Pu Ruatkima thusawi kha a mak thlâwt!

Mizoram sawrkara nihna sang tak lo chelh tawhtu Pu Lalruatkima, Cabinet Minister hial lo ni tawhin dan lova aikal lak khap leh, office hun chhung dik taka vawn a nih theihna tura sawrkar ding mek hmalakna a sawisel hi a mak thlâwt. Dan ang taka sawrkar kal a tumna sawisel a, dan lova thil tih a sawi mawi zawk hi a mak tak zet zet e.

November ni 18, 2024-a Mizo Hnam Run chhung inkhawma thusawitu Pu Lalruatkima, MNF Treasurer & Ex-Minister thusawi chungchang hi MNF Media & Publicity Department Secretary Malsawmpuia Ralte tih hminga press release-ah tarlan a ni a. Social media hrang hrangah ka lo hmu ve a, ka chhiar a, mak ka ti a, min ṭhâwng tak meuh a ni.

MNF press release-ah chuan heti hian Pu Lalruatkima thusawi tarlan a ni a, "ZPM sorkar chu sorkar hnathawkte nek cheptu, aikal lak khap, office ṭan hun leh ban hmaa chhuahsan phal lo leh an awmna chin hriat theihna app an hmang ṭan dawn. Sorkar hnathawkte an beidawng mek a, MNF sorkar leh hun an nghakhlel hle," tiin.

MNF sawrkar laia Minister pawimawh leh an chhuanvawr ber zinga mi, Pu Lalruatkima thusawi hi a mak ka ti ngang mai a. A rilru tak tak a sawi a nih phei chuan a mak lehzual tak meuh meuh. A chhan chu, sawrkar hnathawkte dan ang tak leh dik taka an kal theihna tura sawrkar hmalakna a sawisel a, dan bawhchhiaa sawrkar hnathawkte hun rei tak an lo kal tawh dan leh inthlahdul ṭhinna a ṭan zawk tlat a ni.

Mizoram Minister pawimawh lo ni tawh leh ram hruai la tum Pu Ruatkima rilru sûkthlêk hi a zialo tak zet zet. Hetiang rilru pute hi kan ram riang tê, nasa taka hmasawnna tur la nei Mizoram hruai tlakah kei chuan ka ngai lo. MLA inthlan hnuhnung berah MLA aṭanga mipuiin an paih ta pawh hi an tifuh ka ti ngei mai. Mipui thutlukna dik leh ṭha tak a ni tih ka hmu chhuak thar a, ka lawm ngei mai.

Aikal lak hi danin a phal lo. Hun rei tak chu dan lovin sawrkar hnathawk mi eng emaw zatin aikal an lo la tawh a, sawrkar hna a taka thawk miah si lovin sawrkar aṭangin thawh loh hlawh cheng tam tak an lo la tawh. Chutianga dan lova thil tih a tawp theih nan tuna sawrkarin hma a la a, aikal la pawh an awm tawh meuh lo niin a lang. A lawmawm tak zet a, mipui kan lawm tlang a ni.

Sawrkar hnathawk tam takin office hun chhung an vawn dik lohzia pawh kan hre ṭhin. Office ṭan hun aṭanga darkar 1 liam hnuahte office an thleng a, bân hun hmain an bâng ṭhin bawk. Sawrkar hnathawkte'n office hun dik taka an vawn theihna tura tuna sawrkarin hma a la hi a lawmawm a, a tih tur dik tak a ni.

Sawrkar hnathawkte dan ang taka an awm a, hna an thawh theihna tura sawrkarin discipline a kengkawh a nih pawhin thil tih dan tur dik tak zawk a ni tih; sawrkar hnathawkte pawhin an pawm tur a ni.

- Zoramchhana