MHIP hruaitu thlan kha
Kan hriat ṭheuh angin kar kalta Ningani (21.5.15) khan Vanapa Hall ah kum 2015 - 2017 chhunga MHIP Gen. Hqrs. hruaitu tur an thlang a nih kha, thlan tlin mi 6 te duhsakna kan hlan che u a, he ram leh hmeichha tana ṭhahnem ngai taka in thawh ka beisei. Chutih rual chuan, MHIP inthlan apianga boruak duhawm lo leh ngaihnawm loh ri ve ziah hi a khamawm ta hle mai.
Dan bu zawm/ zawm lo
Pawl tinin inkaihhruaina Dan bu kan nei vek a, dan anga kal hi mitin leh pawl tin tih tur a ni. MHIP inthlan dawn apianga ri ve ziah chu line-up a ni awm e. Kumin inthlan tur pawh hi ṭhuang hnih/ thumin a kal niin a lang a, hruaitu ni lai thlak tumte'n Dan bu ah "April thla ral hma-a inthlan tur a ni" tih a ni an ti a, tunah hian kan inthlang hman lo a, thil an ti dik lo a ni an tih laiin Gen. Hqrs. lam chuan "Hmeichhia tih takah kan ngaihtuahna a thui lo a, inthlan kan tum hmasak kha Presbyterian Kohhran Bial Inkhawmpui dawn hnaih a ni a, thingtlang aṭanga lo kal tur palaite'n a rem an ti lo a. A hnu-a kan tih leh kha VC/LC inthlan dawn a lo ni leh si a, chuvang chuan Executive Committee remtihna in May thlaah kan nei ta a ni" tiin an sawi.
Kelkang kal vek kan ni
Sawi tak angin tun thla ni 21 kha inthlan ni a ni a, a hma niin rorel palaite'n ro an rel a. Inthlan kha chawhma dar 11 ah ṭan tur a ni a, journalist/ news reporter ka nih angin ngaihven turin chawhma dar 9:50 velah Vanapa Hall ka thleng a. Central YMA in inthlan an buaipui dawn avangin fel fai tak leh khauh takin thil an ti a. Inthlan buaipuitute tan tute nge vote nei tih a hriat tawh loh avangin MHIP Gen. Hqrs. lamin vote nei turte lehkha an pek sa vek chu Central YMA in gate-a an luh dawnin uluk takin an endik a, a dik nia an hriatte chu an luh tir a, school naupang rual lek lek, lehkha dik tak neite an awm tak nuk avangin au rinna hmangin inthlan dan turte leh thil ṭul nia an hriat te an puang a. Chutah chuan, "Kelkang kal vek kan ni a, dik leh felfai taka inthlan tum ang aw?" tiin an au reng a ni.
Indin ran siak
An inthlan dawn avang hian Gen. Hqrs lam chuan a hma Inrinni (16.5.15) khan Executive Committee meeting neiin secret ballot(?) in Official Nomination mi 10 an lo thlang tawh a. Returning Officer, Pu Lalbiakzuala, Central YMA President chuan inthlan a kaihruai a, an Dan bu-in a phalsak angin Floor aṭangin mi 5 nominate theih a nih thu sawin Floor Nomination siam ṭha an tih leh tih loh a zawt ta a ni. Mawi lo leh tenawm tak chu a lo lang ṭan ta.
RO-in Floor Nomination neih ngai lo ti in awm em a ti a, Hqrs. Executive Committee member pakhat chuan a bula ṭhu chu ding turin a nawr a, mahse a ngam tak loh avangin tumah ding an awm ta lo a. RO chuan, Floor Nomination neih remti in awm em a ti leh a, hetah hi chuan aw tih thawm a ṭha ta hle. RO chuan, "Mi 5 chhawp chhuah tur a ni a, hun ka hawn veleh a ding hmasa apiangin in mi duh in lo sawi dawn nia" a ti ta a, mahse, inthlanpuitu lam, Central YMA hruaitute chu hetah tak hian an huai ngam ta lo a ni. YMA in ruihhlo an do ṭan tirh aṭanga sulsutu leh rorum ber maia ka hriat, an OB hlui pakhat pawhin "Chu chu a ding hmasa tiin ka kawk ngam teuh lo mai" tiin mei khupin stage hnung lam a pan ta a, mahse, RO chuan OB zinga mi pahnihte chu a ding hmasa thlang turin a ruat a.
Chutah le, hun a'n hawng chiah mai chu(h), Gen. Hqrs. lamin Official Nomination an siam ho tlin loh hlau a Nomination-a mi dang lo luh ve hlau, Hqrs. lam thlawptu tur chiang sa nominate tum tam tak bakah Gen. Hqrs. Official Nomination tih thlak tum mi tam tak rang mang khengin an han ding ta suau mai a, Central YMA hruaitute tan chuan a va han luhai thlak dawn em! Floor Nomination siam tuma ding zingah hian Gen. Hqrs. OB ni laite an tel tak avangin OB hlui pakhat chu ding chhuakin RO hnenah, "Gen. Hqrs. chuan Official Nomination an siam tawh a, Floor Nomination chu siam ve tawh lo se" tiin a ngen hial a, mahse, mi tam takin chutiang chu an Dan bu-a a awm loh thu in an chhang a. RO-in a din ṭhat tir leh ngial pawhin Floor Nomination siam tum mi 100 dawn dawn an din ṭhin avangin RO pawhin an hming chhiat mai a hlauh avangin thlang tura a tihte chu huaisen taka ti turin a hrilh a, harsa takin mi 5 nominate tur chu an kawk thei ta hram a ni. Gate bula aurinna hmanga au tu in, "Kelkang kal vek kan ni a, dik leh felfai taka inthlan tum ang aw?" a tih kha chu sawi loh ang hmiah a ni.
Floor aṭangin mahni nominate tur mi an ruai(?)
Indin ran siak tluk zeta hmunnawm leh tenawm chu, tute emaw, hruaitu nih tuma anmahni nominate tura mi ruai an awm ta em ni tih hmuh tur awm kha a ni. MHIP General Assembly hi vawi tam tak ka lo chhim ve tawh a, tlar hma lamah hian Gen. Gqrs. hruaitute leh OB hluite an ṭhu deuh ber ṭhin a, tun ṭumah hian Floor aṭanga candidate nih tum ni-a ka hriat ṭhenkhat bulah tlar hma- ṭhu ngam lo tura ka ngaih tam tak ṭhu in RO-in Floor Nomination siam hun a hawn khan chung mite chu ding vatin an bula mite chat chat an rawt a, mahse, RO in an rawtte chu khawi Branch nge an nih tih a zawhin hrilh chawp an ngai kha, khang mite kha ding tura rawih an ni ang em tih zawhna a awm ta hial a ni.
Central YMA President thusawi kha
Inthlan hma hian Returning Officer, Pu Lalbiakzuala, Central YMA President chuan, "MHIP Gen. Hqrs thianghlimna chu an inthlanah a innghat a, hruaitu nih inchuh leh mawi lo taka chete avangin MHIP a hmingchhia a ni" a ti a, "Branch-te'n thianghlim leh ṭhahnemngai taka khawtlang rawng an bawl laiin Hqrs. inthlan a thianghlim lo ṭhin chu a zahthlak" a ti a, "Tun hnuah chuan MHIP inthlan chu thianghlim tawh se, tute emaw in pawisa an pek avang mai te, an ina chaw an ei avang maiin vote hralh tawh suh u" ti hialin inthlang tura kal khawmte chu a chah a nih kha.
MHIP Gen. Hqrs. hruaitu tharte ka chah ve duh che u chu, he pawl, Mizo Hmeichhiate hmasawnna tura pawl ropui tak hming ṭhatna leh hming chhiatna hi in kutah a awm. In thawhpui tur, Executive Committee member in ruat dawn a, 'chumi chuan min pui, ka tan a ṭangkai' ti lovin, mi ṭha leh dik, rorel thiam, hruaitu nih tling ruat ula, Branch khat aṭangin mi pakhat aia tam ruat loh a fuh. Tin, kum 2017 April thla ral hmain in intlang leh dawn, chutah chuan tuna mi anga buai nuai nuai tawh lo hian, Nomination in siam leh dawn a nih pawhin Sub-Hqrs., Group, Joint leh Branch aṭangin nomination siam theih ti tawh ula a va ṭha dawn em. Tun anga Executive Committee-in Official Nomination 10 siam a, Floor aṭanga 5 chhawpchuah theih in tih leh chuan hruaitu nih inchuhin in insual mai ang tih a hlauhawm.
A tawp berah chuan, MHIP hi Pressure Group a ni lo tih hre thar ula, hmeichhiate hamṭhatna ngaihtuah tura pawl ding, Mizorama cheng zofate'n 'Ka Nu' tia kan koh, mihring nihphunga zahawmna tinrenga thuamte awm khawmna pawl a ni tih hre reng ula. 'Nu' in nihna hi a zahawm tehlul nen, an intelkhawmna pawl kalphung erawh chu inthlan in kalpui dan hian a ti zahawm lo zo ta niin a lang. In Dan neih laite pawh hi siam ṭhat a ngai a, a ṭul apiang bawhzui thuai thuai ka duhsak che u. Tuna in inthlan dan hi chuan ka rilru a ti na in mipate hian Mizo hmeichhe tam tak leh kan chhungte tan chuan tel tlak lohna pawlah kan ngai mai ang che u tih a hlauhawm.