KRISTIANNA LEH ZU

Kristianna mit aṭanga zu kan thlir hian kan fak thei lo a, engtik lai mai pawhin sual lian tak ang hiala kan ngaih a ni ber a, a sawi mawi lam phei chu kan thei lo hrim hrim a nih hi. Nimahsela, zu hi heti tak hian haw mah ila, sawi chhe mah ila, kan zingah a awm reng tho a, a in mite chuan in tur an hmu thei reng tho si. Kan do dan leh kan beih let dan hi a nep deuh nge, a dik tawk lo ni ang tih pawh hi ngaihtuah tham tak a ni awm e.

Pathian thuah zu chungchang fiah taka inziahna kan hmu nual a. Gen. 19:32-35 thuah Nova fate’n Nova chu zua an hrai ruih thu leh a zu rui chu an mutpui thu kan hmu a. A fanu upa zawk leh naupang zawkte chuan zan hnih lai an pa Nova chu hrai ruia an mutpui thu kan hmu a ni. Numbers 6:3, Roreltute 13:4, Rom 14:21, Ephesi 5:18, Thufingte 20:1, Thufingte 23:20 leh Bible chang dang tam takah zu ṭhat loh zia kan hmu a. Chutih rual chuan, zu hi ringtu ṭha tak tak awmna ramah hian a rêm hauh chuang lo. Kohhran rawngbawltute ngei ngei pawh hi zu lak ata an filim vek bik chuang hauh lo a, in ve zauh zauh ṭhin kan la awm zel bawk nen hian, engtiang chiahin nge zu hi do tur ni a, engtiang chiaha ngaih tur nge ni ang tih hi ngaihtuah ngai tak a ni.

KRISTIAN SAKHUAIN ZU A THLIR DAN CHI THUM

Moderationism: Ringtu hmasate leh kohhran puipate chuan zu hi chuti taka haw loin, Bible-ah ngei pawh kan hmuin a tawka hman theih a ni tih hi an lo pawm dàn tlàngpui a ni a. Kum 1800 chhùng zet kha chu ringtute'n he ngaihdàn hi an lo pawm tawh a ni.

Moderationism-ah chuan, 'Kan nun dàn leh thil tihah tàwk chin neih hi Bible-in min zirtir dàn a ni' tih a ni. He thlirna aṭang chuan Bible-a kan hmuh aṭang leh tradition aṭang paw'n Pathian thilpek zinga mi a ni a; Lalpa Zànriah leh rilru tizangkhai nan ṭha taka hman ṭhin a ni. A ṭhat lohna lai tam tak awm mah se, khap bur emaw, hnawl hmak emaw lovin, fing tak leh changkang tak, a tàwk tè (moderately)-a hman theih a ni an ti. He ngaihdàn pawmtu kohhran langsar zual ṭhenkhatte chu – Roman Catholic, Eastern Orthodox, Anglicans, Protestant (Lutherans leh Reformed Church ho, Presbyterians, adt) a ni a; anni bakah hian Martin Luther-a leh John Calvin-a te pawhin hetianga ngaihdan hi an pawm bawk.

Abstentionism: He ngaihdan neitu aṭanga thlirtu chuan, 'Zu hi sual a ni ngawt lo a, zu in pawh sual a ni hran lo; mahse, hman sual theih leh chhiatpui theih a nih avangin in loh mai a himin a finthlàk ber a ni,' an ti thung.

Abstentionist zinga a tam berte chuan zu in loh tawp hi ṭha ti hle mah se, kohhran member ni turin zu in loh hmak nih kher a ngai lo a, kohhran hruaitu leh rawngbàwltu erawh chu fihlim ngei tùrin an duh thung. Bible hian zu hman sual a duh loh vàng te, ringtu chak lo zawkte hmakhua a ngaih avàngte leh vàntlàng mithmuhah fel leh entawn tlàk an nih theih na'n fihlim se an duh zawk a. He ngaihdàn pawmtu kohhran ṭhenkhatte chu–Baptist kohhran hrang hrang, Pentecostal-ho te, Methodist-te leh Salvation Army-te an ni. Billy Graham te, John F. McArthur te, R. Albert Mohler Jr. te leh John Piper te hian he ngaihdàn hi an pawm bawk.

Prohibitionism: Khap bur duhna neitute thlirna aṭang chuan, 'Zu in chu sawi loh, zu hrim hrim hi sual a ni' tih a ni tawp thung. Zu khap burna leh dàn hmanga khap beh hi an duhthusam a ni. He ngaihdan pawmtute zinga a filawr zualte phei chuan Bible-a zu lannate pawh thai bo hial duhte pawh an awm.

Prohibitionist zinga ṭhenkhatte chuan, 'Zu a awm loh chuan tàn in pawh a awm a ṭul kher lo ang' an ti hial a! Prohibitionist hi USA leh ram ṭhenkhatte'n prohibition an hlawhchhampui hnu khan thlawptu an tlem phah hle a ni. He ngaihdàn thlawptu kohhran ṭhenkhatte chu – Evangelical kohhran ṭhenkhatte leh Fundamentalist kohhran ṭhenkhatte bakah, Southern Baptist, Seventh Day Adventist, The Church of Jesus, Christ of Latter–Day Saints (Mormon) te an ni.

Hetiang a nih vang hian keini Mizo Kristiante zingah pawh ngaihdan a phir theiin a rinawm. Kohhran lian ber Presbyterian Kohhran chuan a doin an do a, hei vang hian kohhran dangte pawh chuan ngaihdan dang neiin thawm hran lo nei mah se la, kohhran lian ber ngaihdan chu kaltlangpui a ni thoa hriat a ni. Mizoram Liquor Prohibition and Control Bill, 2014 chu July 10, 2014 (Thursday)-a sorkarin a han pass lehah pawh khan kohhran lam chuan thawm neiin an dodal nasa hle mai a, kawngpui dung leh khawpui chhung hmun hrang hrangahte pawh thuziak chi hrang hrang an tar a nih kha.

Nimahsela, kohhran hian heti takin zu hi ngaina lo mah se la, kan khawtlangah leh chhungkaw tin deuhthawhah hian zu avanga harsatna hi a thleng âwl chuang si lo. Zu avanga buaipui ngai hi a awm reng tho si avang hian zu hi duh loin haw hle mah ila, kan do na tawk lo em ni ang a tih theih. Kan sorkar thar hi chuan ngaihdan a la siam lo nâin, zu khapna dan hi ennawn an tum ni awm takin thawm a awm a; zu khapna hi thlahdul deuh emaw, hlih emaw pawh a ni mai thei e.

Kohhran ngei pawh hian heti taka zu kan duh lo chungin a inte chunga hremna leh thununna lekkawh hi a awm hriat a ni lo a, zu ruite chungah chauh hremna kan thlen em ni tih tur a ni a. Hei vang hian zu in ringawt chu sualah kan ngai lo a, zu ruih tak hi sual a lo ni ber awm e. Social media lamah phei chuan wine shop awm lai ai khan a awm loh hnuah hian zu zuar an tam zawk lawng maw, tih thute an sawi rik avang hian kohhrante ngei pawh hi kan inngaihtuah nawn a ngai awm e. Heti taka zu a zalen a, hmun tina in tur a awm reng a, zu vanga kan khawtlanga harsatna a awm reng fo hi thlir liam mai mai loa a tihremna tur leh a bo theihna tura theihtawp chhuah tlan a hun viauin a hriat a ni.

Nge ni, chutiang ni loin, zu in mite pawhin zalen taka an in theihna turin kan thlah zalen law law zawk ang a, zu in dan thiam a, khawtlangah harsatna leh buaina a thlen lohna turin tih dan ṭha zawk kan kawhhmuhin zirtirna kan pe dawn ni ang? Ngawi renga thlir ringawt chu a hun tawh lo viauin a hriat. Heti taka hmun tin maia zu a zalen leh ta viau mai hi kohhran lamte pawh hian kan thlir liam mai chu a ṭha lo ang. Kristianna nena inhne rem theiin kan hre lo a, sawi pawlh theia kan ngaih lohna avangin leh heti tak hian kan do chu a ni bawk si a. Chuvangin, pulpit tlang aṭang ringawt lo deuha ruahmanna dang deuh kan ngaihtuah chhuah chu a hun viau tawhin a lang a ni.

- Mahmuaka Chhakchhuak