Sorkarin fahrahte health insurance siamsak rawh se

Sorkar hi mirethei te sorkar tiin thunei­tute'n an sawi ṭhin a, hei vang hi a ni mahna sorkar laipui chuan mi rethei zawkte tan social se­curity schemes hrang hrang a siam a, hemi kawngah hian kan state sorkar hi a ṭuan a muang ṭhin hle.

Sorkar hnathawkte leh anmahni hamṭhatna atan chuan an che rang ṭhin hle a, central pay commission rawtna tipuitling thei hmasa ber a ni ṭhin thung.

Sorkar laipui schemes leh prog­ramme a implement bak kan state sorkar hian ama pualin Mizo mipute huapzo, social security scheme a neih sawi tur a vang hle bawk. Sorkar hnathawkte tan health care scheme a siamsak a, mipuite thik phak a ni lo.

Vanneihthlak tak­in Mizoram mipuite sorkar hnathawk lo, a tam zawkte chhawr ve theih turin sorkar laipui chuan Rashtriya Swasthya Bima Yojana (RSBY) a duang chhuak hlauh a, hei hi sorkar hnathawk lo chhungkua te'n nasa takin an chhawr ṭangkai mek a ni.

Hetihlai hian Mi­zoram mipui zinga health insurance mamawh berte zinga mi, Orphanage Home-a naupang fahrahte hi health insurance nei lo tam tak an la awm!

Orphanage Home hrang hranga nau­pang fahrahte hi mi tlawmngai pawl leh mi thil phalte thilpek aṭanga enkawl an nih hlawm avangin natna khirh tak tak veite damdawia inenkawlna senso hi home enkawltute ngaihtuah atan a harsa a, naupang khawngaihthlak tak te tan hian kan sorkar a bengvara, a chetchhuah a hun ta hle.

RSBY leh health care scheme dangte pawh ni se chhungkaw ration card leh bank account neih dan azira in­ziahluh ngaite an ni tlangpui a, orphanage home-a naupangte hi ration card-a tel lote an ni a, hei vang hian kan State Council for Child Welfare te pawh he lamah hian an bengvar a hun ta hle.

Health insurance neih loh hi mi hausa tan lo chuan phurrit lian tak a ni mek zel a, hei vang hian nu leh pa neilo, fahrahte tan a harsa zual a, kan sorkar hian orphange home-a fahrahte tan hian a hranin health insurance scheme siam thei se ava lawmawm dawn em! A siam thei lo a nih pawhin RSBY-in cover vek rawh se.