Sawrkarin kawngpui siam zel rawh se
Khua a tuihul chho va, kan Mizoram sawrkar pawhin PWD hmangin kawngpui hrang hrangte an thawm ṭha chho mek zel a. A lawmawm. Kuminah Mizorama kawngpuite a chhe em em mai a, mipuiin kawng ṭha neih hlan kan nghakhlel si a, sawrkar hian chak zawkin han siam zel teh se.
PWD-in kawng an siamte hi ṭhenkhat chu ṭha tak tak a awm laiin, tam tak chu ningnel tak takte a ni a, ṭhenkhat chu two wheeler tan phei chuan siam hma aia tlan hlauhawmte a ni. Chung kawng, ningnel taka an siamte hi engtin nge an tih zui zel dawn kan hre ve pha lo a, tuna an siam ang ringawt hi an duhtawk mai dawn em? Tuna mi ang ringawt hi chuan rei a daih lo vang tih a hriat theih mai.
Kawng khuar zual lai hnawh mâm ringawtah hian an duhtawk dawn nge, nakinah siam pangngaiin, blacktop pangngaiin an la ti leh dawn? Working season a inṭan mek chauh a ni a, blacktop pangngai takin an siam turah beisei phawt ang.
Mizorama hmun hrang hranga kawngpuite hi fûr chhung khan a chhe hle hlawm vek mai a. Siamṭha vek tur chuan hna a tam hle ang. Kawng chhia zawng zawng siamna tur daih sum a awm dawn em? Working season chhunga siam zo vek hman turin thawktu lam an indaih dawn em? Ngaihtuah tur a tam dawn hle mai. Mipui rilruah chuan, kawng chhiaah kan tlan rei tawh a, kawngpui zawng zawng hi siamṭha vek se tih hi duhthusam a ni.
Tun hnaia kawng siam tawh ṭhenkhatte erawh a ṭha phian mai. A tlangpuiin a khuar zual lai chauh hnawh ni lo, a zavaia blacktop ṭhat a nih hian tun dinmunah chuan a ṭha zawk tlangpui a, tlan pawh a nuam nge nge. Kan sawrkar pawhin theih tawp han chhuah zel se; kalphung thar, mipui sawrkar inti ngat an ni bawk a, basic needs zinga mi - kawngpui ṭha hi min hlui ngei kan beisei e.
Hetihlai hian, sawrkarin kawngpui a siam chho hi mipui kan lawm viau laiin, opposition party-te erawh chu an lawm ve mang tlat lo ni hian a lang deuh roh a. A lo mak thei ngei mai!! Social media hrang hranga an thil sawi duh dan, thu leh thlalak an post duh dante en hian sawrkarin kawngpui siam chho ta hi an lungawi lo va, an thinrim ru deuh ṭûng zawk ni hian a lang tlat asin!
Opposition party mite u, sawrkarin hmun hrang hranga kawngpui a siam chho mek hi in fak thei lo a nih chuan fak lo mai ula; lo ngawi rih ula, lo sawiselna rih lo hram hram teh u. Sawrkarin thil ṭha a tiha in lawm lo a, in lunghnûr tlat a nih a, in sawisel zel a nih chuan ram leh hnam hmangaihtu in ni lo va, ram leh hnam tana hnawksak in ni zawk. Chutiang mite chu politics aṭangin inthiar fihlim ngam se, kan ram leh hnam hian kan ṭhatpui zawk ang.
- Lalduhmawia