Thlarau khawhar chawlhna hmun

He ka nun hi a ngui a, a khawhar fo ṭhin. Hnêmtu nei lo hian a vân ruai a, ruak huau chung hian a tâwt em em ṭhin si a nih hi. Khawharna hian a thlahthlam ngai lo va, lunglenna hian a phatsan ngai hek lo. Hmun lun lai berah a mal tlat a, hmun khawhar leh reh takah zalenna a nei fo. Suangtuahna hi a chakna a ni a, beiseina nen hma lam pan turin ke a pên ve fo ṭhin a ni.

Beiseina pawh nei thei tawh lo khawpa mite'n tluchhe tawh nia an rin laiin, beiseina nei turin a thinlungah êng de sêt sêt awmin a la hre tlat a, ngawi renga hma lam pan a, dîpdâltu awm lova mahnia kal duh chang a nei fo! Puipun leh huau huau hnuchhawn a, ram daia thing leh mau, kawr tuifim luang ri ker ker kara nun hman hi nuam a ti fo a, a vâk chhuak leh mai ṭhin. Tlang leh mual a thlir a, a nunkhua a har a, a lungleng a, hnemtu nei lo mah se, a vui lo; hnem chi a ni lo. A khawharna hi a lunglen hnemtu a ni a, a lunglen tawh chuan a chhungril nun a hlim tlat thung lawi si! Ṭahnain a kal kân bik erawh a ni lo.

Khawvel mite'n an beisei ang sum leh hausakna hi a thlir teh chiam lo a, nun khawchhuah nan erawh taimak chhuah hram a duh a, dâwngdah a tum bik chuang lo. Leiah ro chun leh khawm tur a nei lo tih a hriat avangin hnutchhiah leh tur pawh neiin a inhre lo. Hahdam taka nun a, thihna kut vâwt piah lama thlamuang taka chawlh chu a beisei ber a ni tawp mai a ni.

He hringnunah hian chhuan tur a nei lo va, chapopui tur a nei hek lo. Nunna chu Pathian kut a ni tih a hria a, chu Pathian kutah chuan a innghat tawp mai a ni. Beiseina êng lianpui a neih chu sum leh pai, ro thil a ni ve lo a, tangka leh rangkachaka chei chi pawh a ni hek lo; nunkhaw nawmna a ni tawp mai. Chutah chuan zalenna a awm a, îtsîkna a awm ve lo. Elrêl leh sawisel a awm ve lo a, inpâwngnêknain hmun a chang hek lo. Chu hmun chu khawiah nge a awm erawh a hre bik si lo; a zawng reng a ni.

Suangtuahnain hmânlai a thlir a, a lung a leng a, a hriat phak loh nunin a thinlung a luh chilh a. A ngaihtuahna hmangin kum sûl sang liamah a let a, a bo tulh tulh a, a chhungril nun a fiah tulh tulh thung. Hei lei tan hian finvarna tur ziah chhuah tur erawh a la ngaihtuah chhuak chuang rih lo!

Ropuina leh chawimawina a beisei ve lo, hun chu a ta a ni tih a hria a, a hun chu amahin a hmang mai a ni. Hla tak a thlir a, beiseina nen a um a, tluk leh tlak, chhuih leh bah a fâwm a. A kawng chu bumboh mah se, a phun ngai lo! Mipui phu mur mur zingah amah chauh chu 'mi nung' a ni!

A hnîm ruih a, a ngui nghiai a, mang ramah cheng nite'n a inhre rum rum ṭhin. Mahse, a rilru chu thlasik tukchhuak ang varin a fim lawi si! Tlang, phul rai nuam takah a kal fo a, chutah chuan zalenna a awm a beisei ṭhin, lungrualna tlang pawh a ni fâwm. Lung tohlâwt, inchher chhuan chungah chuan thuin a suangtuahna a kâwm fo a, a zêldinna a tinung ṭhin. Phai ruam chung ngaw bawh vela chhum râng kal delh delhte chu a thlir ning thei ngai lo. Chung boruak thiang takte chuan nunna thaw an pe a, chakna an siamsak âwl lo niin a hre tlat ṭhin. Mutê (sava) lo thlawk dîr nget ngette chu atan nun tinuamtu an ni a, a thawa chakna petu an ni. Sava hrâmte chuan a thluak an châwm lian a, rannung bawkvâka kalte chuan a tha an tichak ṭhin a, chu chuan Pathian hi a awm a ni tih a hriat chhuahtir fo ṭhin.

Luite tui fim, luang ri her her chuan a beng a fah fo a, rimawi tum thiamte angin hla mawi tak an saksak ṭhin. Thli thawin hnim hnah a chhem rik hlep hlepte chuan rimawi an rem a, vanrâng chhum ngawi renga leng delh delhte pawh khian thluk mawi tak neiin a hre ṭhin. Ngaw kar thing leh hrui zam lo parte chu a thlir ning ngai lo. Par zu tlan khuai leh phengphehlepte chuan hla mawi tak sain a hria a, a chhungrilah rimawi an tumsak ṭhin a ni.

Sava hrâm ri chel chulte chu a pawlte an ni a, a nun tihlimtu leh a suangtuahna tinungtu an ni reng ṭhin. Thing hnah sîn a ngainat ang bawkin, a hnah hrawte chu a hmuh hmaih mai ngai lo a, an mawina bâwmtu nungchate pawh a thlir ning ngai hek lo.

Khawpuiah

Khawpui chu khawl ri rum rum leh thir chher rîin a khat a, boruak thiang hip tur reng a awm ve lo. Khua a uap churh a, mipui tam tak chu an ngui nghiai a ni.

In chhawng sang tak taka mi fing tak tak te, office room ropui taka mi ropui tam takte chu an ro rup a, an nunah nun hlimna reng neiin a hre thei lo. Duhamna leh îtsîkna mit hlir an meng kual a, a dera nungin, a derin an dawhthei a; a dera ngaidamin, a der bawkin an infak ni ber hian a hre ṭhin! Hmui dawtheiin dâwtin bum tur an zawng a, dâwt a ni tih hre reng chunga duham leh verther avanga lo awih dertute chu an inlém tawn vel ni ber hian a hre ṭhin. Mi tinin duhthusam an sawi den den a, an duhthusam erawh a tak chang turin tha chhuah tak tak an tum lo niin a hre tlat thung si. Hmui dawthei an tam em em a, an lei an veng seng si lo. An duhthusam an sawite ûm zui tum si lovin, an leiin thup, lehkhapuanin thupna an dap a, an zain an buai zo ta a ni berin a hre ṭhin!

Mi pakhata pahnihte

A hmangaih ber chuan thîkthu awm miah lovin kuah vawng vawng se la, dam chhung atana dai tawh lo tur hmangaihna thu hlan se a duh a ni. Ri reh thawm chauh awmna hmunah, a mal chunga pawma hmangaihna biahthu hlan a duh chu a mitthla reng a, chu chuan a thinlungah phûrna a pe fo ṭhin. Dîm têin a fâwp a, tihnat a phal lo. Thinlung lairil aṭanga chhuak tuihnâng chu a thlum a, a tak a, a nghet bawk tih a chiang a ni.

Hringnun thawnthu mawi tak an sawi a, nun awmzia an zir thiam dun ṭhin. Harsatna paltlang turin tuarchhel zir dan an zir a, an thiam theih loh chu an bul vela nungchangte nunphung aṭangin an zir ṭhin a ni.

Zana khuangchiri khuangchawi leh vabak thir chher thawm, sihal û leh katkat hram ngaihnawm takte chuan an nunah tuihnâng a pe a, chumchi lo leng chuai chuaite chu an tan a mawi a ni. Vana arsi de sep septe khian an chhungril nun kil tinah ênna (hlimna) an pe ṭhin. Hrangchhuana leh Chawngmawii lo lang ṭhin hian hmangaihna thawnthu mawi a hrilh ṭhin a, thla êng paw riai maite hian leilung mawina a pho lanzia a hriattir fo.

Khâmrâng inchhawrdawh pet put kara thingzar beng bungte hi an tan chuan thil satliah a ni mai lo va, an thinlung tihlimtu leh an nun tinuamtu berte an ni.

Khawvelah beiseina an neih tawh loh hnuah pawh hlim takin beiseina thar an din dun ta a. Tuma tihbuai leh pawlh buai theih loh turin khawvel thar din turin rilru thar an siam ta a ni.

A suangtuahna hmun aṭang chuan a han har chhuak a, a tho hlawl a, khawilai thimtham zingah emaw dumdê-ah tal chan dante a awm mial lo maw, tiin, thimtham lam a pan a. Lunglen, khawharna hmunah chuan zalenna a zawng a, a vak ruk ruk a, nun khawhar leh ruak a ni tih a hrechhuak a, a chau leh ṭhin a ni.

I ânka nêm rêng ka tawng lo,

Hlim zai reng ka rel lo,

Puan ang min pawm thei si lo.

tiin a vàn leh ruai ṭhin si!

Chu hmun chu chawlhna atan beiseiin ‘Thlarau khawhar chawlhna hmun’ a vuah ta a. Nimahsela, nun hah leh chau chawlhna erawh he leiah hian a hmu chuang lo a, chawlh hlenna awmna van lam a thlir ta zawk a.

Pawi a thlen hun nghak suh u! 

- CVL Fakhlamawia