. Champhai an thlen hnuah ASI-hote chu team hnihah insiamin Asst. Archaeologist Shyan Singh-a hote chu Lungphunliana lungphun lian pui pui pariat lai ding ngir khup endik turin an kal a.

Heng Lungphunte hi an lian em em vek a, engtin nge mihringin an zawn zawh ang? tih chu ngaihtuah tham tak a ni. A lian ber phei hi chu lei aṭanga a lawr san zawng hi feet 14.10 a ni. Lei chhunga inphum chin pawh ft. 5 laia thuk a ni a, a hlai zawng pawh a lian laia tehin ft. 12 a ni. A chhah zawng chu ft. 2 a ni. Heng lungah hian thil in ziak a tam vak lo a. Lung ṭhenkhatah chuan ngun lem, thi lem, sangha nge ni anga tuithawl lem tlem tlem a inziak a, Darbu emaw Darmang lem emaw ni awm tak a awm nual bawk. Mr. Shyan Singh-an INTACH convener Pu P. Rohmingthanga hnena a report dan chuan National Importance Monument-a recommend tlak tak niin a ngai a, an phur hle.

A team hnihna Vangchhe daia kawtchhuah ropui Plan & Estimate siam tura kalte chu, Milan Kumar Chauley Superintending Archaeologist hovin, Basudeb Kumar Asst. Archeaologist Engeneer leh D.K. Majumdar Con­servation Assistant hote an ni a. Heng khual ṭhate hi North East Circle Region-a thawktu lian ber berte an ni. Dt. 11.5.2015 (Thawhṭan zan) 6:00 pm ah INTACH Mizoram Chapter te nen Aizawl Club-ah an inkawm bawk a ni. Vangchhe daia kawtchhuah ropui hi cheng vaibelchhe sawmhnih vela cheiṭhat tum a ni ang. Plan mumal tak eng eng emaw tih a la ni ang. Anmahni thu maia tawp vek theih loh chin pawh a awm a, Ministry of Culture (Archeaological Survey of India) Delhi lama tih tur te, State sawrkar lama tih ve turte pawh a awm niin sawi a ni.

Tuna ASI lokalte hi a ṭhen chu an vawikhat lo kalna a ni a. A tam zawk hi chu vawi hnih vawi thum an lo kalna a ni tawh. Mizorama pipute sulhnu survey hian Regional Circle ASI hote hian theih tawp an chhuah tawh ṭhin. Lianpui daia lungphun te, Dungtlang leh Farkawn rama pipute sulhnu hi chu National Importance atan recommend tura ngenna kal mek a ni tawh. Tun ṭumah hian Lungphunlian hi an belh leh ngei a beisei awm.

Protected Monuments of National Importance-ah puan ni ta se Mizoram tan enge a ṭhatna tur ni ang?

India ram lailia Protected Monuments of National Importance an neih ṭhen­khat, Agra Taj Mahal, Agra Red Fort, Jahangir’s Mahal leh Delhi khawpui lama Kutub Minar, Mughal Garden leh Delhi Red Fort te anga ṭha nei ve lo mah ila, kan neih chhun hi kan hlut a, kan duat thiam a ṭul a ni. India ram state ṭhenkhat chuan built heritage leh natural heritage ennawm leh mak tak tak an nei a. Nitin hian Tourist za rual leh sang rualin an tlawh ṭhin a, a tlawhtute fee pek chu state income lian tak a tling thei a ni. Lungphunlian, Lianpui, Dungtlang leh Farkawn te hi Notional Importance-ah puan tel a nih chuan Tourist, College leh University zirlai, nula tlangvalleh mi tam takin an tlawh duh ang a, hawi khawthawnna ṭha tak a ni ang. Mizoram state chhunga mi chauh pawh ni loin, India ram state dangte hiptu a ni thei ang a, India ram pawna foreigners-te pawhin an rawn tlawh ve ṭhin ang. A ṭhatna leh a ṭangkaina sawi kim vek sen a ni lo a, India rama Taj Mahal te Aigupta rama Pyramid te Palestina rama Jerusalem tourist-hoin an tlawh lun ang mai hian lun chiah lo mah se tourist hiptu ṭha tak chu a ni ngei ang.

Pipute sulhnu hi tute sulhnu nge ni ang?

A bik takin Vangchhia leh Lianpui khuaa pipute lungphun hi han sawi ila. Vangchhe daia lungphunah hian lung pakhatah mihring lian deuh ding chungin kut dinglama feipui (Sechhun fei) kengin, a kut veilamin hranthawl keng ni awm tak lem kan hmu a. Tukkhum lamah samzialin, a samzialah chhawn a tawn bawk a, a aiate zawk deuhin mihring invuan chunga lam lai ni awm tak engemaw zat a tlar a, mihring lu a tlara tar ni awm tak a awm bawk. Sial leh kel lu a tlara tar ni awm tak a awm bawk a; Ramsa - sakhi, sazuk, sanghal, sazaw, zawng leh ngau chi hrang hrang lem a tam hle. Ngun taka han en hian lung ṭhenkhat hi chu pasalṭha ram lam leh in lama thangchhuah, ral that ni awm tak niin a lang.

Lianpui daia lungphun hi sawmriat panga lai a ni, a lem ziak hi a khuara ker a ni thung, tuibur emaw vaibel lem ziak ni awm tak ziak hmuh a ni. Mihring invuana inkaihkuah a lam lai lem a inziak a, an tukkhum lamah sam an zial deuh vek bawk. Lungphunte hian lungdawh zawl a nei deuh vek.

Heng lemziakte hi sawi sen a ni lo a, sawi fiah zawh chi pawh a ni lo, a hmuna en pawhin kan fiah zo tak tak lova a mak tawlh tawlh a ni mai. A lungte lah hi an ding ngawi reng ringawt a, chanchin min hrilh duh der bawk si lo, ṭawng thei se zawng sawi an chak teh ang chu!

Heng lungphunte hi kan Mizo pipute sulhnu ngei a ni ang tih a rin theih. A chhan chu, tukkhum lama sam zialin, chhawn an tawn a, sechhun fei kengin, kut lehlama hranthawl keng, ṭhenkhatah chuan hmalama muvanlai thla tawn ni awm takte an ni. Tin, selu tlar tuara inziakahte hian Mizo pipute kut chhuak a ni ngeiin a rin theih.

Thil inang tak sawi hmaih hauh loh tur a awm. Phaiphum khua (Farzawl) daia Hualngo Lal Lalvunga lung leh Seipui khuaa Hualngo Lal Zathanga (Pasalṭha) lung leh Hualngo thlahtu Tlahtea hriatrengna lungte hi a lem chu a pawnga ker a ni. An tukkhum lamah sam zialin chhawn an tawn ngauh mai bawk. Khawchhak rama i kal chuan lungphun hlui hmuh tur a tam mai. Seipui khaw daiah pawh khian lungphun hlui tam tak kan pi leh pute sulhnu ngei an tih reng ṭhin chu a awm nual bawk.

Mi ṭhenkhatin heng lungte hi mi Rawng, Meitei leh Tripura lam mite sulhnu a ni ang an ti ṭhin. Henghote hian lung an phunin an ziak ngai emaw ni, an tukkhum lamah sam zialin chhawn an tawn ngai em ni? Kan Mizo pipute culture nena inhmeh thlap leh an awmdan pawh inmil thlap si, a titu hming tak kan hriat loh avanga hnam dangte tihah puh tluk ṭalh kan tum ṭhin hi, kan INTACH chairman Pu P. Rohming­thanga chuan dik thei dawnin a hre lo a ni.

Chuvangin, Vangchhia leh Lianpui daia lungphunte Dungtlang rama hmun hlui tam takte leh hmun hrang hranga pipute sulhnu hi keini INTACH MIZORAM CHAPTER chuan 'Mizo' pipute sulhnuah kan ngai tlangpui a ni.