Israel hnam bo Mizo leh thla koh

Upa Pawl Chanchinbua ziah awm tak a nih laiin, chhiartu zau zawk awm beiseiin he lamah hian ka'n ti ta zawk a ni e. A thupui khi tam sawi tur ka hre lova, chumi hmain thuhma thui deuh hlek kan nei lawk ang e.

Ṭhalai á leh ṭhalai fing an awm. Thalai fing chuan Upa pawl chanchinbu a hmuhin, ' hei le, thil hlu ka hmu e' tiin a bih chat ṭhin a, a fin belh phah tulh tulh ṭhin. Ṭhalai á chuan, ' Upa-te thu leh hla mai mai' tiin a hawisan a, a at belh tual tual ṭhin.

Mizo Upa Pawl chanchinbu thlakip chhuak, ' MUP Tlangau' hi Mizo tawh phawt chuan lo chhiar ve ṭhin teh u. Vawiina Mizote hi vawiin kan thlen theihna tura kan pi leh pu, kan nu leh pate thil lo tawn tawh chi hrang hrang leh, an thil lo tawrh ropui tak tak leh rapthlak tak takte ziahna, 'AN TAWNHRIATTE' huangah hian, ramhnuai leh ramhuai chanchinte, In lam leh Lo lam nunphungte, thihna leh damnate, vanneihna leh vanduainate, hlauhawm leh hlimawmte, vawiin kan thlen theih nana mihring danglam bik leh kan tana mi pawimawh hmasate, hmun hran hran leh mi hran hranin ram buai laia an tawrh dan leh an tawn hrang hrang; ngaihnawm tak tak leh lungchhiatthlak tak takte ziahna leh, vawiina nuam ti taka Mizo kan la nih zel theih dan kan history hnaivai hriat theihna bu a ni.

Zirlai leh ṭhalai tan, ziakmi leh zir bing tante, upate lung tilengtu leh an lunglen hnemtu chanchinbu hi lo hmelhriat ve la, hmelhriat har i inti mah mah mai thei. Kei pawh, tlai khaw hnu, mahse, upa pawl nih ka la tlin hma daihin ka hmelhriat ve chauh a, 'ka chhiar ve hma khan eng thu ṭha zozai tak lo ziak tawh ang maw' tiin, ka hmuh theih ang angte ka dapkhawm ta ruai zawk a ni. Upa lam chanchinbu a nih angin, a hawrawp a hraw a, a fiah bawk a, chhiar a nuam a, chhiar chhung a rei lo. Mahse, a ziaktute hi upa tawh tak takte an nih avangin mual an liam zel a. Kan tana hriat tur thu ṭha leh pawimawh tak tak leh, thu ngaihnawm tak tak leh lunglenthlak tak tak an lo ziah tawhna bu-te chu Upa pawl office lam aṭangin i hmuh leh theih ka ring.

Kan pi leh pute khan damlo ' Thla koh' an lo nei ṭhin a. Tunlai hian 'thla koh' hi, 'thla ai koh' tia sawi an awm avangin, hei hi a dik lo e, ti an awm a, kei pawhin dik loin ka ring. Thla ' ai' hi chu khaw dai hnai deuha mumal vak lo, mahse, thin ṭhawng tak sia ai vak vak ṭhin ni khan an sawi ṭhin tlat. Thla koh hi chu; mi a chhan hriat loha damlo a awm a, a rum a rum hian, ramhuaiin a thla a man a nih hi, koh a ngai a ni, an ti ṭhin. Chuvangin, 'thla koh' tih ringawt kan duh tawk lo a nih pawhin, ' thla rúm koh' pawh ti ta zawk ila, a inàwm deuh hmel.

Chu a thla chu ramhuaiin an manna hmun, ramhnuai khawimaw laiah a rum a rum ṭhin a. Chu chu ram vák tuin emaw a lo hriatin, khuaah haw vang vangin damlo bawihsawmtute chu a hrilh a, anni'n a ko turin pasaltha an tir ṭhin. Pasalṭha chuan ramhuaiho vau tlawm nan chuan thu eng eng emaw chhamin, a inhrosa chiam ṭhin a, thing leh maute a fik ṭhuai ṭhuai ṭhin a ni. Chu chu ramhuai chuan hlauvin, an thla man chu an chhuah a, thla rum pawh a reh ve nghal ṭhin. Chu veleh pasalṭha chuan thla neitu chu a hminga koin, ' Ti rawh le, i haw tawh ang' tiin, a kal hmasaktir a, mahse, damlo In an thlen hma chu tu mah a be thiang lo a, a ṭawng vaih chuan ramhuai chuan thla chu an man leh mai ṭhin. Khuma mu damlo chuan, ama thla leh a kotu pasalṭha kawnga an lo haw chu a lo hre thei vek a, ṭawng miah lova in chhung an lo luh veleh a dam ta ṭhin a ni.

Thla, thla koh tih vel hi keima hriat leh tawn a ni lo va, a hriate sawi dan ka sawichhawn a ni. Mahse, mak tih deuh ka nei a. Pasalṭha khan, ramhuaiho vau tlawm nana a inhrosak vak vak leh, an hlauh theih dan tur ber nia ngaih a thu chham zingah khan, "Kha, keimahni Manasea thlah kan ni ngai e, Manasea thlah kan ni e, an ti tel ziah khan ngaihtuah a tithui khawp mai.

Kha'ng hunlai khan, ziak leh chhiar thiam chu sawi loh,Mizo tih emaw, Kristian emaw, Bible emaw pawh an la hre awm si lo va, engtia Jakoba, Isarela fapa Manasea thlah kan ni, an lo tih theih tlat mai chu le. Chu chu an pi leh pu aṭanga ṭawngka an lo chhawm zel a ni awm bawk si kha a mak ka ti a ni. He thu hi Isarel hnam bo kan ni ti ṭhinte hian ṭanfungah an hman awm ka la hre lo va, nge, mite hian an lo ziakin an lo sawi fo tawh a, kei hian ka lo la hre ve lo zawk.

Engpawh ni se, Isarel hnam, Manasea thlah pawh chu kan lo ni mai thei. Nimahsela, Manasea thlah Isarel hnam bo, mahse, Mizo ni tura Pathian min hruai bo kan ni tih hi i pawm tlang mai ang u hmiang.

Mizo ni loten Mizo nih chakin Mizo nih phet an tum lai a, Pathianin Mizo a nihtirsa reng, Mizo nih loh lo tum tlat chu Pathian pawisawina a ni ngei ang. Mizo vun rawng puin, Mizo thisen neiin, Mizo rilru leh Mizo ngaihtuahna neiin, Mizo hming neiin, Mizo ṭawngin kan thi dawn tho tho a, Pathian siam tawh hi a tih danglam theih tawh loh. "Hnam tin an awmzia ang tur zelin ka siam a, an tan ramrite ka khamsak a," titu hmun kan thlen hunah hian, bák ang maiin hnam bik leh awmna tur bik nei lo hian kan lai zo vek mai ang tihte pawh a hlauhawm alawm maw le.

- K. Hmingthankaia