Mizo cinema

Mizo Cinema han tih hian, Korea film aṭanga an lehlin ni lo, Mizo thawnthu a bik tainin hman lai thawnthu an channa film te ka lo en ve ṭhin a. Nimahsela an thawmhnaw hak leh inchei dan hian ka duh thu a sam thei ngang lo a, ka han ziak ve ta rawih mai a ni.

Hnam fing zawkte chuan an film siam reng rengte hi an uluk viau zel a, han en mai pawh hian an inchei dante hi a hunlaia zir zelin inchei dan uluk nachang an hre viau a, hei hi a tihmuhnawmtu pakhat pawh a ni. Mizo film-ah chuan kawr hi tual tah hman ngei ni sela, tual tah a van tak avangin a ang thei ang ber puan chu hmanlai deuha thui ni bawk sela. Inchei dan hi hmanlai nun phawk chhuaktu ṭha tak a ni nghal avangin uluk a ngai em em a ni.

Sam khuih dan: Hmanlai chuan mipa leh hmeichhiate hian an tukkhumah sam an zial vek ṭhin. Hmei­chhiate chuan bari hi an chal zawnah a lai takah an ṭhen a, mar takin an khuih a, tukkhumah an zial a, sam ṭha deuhte phei chu an pawh chhuah a lawr ngauh ṭhin.

Kum 1946 velah khan bak huih kir hi a lo chhuak ṭan a, nulate chuan an beng bulah tlemtein an huih kir thla a, chu pawh chu upa lam chuan a lerh thlak an ti a, an ngaimawh hle.

Tunlaia kan Mizo film tam berah hi chuan an kawr hak leh pawnfen lamin a zir pawhin an sam hi pawh ngil tih hriat fahran hian nalh tak maiin an ti uai thla nghiau nghiau a, hei hi hmanlai hmeichhe sam khuih dan a nih loh avangin a tihmuh­nawm lo hle ṭhin a ni.

Tin, mipa pawh sam lem an vuah nasa lutuk a, an lu chungah an zem khat luk ṭhin. Heti em em lo deuh hian sam lem lu chunga vet kual vak loin tukkhum lamah zial ve mai tur a ni.

Tui chawi leh thing phurh: Hman laia an tui um chu a na thel sa vek a ni a, nula pangngai chuan a tlem berah tui um riat hi paikawngah an phurh (thawn) dan tlangpui a ni. A duham deuhte chuan um sawm thlengin an phur ṭhin. Nulain um li um nga lek an phur ngai lo.

Thing phurh dan pawh a mawi tawk a awm a, tunlai film-a kan hmuh ang hi chuan an phur tlem lutuk a, hmanlai nun a lang chhuak zo ṭhin lo. Rei lo te lang tur a nih avangin rit deuh pawh ni se, an phur mai tur a ni. An phur thiam lo a nih pawhin, film an chan hmain an practice lawk mai tur a ni. A nih loh pawhin thing duap, zang deuh tur zawn mai tur a ni. Chutilo chuan, hmanlai film chang ta rau rau an tihmanlai tawk lo a, an titunlai lutuk hian a tihmuhnawm lo ṭhin a ni.

Hetiang thilah hi chuan film siamtute hi thingtlang khaw kil khawr tak takahte zin hmasa sela, a chang tur actor leh actress te pawh hruaiin an nun dan chu zir hmasak phawt a ṭha ang. Thing­tlang nuna an lo nung vak tawh lo a nih pawhin upa kum 80 chung lamho hi ngun takin zawt peih sela, an film siam pawh a hmuh­nawm sawt ang.