Ram chhana ṭang ngam tur
Tunlai kan ram nunphung ze tin han thlir ila, kan mithmuh leh beng hriat tinrengte'n min hril chu kan ram hi a dam ta lo a ni tih hi.
Politics hman sualna leh hlemhletna avangin hmasawnna a kal fuh thei lo a, sum leh pai chan dan rual loh em avangin retheihna a thukin, hausate nen kan inkar a zau tawh hle mai. Lungawi lohna rum ri a ringin, rethei au âw a thangkhawk ring ta hle mai bawk.
Sakeibakneiin rumin a sa seh a zawng ang mai hian mahni hlawkna leh hamṭhatna turah an huamhap a, chutiang ringawt ngaihtuahin an hmanhlel a, ram mipui vantlang ṭhat tlanna tur an ngaihtuah hman mawlh lo.
Chuvang tak chuan dan leh thupek kenkawh lamah an hlawhchham a, ruk ruk , inrawk, tualthah, pawngsual, hlemhletnate hluarin retheihna a nasa ta em em a ni. Ngun takin ngaihtuah ila, kan ram nun nen a va inang awm ve aw!
Lal leh thuneitute sawisela tawng tawng ṭhin mipuite pawh an lo ṭha bik awzawng lo mai. Mahni hma zawn leh theihna chin ṭheuhah chuan mi dik an awm mang reng reng lo. Duham vanga mi rawk ching etc. zelthel tak, kut tling loa hlawk hreh lo an ni deuh vek mai. An sawisel ṭhin hotute ai mahin an ṭha lo zawk a ni awm e.
Eg: vai dawr suasam, BPL inhlawhfak leh NREGS hmanga inhlawhfak nia kan mizia te hi inen let ta ila.
Aw! He'ngte hlei hlei hi kan ram darthlalang a ni mai lo maw? Ram chhung mai ni lo, ram pawna hnam dang mite thleng thlengin min rawn vei a, he'ng nunphung sualna avanga Pathian thinurna kan hmabak hlauhawmzia min au khum awl lo a nih tak ber hi!
He'ng zawng zawng karah hian kan ram hi a chhiat hlen loh nana chhan tuma daitheuva Lalpa hmaa ṭang ngam tur Lalpa'n a zawng mek a, kan zingah a hmu zo lo ve mai ang tih ava hlauhawm em!
Ram chhana ṭang ngam turin eng nge pawimawh le? Nehemia chu persia lal hnuaia ram awptu, dinhmun sang takah a ding a. An ram, an hnam leh sakhaw nun innghahna Jerusalem tlu chhe tawh din thar a, tungding lehtu a ni.
A hmaa lal leh thuneitute chu, mipuite chungah an inti lalin an hautak hle. An ṭhuihrualte thlengin an inluling nasa. Mipuite tan phurrit tak an lo ni ṭhin. Tunlaia kan lal leh thuneitu, VIP ho chet vel dan nen a inang hle lo maw?
Politics hmanga kan thlan lal leh an thuihruaiho khawsazia a nih duh hmel mang e aw! An demawm lo e, an thuneihna a ni a, duh tawkin an invaivung thei alawm!
Engpawh nise Pathian ṭih tlat vanga sual haw ngam, tlansan ngamte chauhin ram chhiat loh nan dai theuin, Lalpa hmaah dingin ram chhanin an ṭang ngam dawn a ni.