Kan ei leh in a him em?

Mizoram hi kan ei leh in leh, zuk leh hmuam vanga cancer vei tamna ber state zinga mi kan ni tih hrilh nawn ngai tawh lo kan ni. Kan hriselna atana ṭha lo thil kan ei vanga damdawia kan natna enkawlna senso pawh kum tin ram pawnah vaibelchhe eng emaw zat a luang chhuak ngei ang.

Hetihlai hian ei leh in kan sawngbawl dan te leh a hriselna lamah kan thil hriat leh kal dan a la hniam hle a, ramhnuaia kan hmuh remchang apiang ei hun kha kan pel ṭan tawh a, fast food leh bazara a pack sa an zawrh eite pawh kan ching chho ṭan hle. Hmasawnna kawng khat a nih rualin kan ei leh in tur, kan hriselna khawih theih thil a nih avangin kan fim­khur pawh a ngai hle.

Tun hnai khan Uttar Pradesh-a Food Safety and Drug Administration (FDA) chuan Nestle India siam, Maggi Noodles chu 'lead content' leh ajinomoto a san lutuk avangin mihring tana him lo nia sawiin an hralh chhuah tawhte lakir leh turin a hriattir a ni. Him nia kan hriat kan thil eiahte hian hetiang thil sawi tur hi a awm zeuh zeuh a, packed food bikah chuan mithiam te'n an endik hnua kan tana him nia phalna an pek chauh kan ei ngam a hun ta hle.

Mizo siam kamram, pickle leh packed food hrang hrangte pawh hi mithiam te'n an endik hnua, hralh chhuah phalna pek loh tam tak a awm ang a, hemi kawngah hian hmasawnna tur kan la ngah hle.

Hetihlai hian packed food siama sumdawnna hi mi tam tak tan hna siamtu leh chhungkaw sum hnar a ni mek a, kan sorkar hian ruahmanna fel tak nei a, a hriselna leh a promotion lam bawhzui a nih chuan Mizoram aṭanga thawnchhuah khawp kan siam theih a rinawm.

Food and Drugs Standard Act, 2006 tlawhchhannin kan restaurant te pawh Health Department chuan license a pe ṭan tawh a, hei hi ei leh in thianghlimna kawngah kan ṭang­kaipui ngei beisei ila, Food Safety and Standards Authority lam pawhin packed food zawrh chhuahna lamah te hian khauh zawkin hma la thei se a duhawm hle.

Finna leh thiamna lamah hma kan sawn mek zel a, hemi rual hian kan ei leh in vawn thianghlim kawngah erawh Mizoram mai ni lo, India ram hi kan la hniam hle a, thu­neitute pawhin hei hi ngaihthah loin, cho­naah ngai rawh se.