Congress sorkar hian thahnemngai takin zu hi zuar rawh se

Kum 2015 March 15 aṭanga zu zawrh ṭan tura MLPC Act dan sorkarin a pass ni leh a dawn vel kha ka ngaihtuah let a. Tlawmngai pawl hrang hrangten an duh loh mai chu thu hran, Kohhran lian ber Presbyterian-in nasa takin a dodal a, poster tar te, ṭawngṭai rualte nen lamin a theih dan danin ṭhulh tir tumin a dodal a nih kha. Chuti chungin sorkar lahin tlangpui ngei a tum a, "Kohhran kan rawn dawn lo," an ti bur mai a nih kha.

Kha dan a tlang theih lohna tura Presbyterian Kohhran ṭawngṭai rualna neih a nih ṭum khan mahni lawina Kohhran ṭheuhah ṭhahnem kan ngai em em a, Home Minister zahawm tak Pu Zira pawh a lawina Kohhranah ṭawngṭai rei ber niin he dan hi Pathianin a duh lo a nih chuan amah emaw a chhungte emaw hmanga he dan House-a pulut thei lo tura Pathian inrawlh tura a kar thute hial House-ah kan CM zahawm takin a sawi a nih kha. Home Minister dil anga an chhungkuaah harsatna a thlen loh avangin Excise Minister a nih angin a pulut ta a, chutiang chuan hei an zuar ta a, a lei tur an intlar del dul mai zawng a nih hi.

Chuti taka Kohhran leh NGO-te pawhin an duh loh bawk dan chu Congress sorkar chuan huaisen takin a kaltlang luih pui a, Kohhran leh NGO angin do mah se a tak takah chuan hengho hi engmah an lo ni lo tih hi Pu Hawla leh a hote hian an va hre chiang tehlul em!? Ṭawngkam dengkhawng tak tak a ṭawngkhum reng chungin VC/ LC inthlan result-ah a lo lang ta a, Kohhran hian a langin do mah se a kaihhruai mipui a heh lohzia hi VC/ LC inthlanah a lo lang ta a nih hi!

Presbyterian hmunpui, Pastor rual leh an chhungkuate awm khawmna veng, Synod hmunpui Mission Vengah MNF a tla tawp mai a, damdawi-in a dahna Durtlangah nen lam a tla a nih hi! Harhna thlenna hmunpui, miten an pankhawm ruih ruih - Kelkangah pawh zu zawrh duh lo MNF chu an nil chiang hle bawk. Roman Catholic hmunpui bera kan neih, an biakin hmasa awmna leh an school lar tak dahna lai Kulikawn Vengah leh Catholic hotupa ber (Bishop) awmna Ramthar Vengah MNF a tla chiang hle bawk. Tin, Seventh Day Adventist-ho hmunpui leh tamna Vaivakawn leh Zotlang Vengah MNF a tla bawk. Salvation Army hmunpui ber, an Temple lian leh lar ber awmna Tuikual 'S' ah MNF paihthlak a ni leh bawk. Chu mai pawh a la ni lo, Mizoram Baptist Kohhran hmunpui ber Lunglei Serkawnah pawh MNF an la paih cheu bawk. UPC (NEI & Mizoram) hmunpui Tuikhuahtlangah chuan MNF a chak ve ṭawk chauh a. Hei hian a entir chu, kan Kohhran Pastor-ho te, Upaho leh Kohhran khaipa (kan puithiamho) hian zu haw viau leh zawrh duh lo viau inti mah se an thinlungah Kohhran aiin an party ṭan zawng a tla na zawk a, Pathian duhzawng leh a kohhran thlavang hauh zawnga vote thlak ai chuan an mimal duh zawng kha an dah lal zawk tih a lang reng.

Ka awmna Aizawl 'S' III Constituency pawh hi ka ngaihtuah kai a, Presbyterian Pastor ṭhutna, Lungleng - I; Muallungthu; Aizawk; Sum­suihah chuan MNF a tla vek a. Hlimen, Sateek leh Sialsukah erawh MNF an chak ve thung. Kan Kohhran hruaitu tam berte hian zu zawrh an duh loh thu hi an vote-ah an tarlang chuang lo. Pathian ṭihna pawh an nei tak tak lo a ang. Amaherawhchu, kan Kohhran berampu zingah hian Baal pathian hlau hauh lo chu tam tak an awm. Hmuh theih, a kohhran hmunpuiah chuan nuihzatthlak khawpin a lang fiah a ni.

VC/ LC candidate te hi an veng chhung leh khuaa a ṭha ber ṭheuh, mipui duh zawng tur ṭheuh chu party-te hian an vawrh chhuak vek ang. Tu pawh vote tlak vek an ni ang. An mimal chu ka sawi lo, Congress, MNF leh a dangte hian mi ṭha tak tak an nei vek a, mahse hei hi a result chu a ni si! Chuvangin, Kohhrante hian ataka an duh reng hi a lang mawi zawng hian bei bei tawh lo se, an beramte hi kan him zawk lo'ng maw? Central YMA President vengah chuan Congress a tlak tlat hi a!?

Chutih laiin Kohhran harhna thlenna lar tak bawk, North Vanlaiphaiah chuan candidate-te campaign loin ṭhalai rual khawlaiah an aurual a, "North Vanlaiphaiah hian dikna chu lui angin luang sela, felna chu luipui kang ngai lo angin luang rawh se," tia auin mipuiin vote an han thlak meuh chuan Congress an 'nil' chiang hle thung, an tia tak tak ni maw?

Hetiang hi kan ram Koh­hran leh a enkawltute dinhmun a nih avangin Congress party hi inthlahrung lo sela, 'Ṭhahnemngai takin zu hi zuar rawh se.'