Chaltlang Tourist Lodge outsource-a 5 star hotel-a siam tum hi a va ṭha em

Political party worker ṭhenkhat, mawlmang ve tak tak, ṭawng thei ve satliah, smartphone a lo chhuah hnu fea social media hmang thiam leh thu post leh comment thiam ve sawih sawihte'n social media-ah thu âtthlak tak tak an han post a, post-te an comment bawk a. A chhangchhiatthlak thei hle.

Social media lamah hian sawrkhar hmalakna leh thil tih apiang a ṭha nge ṭha lo pawh chhut chiang chuang lova sawisel tum hrim hrim an tam hle. Social media hi 'sawisel media' ah an chantir a ni ber mai.

Sawrkhar hmalaknaa Mizoramin kan neih tak leh sawrkharin a enkawl thil ṭhenkhatte a changtlun zawk nan leh sawrkhar sum dinhmun chhia siam ṭhatna atana mi dang kuta dah tuma hmalaknate opposition party mite hian (an hruaitute pawh telin) an lo sawisel hmanhmawh zel a, sawrkhar lai beihna atan an hmang nghal mai zel.

Thil eng emaw mi dang enkawltir (outsource) tuma hmalak a nihin oppisition party-te hian sawiselin, 'hralh' tih ṭawngkamte an hmang ṭhin. Hei hi a ṭha lo. Ram kaihhruai tum, ram hruaitu nih tum chuan mi dang kuta hlan leh enkawltir (outsource) leh hralh (sell) hi an hre hrang tur a ni.

Outsource-ah chuan a enkawltuten neitu nihna pumhlûm an nei lo va, an duh angin enkawlin thil ti thei mah se Mizoram sawrkharin eng emaw chen chu a la thunun thei tho tho. Hralh a nih erawh chuan a hralhtuin neitute nihna a nei tawh lo va, a thil hralh tawhah thuneihna pakhat mah a nei tawh lo.

Sawrkharin Chaltlang Tourist Lodge hi five star hotel-ah siam a nih theih nan outsource a tum niin an sawi a, a ṭha ka ti hle mai. State pakhat ve riang ruangin 5 star hotel kan nei miah lo hi a zahthlak deuh roh a, Mizorama chengte kan intihchangkan viau tawh dan ngaihtuahin 5 star nei ve tawh awm tak kan ni. 5 star hotel kan neih theihna tura Mizoram sawrkharin sum sen ngai lova ruahmanna a siam hi a ṭha a, puitling ngei se a duhawm tak zet.

Chutih lai chuan opposition party mite chuan sawrkharin Tourist Lodge hralh a tum ti zawngin an lo sawi hmanhmawh pek a! Sawrkharin outsource a tum hi 'hralh' a ni lo, 'mi dang enkawltir' a tum a ni.

Sawrkhar hmasate pawh khan tourist lodge leh highway restaurant tih vel tam tak an lo outsource tawh a, tuna sawrkhar lai hian thil ṭha zawk tur nia hriain tourist lodge pakhat outsource an tum ve a ni mai. Mi dang enkawltir (outsource) hi hralh ti zawnga an sawi ṭâlh a nih chuan party dang (an party) sawrkhar lai khan tourist lodge leh highway restaurant vel an lo va hralh tam tawh awm em em ve!

Tun hmaa tourist lodge, highway restaurant leh resort/spot tih vel sawrkharin a lo outsource kha chhan ṭha tak awma tih a ni a, a ṭha e. Tuna sawrkharin Chaltlang Tourist Lodge outsource a tum pawh hi chhan ṭha tak nei a ni a, Mizoram leh sawrkhar tan ṭha zawk tura ngaia an tih a ni tih i hria ang u. Outsource an tumna hi a hlawhtling a, 5 star hotel kan neih phah a nih chuan a lawmawm hle ang.

- Lalhlanpuia