Forest department inenfiah a hun
Mizoramah chuan Environment & Forest department hi a lian pawl tak an ni a, an hmalakna pawh a huam zau hle. Hetih lai hian an thil man sa bo reng mai hi chu inenfiah an ngai tawh hle a ni.
November 17,2014 Vanglaini chhuakah khan Environment & Forest department chuan kum 2009 aṭanga October 2014 thlengin ram pawna hralh ruk tur Red Sanders (Pterocarpus santalinus) tum (log) 2,687 an man tawh a, mahse chung zinga tum 1,839 (68.44%) chu E&F department hriat lohin an dahṭhatna aṭanga lâk bo a nih thu a lo lang a.
Hetah hian a mawhphurtu man a ni tawh em? Cheng tam tak man, thilruk awlai lo tur, rit ṭha tak leh lian tak tak mai awlsam taka rukbo a ni leh si hi a mak. Thil tawlhruk thiam tak tak ten fimkhur taka ramri an kanpui tur department in an mansak theih laia an kudam aṭanga rukbo a nih leh si hi inenfiah an ngai hle a ni. An fimkhur loh dan en hi chuan hralhruk tum tu an man te nen khan angkhat renga hrem tlak an niin ka hria.
Tunhnai May 26 Vanglaini chhuakah khan Kolasib-a E & F department-in saphu kâwr an man sa, store room-a an dahṭhat sai-ip 10 chu rûkbo a ni tih May 24, 2015 a hriatchhuah anih thu a lo lang leh a. Police ten an endiknaah sai-ip chhunga Saphu káwr, kg. 279-a rit chu rûk a ni tih an hmuchhuak a ni. Saphu kâwr dahna ipah chuan saphu káwr lem, plastic hmanga siam an dah thung a ni tih a ni.
Thil man khawmsa, a lem mai maia thleng theih khawpa inenkawlna fello hi a vang khawp ang.
Engvangin nge khatiang a thlen theih? E&F a thawktu ṭhenkhatte hi kudam hrang hranga thil ruchhuak tur hian rukhmang te nen an inthurual a ni thei angem? An enfiah a hun hle a ni.
Kan Chief Minister ni mek hian khuallian anihna a thusawi pakhat chu, 'Thingtlang khaw pakhatah chuan ramngaw an nei ṭha hle a. An humhalh ṭhat vangin lawmawm ka tih thu leh venhim anih zel theih nan a ṭul anga puitu turin E&F department te pawh an khuaah dah ṭha ka tih thu ka sawi a. Mahse an khaw hotute chuan "Ka pu, lo dah lo hram rawh, kan ramngaw min tihchereu sak vek ang" tiin min chhang a' a ti.
Hetianga mi tam takin department hmel an hmuh lai hian anmahni kuta thil awmsa hi chu mipuiin an laka rinna kan hloh hma hian venghim se a duhawm hle, ṭan lak thar an ngai a ni.