CONGRESS LEH MNF BIH THUAKNA

Vanglaini Nitin chanchinbu chhuak Ni 25 July 2013-a Pu Vanneihtluanga’n, ‘Congress Sawrkar bawk aw ni ang’ tih thupui a ziahah khan Mizorama Sorkarna siam thei awm chhun pahnih Congress leh MNF-te chungchang a rawn ziak a. Kha a thuziah kan chhiar aṭanga thla li-naah MLA kan inthlang dawn a; Congress Sorkar kalphung kha a duhthu a sam lo tih leh a bik takin Chief Minister a duhkhawp lohnate a ziak.

Mizoram kaihruai zel tur chuan a iai tih a lang a, anmahni thlak theitu tur MNF party lah chu party chhung buai avanga tling zo chuang lo tur niin a hmu bawk si niin a lang.

Pu Vanneihtluanga thu ziah kha ka dahṭha reng a, a hnu thla li-na velah election result an puang ta a, a thlirna tarmit kha fim bawk a niang, Congress bawk chu an Sawrkar leh ta a ni.

Phak ang tawka ka’n chhui kual a, anmahni party mi leh sate ka kawm kualna aṭang leh chanchinbu-a mithiam tak takte thuziak ka lo thlir thin atangin kan ngaihsan America-ah chuan Term hnih danah Sorkar an thlak ṭhin tih leh India rama state zingah chuan eptu party an chak loh emaw, ruling party an ṭhat viau chuan kum 20 aia rei pawh an sorkar ṭhin tihte kan hmu a. Kan ramah hian party lian pahnih kan nei a, party chhung inrelbawl dan bik-a ka hmuh dan hi ka rawn tar lang ve hrim hrim duh a ni.

MNF hi Pu Laldenga dam lai chuan an inrelbawlna a ṭha a, Party-a nihna leh inthlana candidate tur thlan thu-ah pawh hruaitute bei vak vak ngam an awm lem lo a, an dinna leh innghahnaah an chiang em em bawk. Pu Zoramthanga’n a lo hruai tak hnu hian an del dul ta hle mai a, an sorkar lai pawhin duh duhin an nawrh khum a, a bula awm hnai apiang thu a la ta a, dinna leh innghahna bulbal nei ta lo-in an awm a ni ber. Tunah chuan an innghahna pawh, ‘chu chu a ni e’ han tih tur kan hre ta lo. Mau nge, chakai farm nge, saptheite kha nge? Chakma hnawhchhuah nge? Zu do nge? kan hre thei ta lo. Eiruk hi Pu Zoramthanga hian a sawi pawh Zoram mipui hian kan la hre awm lo e.

Congress ho hi han en ila, an President Pu Lal Thanhawla chief minister nih hun chhung ringawt pawh hi belhkhawmin ṭhangkhat lian chuang lai a ni ta..! Rorel a thiam vang nge? A dik vang nge? Mi bum a thiam riau vang? tih hi ngaihtuah tham a tling. Ṭawngkam a thlahdah tih thu hi kan hre zing viau mai. Ram leh hnam tana an thil tih ropui sawi tur erawh a vang phian a, Pu Zoramthanga a tluk lohna pawh niin a lang.

Pu Hawla hian Party chhung buaina lian tak tak a tawk ve fo mai. Term hnih an opposition phei kha chuan an Vice President ho khan lian takin an phel phawk kha a ni a. Ding chhuak leh tawh lo tura mawiin an tluchhe ve a ni. Eng tin tin emaw amah beitute kha a lamah a hipkhawm leh thei a. Sorkar ngelnghet tak a rawn siam leh thei hi lawmpui-awm tak chu a ni phawt mai. Amah anga Party lian emaw Party te-ah emaw pawh President ni rei kan la nei lo a; a kal dan ka ena mak ka tih deuh deuhte:-

Publicity-ah an chak em em reng a, anmahni beitute an beih let dante hi Kristian tih atana mawi lo thleng thleng ni mah se hetianga a mi leh sate a hmang thei hi a mak a ni.

Amah sawiseltute a haw ngawt lo niin alang. NLUP hmasa sawiselna bu meuh siamtu chu a la lut a, MP (RS) ah hial a dah thei. MP (LS) pawh hi amah uiresantute zinga mi bawk. Media department-a Chairman pawh hi MNF a awmlaia amah bei nasatu ber a ni.

Party inrelbawlna fawng vuantu-ah khawi lai lai emaw vai dawr vela tukluih chhiah khawn ṭhin zirlai hruaitute a dah ve mai mai ngai lo a. Party-a mi ngelnghet leh tlote a dah fo hi a dinkhawchhuahna bul a ang. NSUI leh MPYCC president ni tawhte hi han en ila, chutiang/khatiang an ni tur a ni tih a ngaihtuah vak lo a, party-ah leh khawsak phungah a ngel nghet em? An chhungkua eng ang mi nge tih a thlir niin a lang. A tih fuh berte zinga mi a ni ang!

Zirlai hruaitute zingah pawh amah beltute an awm a, a tilawm thiam tho. An hna a siamsak a, party chhungril/party kaw-chhung haipha si lo leh hmu pha lo tawkin a dah thiam a. A nihna takah chuan a party chhan tur leh midang bei turin a dah tihna a ni. Minister ropui tak veng tura police arsi bel kai lo an awm ang deuh hian.

Party inrelbawlnaa a thu chu a tlang viau ang tih a rin theih laiin agenda tur chu an Gen. Secy ten an buaipui a, a hman hun tur an zawt a, an committee ṭhin an ti. Chutah chuan agenda a sawi vak ngai lo a, thu a khaikhawm mai ṭhin an ti bawk.

A duh hunah a rum leh viau lawi a, an party candidate bei-te chu eng hun pawh ni se a hrem hmak hmak mai a, ‘bial ngaia ding ngam lo chu ding lo mai rawh se’ te kha inthlan dawnah a ti hmiah mai a. MLA-a din tum ve, din tak loh avanga candidate-te bei phei chu action a la hmak hmak a, hei hi a survive-na chhan lian berte zinga mi a ni awm e. Congress-ah anmahni party mi leh saten an candidate an bei ve ngai lo.

 Thusawi a thiam lo, NLUP pawh a fak mawi thiam lo. NLUP ṭhatna leh kalpui dan tur darkar hnih sawina hun pe ta se a sawi buai viau awm mang e, tih a nih laiin NLUP bak Congress hian innghahna a nei lo a, a sawi ngai bawk lo. Pu Hawla = NLUP tih hi mipui hriat dan a ni.

MNF president thung chu chutiang a ni lo. A awm dana mak ka tih deuh deuhte:-

A thil tih dik loh emaw amah sawiseltute chu a do ngar ngar a, a lamah hruai a la nei lo.

Publicity-ah a chak lo. A sorkar laia a hnathawhte hi sawi sen mai chi pawh a ni lo: kawng, building etc-ah hna ropui tak tak a thawk a, Zoram mipuiin kan hre lo. Mi hmantlak a zawng ngai lo a, amah hnaih apiang leh tlawn peih apiang nihna a pe ṭhin a, chuvang chu a ni thei.

Party-a mi nghelnghet ngaih pawimawhna a nei lo a, mi thar a lawm em em. Zirlai hruaitute phei chu a ngaisang em em a. Party inrelbawlna chhungril ber berah a dah nghal pawp pawp ṭhin a nih hi! Hei hi pawn lam atanga supporter-ten amah an iai-na ber niin alang. Kan vengah pawh hian MNF party retheih lai ber pawha nghet tlatte aiin a rawn lut thar, hman ni lawka mi in luaha lehkha rawn zir, an sum hmuhna kan hriat mang lohte leh vai an vaw ṭhin kan tihte kha a siam lian chak a, a ngai pawimawh zawk bawk. Veng dang an ni ve em ka hre lo a, kan vengah chuan MNF ruhkawl ho hi rilru na takin an awm a, an hliam a la dam lo. An president hian tihdam tumna pawh a nei lo niin alang.

Zirlai-ten lo haw lo se, kan zirlai inthlan dan hi ṭawp tak a ni. Private-a ka thawh laiin kan experience ve a. Vote lei hi Zirlai aṭangin an lo practice tawh a lawm mawle! Vote an inlei dante lah a fair phian, an leisakte vote neih zawng kha pawisa an inpek rualin an inthleng nghal tawp a. Nihna nei lem lo kan thawhna sikul naupangte kha an luhtir a, an vote tur kha chiang takin an hrilh a ni. Chutiang chu MNF ah hian a lalut a, a mihring bakah an inthlan dan pawh an seng lut tel a. Hetianga in hmang ve lo MNF mi nghet te chu Hnam Runah chuan mikhual an ni zo ta a, zirlai hruaitu hluite chuan lalna leh thuneihna leh bial chu an inchuh ta a ni ber.

A ṭawngkam a thlum a, khawvel mi thiamten an ziahah ṭawngkam thlum tih hi Quality of Good Leader-a ka la hmuh loh Pu Rama Quality neih a ni. A chetsualna pawh niin alang. A party a enkawl zo lo a, a naute bial leh nihna inchuhin an insual buai a. Bial chang lo apiangin a dingte an bei a. Pawn lam atanga lang khawpa anmahni MNF Candidate beitute pawh a duhsak tawh chuan a duhsak chhunzawm zel a. A lam hnaite, a ina lengkai tam deuhte a ring ber zel niin a lang.

Hriat loh a nei. Zu chung changah hian a naute, tuna a hman ṭangkai em emte pawh hi zu avanga Jail tang tawhte pawh an awm. Mipui lakah zu duh lo ber angin a insawi a, a naute zinga a duhsakte hi zu permit awm hmaa Excise Officer-te hnena zu dil hrat ve tak takte an ni.

Heng lo pawh hi kan la sawi zel ang. Amah, Pu Vanneihtluanga dungthul-in Congress sorkar hi duhkhawp lo viau mah ila, tun aṭanga kum thumnaah MLA kan thlang leh dawn a, tun anga MNF hi an kal zel a nih chuan Congress bawk an sorkar leh mai awm mang e ka ti deuh.