"Ka sawi mai nang a...”

Dam chhunga ka theihnghilh tawh loh tur “Ka sawi mai nang a” tih tawngkam mawlte hi kan chhungkua a thil ropui thlentirtu a lo ni tawh a. He tawngkam hian thu dik puan chhuahna leh ngaihdamna a fun tel avang hian Zoramthar din nan he article mawlte hi ka rawn ziak ve a ni.

Dr. Nelson Man­della hova South Africa din thar leh nan ‘Truth & Reconciliation Commission hma a thu dik puan chhuahna, in ngaih­dam tawnna’ a awm ta ang khan Mizoram buaina avanga rilru na thawidam nan Truth & Reconciliation Commission din rawtna chanchinbu kal tlangin ka rawn ziak ve tawh a, tuman min uksak pui lo.

Lal ṭawngṭaina kan sawi apianga kan hriat chhuah - Thin lungina kan ngaihdam zan theih loh leh kan thil sual tih kan hriat chhuah fo ṭhin (haunting memory) phuba lak chakna, miten kan chunga phuba an lak hlauhna bawih, hrem hmun laka kan fihlim theihnan ‘ka sawi mai nang a’ tiin in bunruak/ lepse fai vek law law ila, van rama ro khawl khawmna ṭha tak tur niin ka ring.

Aw le, ‘Ka sawi mai nang a’ tih ṭawngkam mawlte in kan chhungkuaa thil ropui a thlen tak chu - ‘Ka u nen ka nu vawkte chum ṭha tak kan vaw hlum a, kan phum a. Zep tlat tura kan nau kan hrilh mawlh mawlh laiin ka nu feh haw hnenah ‘Ka sawi mai nang a’ a ti ta mai a. Ka u nen chuan kan hlau hle a, mit zaizirin kan khap bet thei hram a.

A khat tawkin ‘Ka sawi mai nang a’ a ti leh pek ṭhin a. A tawpah ka nu chuan sawi turin a ti ta a, kan thil sual tih chu puan chhuah a ni ta. Vuak/ hauh hlaua kan awm laiin ka nu chuan, “E, tih palh a nih chu, vawkte chu va la ula, chawhmehah ka siam sak ang chu u” a ti ta daih a. Kan thaw huai mai.

A rang a rangin kan va phawrh chhuak a, tui takin kan ei ta a, vawkte chum ṭha tak sa chu a lo tui phian a. Thu dik puan chhuahna chuan ngaihdamna bakah thawven hawk­na, puarna thlen­tu a ni ta ni.

Mizote hi hnam rinawm leh zahawm ni tura i duh a nih chuan dawt sawi leh thu dik puan chhuah ngam loh hi kan hlawhtlinna tur kawng min daltu tur thil pawi tak niin ka hria. Chuvangin, thu dik ṭan ngam turin Mizoten kan rilru siam ila, hnam zahawm leh rinawm kan ni ang a, kan hlawh­tling bawk ang.