Damdawi zuar hausak chhan ka hre ta

Damdawi zuarho hausak chhan kha kan hre châk deuhin ka hria a, kei chuan ka hre chhuak ta khiau mai a, chu chu "Pawisa an ngah vang" mai mai a lo nih chu! Ka hriat tak loh erawh chu an pawisa neih dan tak hi a ni.

Vai ramah te chuan construction company, real estate, consul­tancy firm, contractor etc hi an hausa ṭhin a, heng bakah hian sumdawnna lian tham khawih ṭhinte hi an hausain an hausakna hi a pung thur thur a - Mizorama hausa chu damdawi zuar! Ka chhut ka chhut a, ka rilru tibuai bertu chu mipui nuai 10 lek awmna state-ah damdawi dawr a tam si a, insem rual vek pawh ni se hetiang em ema hausa tur hi an ni theiin ka hre thiam si lova, eng vanga hausa thur thur nge an nih hi a hria chuan han sawi teh u.

Ka kal ve tawhna India ram khawpuiah hian kawi tinah damdawi zawrhna hi a awm ve ngai lova, veng lian deuhah hian damdawi dawr lian pahnih khat bak hi a awm ngai pawhin ka hre lova, ka chik loh vang pawh a ni thei tho mai. Mizoramah hi chuan kan bazar hmun ṭhalaite hi damdawi zuarin an luah thei tlat zel mai a, chu mai chu ni loin damdawi dawr hi a intlarin an awm thui em em a, tichuan heng damdawi zuarte hi a nawlpui hian an awmna venga khawsa thei pawl an ni bawk si a, damdawiah hian hlep a ṭha viau nge ni engtin nge an tih bik, tih hi hriat ka chak a ni.

Thil hre zau deuh pakhat min hrilh hi a tak ni turah ngai ta ila. Burma lamah hian damdawi (ruihhlo a ni lo a nia kan sawi hi) hi a vâng a, a man a to bakah an damdawi hi a ṭha vak lova. India damdawite hi a ṭhain a man a tlawm si a, an lei duh viau a ni awm e. Damdawi zuar ṭhenkhat hi chuan dan ni chiah lo mah se Burma-ah hian damdawi hi a ruk deuhin an 'export' ve leh ta a, tichuan a hlawma damdawi pe chhuakte pawh an awm ṭhin an ti. Nachhawkna kan tih maite leh kawṭhalo damdawi te, hritlang damdawi te, damdawi tlanglawn tak takte pawh hi a hlawma Burma-a tawlh lut ṭhin an awmin an lian tawlh tawlh mai a ni awm e.

Hei hi chu finfiahna ka neih loh mi min hrilh mai a ni a, finfiahna keiin ka neih bik chiah loh mah se rinhlelhawm dang leh chu damdawi zuar ṭhenkhat hian ruih chi damdawi ṭhenkhat hralh hi an hnial lo viau a ni awm e. Chu chu thil kal dan a nih si chuan damdawi zuar ṭhenkhat hi chu ruihhlo zuar an ni ta ringawt a, a ṭhente phei chuan damdawi hralh kal chi (ruihhloa an hman chi) hi a hlawmin an lalut hmiah hmiah an la ti bawk a, hengte hi a tak ni lo hram se ka va han ti tak em.

Tichuan, han sawi kai ta zel ila, damdawi zuar hlun leh rei tak lo ti tawhte aia dam dawi zuar hlim an hlawk hluai leh an lian thur thur hi a bul ṭhutah chuan thil kal dan fel zan lo a awm vang an ni. Hengte hi Kelkang kala chinfel vek theih ni se ka tih tehlul nen, Zu leina permit nei hnawl duhtute hian kan en liam mai mai dawn em ni?