Pu Ruatkima thusawi kha chu a

MNF treasurer leh cabinet minister lai lo ni tawh Pu Lalruatkima chuan Mizo Hnam Run-ah ZPM sorkar beiin, Aikal lak te, sorkar hnathawk punctuality tura ruahmanna a siam thar a sawisel kha chu a sawi awm loh tak niin a lang. Minister hlui meuhin sorkar hnathawk a fuihpawrh zawnga a sawi kha chu a awm lo ngawt mai.

Mizoram sorkar hnathawk zingah chhan leh vang awm mang loa Aikal la an tam em em mai; ZPM sorkarin a rawn bituk ngat mai kha a ṭh viau a, mipui pawhin kan thlawp hle a ni. Amah CM Pu Duhoma sawi dan takah, Aikal la zingah la lo thei lo, natna benvawn nei, la pension si loten Aikal an lak chu ngaihhnathiam theih a ni tih a lo sawi tawh a; chutiang chuan sorkar pawh a kal ngei reng a ni.

Aikal la ṭhenkhat chu an hlawh lakna ngaihsak miah loa sumdawnsan ta lawp lawp pawh sawi tur an awm a, hna dang thawk thei tho siin sorkar sum ei reng chungah hna dang an thawh kha phal miah lo a ni tih he sorkar tharah hian a chiang hle a ni. Sorkar hna hi lehkha thiam leh thiam lo pawhin kan duh vek a, ṭhalaiten hna an zawn huai huai laia Aikal lo lak chu a chi pawh a chi lo reng reng a ni.

Pu Ruatkima'n Aikal lak tihtawp a sawisel kha sorkar hnathawk fuihpawrhna dik lo tak a ni. Cabinet minister lo ni tawh meuh, party liana treasurer ni ngat khan sawisel tur a hre lo a nih paw'n, ngawih mai awm tak a ni. A fuihpawrh dan kha a ṭhing ngawt mai. Sorkar hnathawk tam tak pawhin an en hniam phah ngei a rinawm.

Sorkar hnathawk hun vawng dik tura hmalakna thar a awm pawh a sawisel a, hei pawh hi a sawitu aṭang hian ngaihdan chintawk chu mipui hian kan nei ṭheuh awm e. Sorkar hnathawk ber a hun taka office an thlen a, a hun taka an ban hian sorkar tan mai ni lo, mipui tan tak hian a ṭhat tehlul nen. Pu Ruatkima bawkin a sawisel leh si hi a awm hian a awm lo ngawt mai. Sorkarna han chelh leh se ram ropui min thlen ngut loh tur chi a ni.

Politics-ah chuan insawisel leh inbeihna a awm teh meuh mai. Mahse sorkar inrelbawlna hrechiang ber turin a han sawisel mauh mai hi chu a dik hian a dik thei thlawt lo. Sorkar hnathawkte a hmangaih vang a ni lo a, ZPM sorkar a sawisel duh ve hrim hrim niin a lang. Mipui mimir pawhin a thusawi khan a mawlmang kan ti hle a ni.

Sawi tawh ang khian Minister meuh ni tawh sawiah chuan a sawi tur hriat loh thlak a, a mawng a hlim a ni ngawt mai. Sawi tur hriat loh chuan politics pangngai ram tana ṭha tur lam sawi tawh zawk se a inhmeh zawk ngei ang.

- Lalsiakmawia