Aizawla hawi thawven ve deuh nan

SBI Main Branch bula Mahatma Gandhi lim dahna ṭhin siamṭhat mek laia UDPA-in coffee dawr tur ni awm tak an sak chu Aizawl Hmathlir Pawl (?) khan Aizawl chêp tawh tak karah hawi thawvenna a tichep a, thaw a tipik zual tih avangin ṭhiat leh tura an ngen angin sawrkar pawhin a ṭhiat leh ta niin kan lo hria a. A va lawmawm em.

Hetiang thil ho tê anga lang, mahse, a hnua veng, khua leh ram pum tana hnawksak leh min tihreawmtu hi hmuh tur hmun tam takah vawi tam tak kan lo siam tawh a, mit a tikham em em ṭhin. Miin an siam puitlin tawh chuan tihbo leh theih a ni tawh ngai ṭhin si lo. Chuvangin, nakina kan tana ṭha lo tur hmu thiam a, ngaihven a, thil ṭha zawk tur leh ṭha lo zawk tur ngaihtuah rân chunga a hun lai taka hma la a, bawhzui chat chattu, ram hmangaihtu dik tak pawl kan nei hi a va hlu em.

Sawrkarin emaw, eng pawlin emaw, mimalin emaw, mi dang tana tunah leh nakina pawi tur leh ṭha lo tur, la hnawksak tura hma an lak mek lai emaw, an tihpuitlin hnu emawte hi hmu rengin hrethiam reng mah ila, mi tam tak hi chuan a taka dodaltua ṭang duh si lo hian kan phun kan phun a, sâwt hlei lo hian kan sawisel reng a. Mahse, a taka dodaltu leh hma latu, sawrkar leh vantlang hriat tura puangzartu nih chu kan duh si lo; mi dang tih atan kan dah tlat ṭhin. Hetiang kan nih avang hian keimahni nasa taka intichêp leh intithawpik, intihreawm lutuk tawh kan ni.

Kan kawng leh khawlaite hi zau nuam tak leh thawveng tak ni se kan ti ṭheuh; chutiang lam hawi chuan thu kan sawi ṭhin a, mi dangte kan zirtir ṭhin. Mahse, mahni tana hma kan lak chiah chuan mi dang kan ngaihtuah tel tawh lo. Tu tan mah hmun âwl leh nuam leh thawveng kan pe phal leh chuang ngai miah lo!

Aizawl khawilaiah pawh hian mimal ram ni chiah lo, hmun âwl deuh awm apiang chu kawng tihzauh nawm deuh nan emaw, motor inpelh nan emaw, thil hlânthlak nan emaw, hawi thawven nan emaw, zunram thiar nan emaw, ṭhut chawlh nan emaw pawh hmang phal lovin, khawtlang hruaitute leh eng pawl pawl emawte hian rem lo chung chung pawhin, chuhhelh takin in kan sa thawt thawt ṭhin. Hetiang vanga kan intihhreawm tam tawhzia leh hmun tina mit tikhamtu tam tawhzia hi. Hetiang tih kan chin ṭan tirh lam khan tu pawisawi mah hlau lovin ka lo aupui chiam tawh ṭhin; Aizawl traffic jam tihziaawm dan tur inziahsiakah pawh ka sawi chiam kha. Mahse, a sâwt lo.

Aizawl Hmathlir Pawl khan tlai deuh tawh mah se, huai takin hma han la zel ang che u aw. In lamah kan ṭang zel ang. Tuna in hmalakna leh in thute sawrkarin a lo zahsak che u avanga sawlai hmun an ṭhiat leh pawh saw a lawmawm em em a, sawrkar chungah pawh lawmthu ka sawi e. Thil dang zelah pawh sawrkar ka beiseina a tisang hle a ni.

Nimahsela, sawlaia in kha chu an thiat nâ a, a thlang lam pang brick hmanga an rem saw a la sang lutuk. Ni 20.11.2024 khan ka kal a, gate lo siamtu vai mistiri kha measuring tape ka dil a, a lo kawl si lo, ka mit leh taksain ka the a, ft. thum leh a chanve aiin a la sang mah a. A chunga thir an dah zing lutuk nen, thlang lam a la hmuh that theih chuang miah loh. A hun lai hian hmalak leh ni se, tuna an tih dan aia thawvengin tih leh ni se a lawmawm hle ang.

- K. Hmingthankaia