Chief Secretary chuan... designation plate a tar lo ngam!

Mizoram Chief Sec­retary Lalmalsawma'n designation plate a tar lova, a tar loh chhan an zawhna, "State dangah pawh an tar lo," a ti mai hi ka ngaisangin entawntlak ka ti ngawt mai. A hnuaia officer-te hian entawn se, mahni office-a nihna vantlang kawngpuia lantir ṭul tlata hriatna nei officer tenau zawkte hi zak chem chem rawh se.

Khawi khaw BDO emaw an nihna Aizawl khawpuia rawn tar vung mai ṭhinte an awm a, a zah pawh hi an zak lo zozai. Assistant Director a nihna chu a office-ah a lang tur a ni a, Zarkawt phei leh Sikulpuikawn kawngpuia a intar khan awmzia pakhatmah a nei lo a, ṭhenkhat phei chuan traffic an tihbuai phah fo lehnghal a, a chhunga chuang kha a zak zawk tur a ni. Tun hnaiah MCS tling thar te te pawhin an nihna an tar ve zel a, an senior-te an entawn a ni chungin an zahpuiawm ka ti takzet a ni.

Duh leh an office dawhkan leh an room luh dawnah tar se, vantlang kawngpuia mahni office nihna tar chingte hi zak chem chem teh u, in pu pu leh chhawngte pu leh Chief Secretary pawhin a tar lo.

Ho mai mai chu khawi district SP leh DC emaw pawh hi ka hriat dan chuan an awmna district pawnah chuan an nihna hi an tar thiang lova, mahse tun hnaiah pawh khaw dang DC leh SP-te motor hi Aizawlah ngei an nihna inziakin ka hmu. Tunah chuan AMC lamin an tar ve leh ta zel bawk a, MLA leh Minister chin hi chu ka ngaidam thei a, sipai officer leh police officer pawh hi kei chuan ka ngaidam thei a, dan leh thupek kenkawh thilah an ṭangkai.

A bak zawng PWD leh PHE officer tih angreng, Sports department, A&T, GAD, UD&PA, Revenue, P&E, Transport, Supply, RD (RD-ah hian an uar hle, an officer tenau thingtlanga awmte designation plate a lian thei), Education, Taxation etc etc hi an office pawn, vantlang kawngpuia designation plate tar a ṭulna pakhatmah ka hre lo, an intih ropuina leh intihveina angah kei chuan ka ngai. Hman deuh khan gypsy pakhatah 'Farmer' tih a intar a, kha pawh kha midang elsenna niin ka hria a, a ṭul ka la ti ta pek lo kei misual phunchiar hian.

Kan Chief Secretary thar hi ka ngaisang a, a chhan chu a lirtheia a nihna tarlan ṭul a ti lo ngam hi a ni.