Kelkang harhna leh kan nun

Mizote hi Pathian duh hnam, khawvel kristian zinga in­khawm hnem ber lawr lak, a peih fal tan full-time a inhmanna tham khawp kohhran activities ngah kan ni a, Kelkang harhna in heti hluaia Zoram mipuite min kangkai hi a mak hran lo.

Mahse, harhna kan chan hian khawi chin nge min thlen a, kan nunah eng ang takin nge nghawng a neih? tih hi kan inzawh ngai chu a ni. A bik takin Aizawl atanga Kelkang lam pan hi kan tam hle nia sawi a ni a, kohhran liantham ṭhenkhat phei chu bus sawm chuang hmanga kal te pawh an awm thu sawi a ni.

Kelkang harhna vanga sum leh pai luangliam zat tur ringawt pawh hi a tam tham viauin a rinawm. Mahse, kan sum leh pai hman zawng zawng te hian kan thlarau nun piah lamah kan nitin nunah eng ang chiahin nge nghawng a neih? tih hi ka rilru a zawhna lo lut chu a ni.

Harhna nge hlimna?

Hman zanah Kel­kang kal haw ṭhen­khat bethel zo haw lam titi ka nang fuh a, tlangval pakhat chuan, "Nizanah kan tawngtai rei lutuk a, nilengin vawiin chu ka mu a, tlai chaw ei dawnah ka tho ve chauh," tiin a ṭhiante bulah a sawi a, a ṭhiante chhanna pawh an ṭhianpa ang tho a nilenga an mut thu a ni.

Mizote hi kan pi leh pu aṭang tawha tlangval hrisel pang­ngai in nilenga hnathawk loa awm 'zak' thin kan ni. Kan harhna chan hian chhun mut lam velah min ṭuan tir mai mai a nih ngat chuan hei aia harhna dik zawk hi Mizo te hian kan mamawh chiang a ni.

Kum 1945-a USA in Hiroshima leh Nagasaki a bomb chhiat hnua Japan ram dinchhuahna chu hlim lam harhna ni lovin 'thawkrim lehzual tura harhna' a ni. Vawiina an ram dinhmun chu a hre chiangtute kan ni. Thlarau thianghlim harhna kan chan hi a ṭha e, mahse Kelkang kal tam zawkin tuna an chan mek hi chu harhna ni lovin 'hlimna' ringawt ni ber zawkin a lang.

Public transportation a chhiat phah

Mizote hi khawm­pui ngah em em, nuho aṭanga pa valai, ṭhalai aṭanga upa ho thlenga khawmpui nei hnam kan ni a, huau huau hi nuam kan ti viau a ni maithei. Buaithlak erawh chu khawmpui nei an awm apianga public transport hmang ṭhin te'n kan tuar ziah hi a ni.

Tunah pawh Kel­kang lam panin Bus a liam nguah nguah a, a tuartute chu nitin hnathawka vei vak ṭhin mipui vantlangte kan ni. Bus a vang a, a awm chhunah kan tawt em em bawk. Sorkar hian khawmpui nikhua leh hetiang nikhuaa mipuite kan buai lutuk loh nan ruahmanna ṭha zawk nei thei se a duhawm hle a ni.

Sorkar bus khaw kar kawnga service lo a tam ta hle mai, hetiang nikhuaah hian mipui tan sorkar hian ruahman thei se chu khawmpui leh thiltihpui nikhua a awm apianga mipui tam zawkin harsatna kan tawh ṭhin hi a chinfel theih ngei ang.