AW, A VA MAWI EM!

Chung Pathianin heti em ema mawi leh lunglen veng vengna zûn phur sia a duang thiam hi a mak a ni! Aw, a va mawi tak em, sik ni eng mawi leh nuam lo her chhuak ṭhin zet chu.

Han hawi vel teh, thlasik lai khaw nawmzia hi; van dumpawl ruai hnuaiah boruak nuam dangdai tak mai chuan tirîlah min ṭhâm chiai chiai a, sawi hlei theih loh hian lunglenna zûn zâmin min zem chiai chiai mai bawk si a. Nun hlui lamah min hruai kir delh delh a, chutih rualin, hma lam boruak eng mawi takah min thlawh luhpui thung si a ni. A, ka sawi thiam lo, Krismas leh kumthar nghakhlel em em siin lunglenna zûnin min phuar bawk si a ni ber e. Ngaih ber hriat si loh hian lunglengin kan thâm vel chiai chiai mai a ni.

Zingah han tho ila, thophang han tih chei chuai awm loin kan harh vâk mai a, keimahniah phurna ruk tak kan nei a, kan thla hi a muang veng veng mai a ni. Khua a thiangin, thlirna lam apiang a mawi a, tlang tin leh mual tin chu a thiang fai kûk vek mai a. Luipui dungte chu ṭiauchhum var hluk mai chuan a chîm hmuk mai a. Van lamah chuan khawi lai laiah emaw chuan chhum hmuh tur a awm a nih khi. Zing ni chhuakin tlang leh mual a chhun mawizia chu sawi chhuah dan pawh ka thiam lo. Aw, a va mawi tak em, he thlasik ni eng zet chu; thilsiam tinrengte tan lawmna ni a êng e.

Changpatte pawh lei hnuai aṭanga lo chhuakin kawngpuiah hmuh tur an tam em em a, taksa insawizawi a hmei a pain an kal sup sup a, sipai lam pawh a huhoin an tlan ṭhup ṭhup mai. Dai velah chuan tlangsam leh japan-hlo par a var vo mai a, nihawi suak par lah chu serthlum rah hmin ang maiin a par eng-sen tuar bawk a, khawi maw laiah chuan hnah sen parte pawh hmuh tur a awm. Hrui zam chi par pawl riai leh par sente chu an zam chêk bawk a. Hmun ṭhenkhatah chuan tlaiberh, vasuih leh ṭhumi hrâm chiah chiah hriat tur a awm a, liando-se-hnawt sava thlawk zuk zuk hmuh tur a awm bawk. Ngaihtuahna vâk velin thinlai mu hnu kaihthawh tumin a rawn kik dawt dawt a ni ber e.

Engvangin nge Mizote tan he hun nuam leh mawi tak hi a hlut em em kan tih chuan, kut hnathawka ei zawng hnam kan nih vang a ni, kan ti thei awm e. Mizorama kut hnathawktute tana nuam leh hlimawm ber mai chu buh chil leh buh vuak ni hi a ni. Ṭhenrual ṭha leh chhungkhat lainate nena arpui tui lai talh meuha buh kan han vua a, kan han chil ni tluka nuam a awm chuang dawn em ni? A tlem emaw, a tam emaw, kan kut hnathawh rah chi hrang hrangte seng khawm lai a ni a. Buh lak tawhna hnuah chuan derhken leh zamzo vul chiai maite chu an langsarin an mawi dangdai em em mai a ni.

Han hawi vel ila, hmarcha rah hmin sen tiar mai leh chhawhchi kung te, bething zâm ngulte chu hmuh hmaih chi a ni lo. Heti hian chul ram an chang chho mek chu a ni si a aw… Kumtluana ram ṭuan kan relna mual leh tlangte chu nghilh a va har dawn em, ti raw? Ṭhiani, i sawi thui lo mai teh ang aw. En teh, chul ram chang mai tura thing tuluang ṭha deuhte hi Krismas thing phurh huna kan phurh turin i hual lâwk tawh zawk mai ang aw. Keini’n rauhsan mah ila, laiking leh laitelte chuan an la thlahlelin rauhsan a la tum loh tawp hi, thing bul sang deuhah ni lum an la ai larh larh a lawm. Sazu pawhin an kuaah ei tur an la chhek lut ṭûn ṭûn hi. Zanah pawh buh pâwl hnuai lum inchuhin sazute chu an chîk ṭêt ṭêt tho dawn alawm. Keini zawngin Bethlehem tlang lamah rinnain i thlawhsan zawk mai teh ang.

Dawrkaite tan hlei hlei hian asin thlasik hun lo thleng hi lawmawm ṭhin chu. Furpui ruahsur reng avanga an dawr bungrua lo theng ṭha thei lo chu thlasik khaw tuihul lai chuan a lo theng zut zut mai a, zin veivak pawh an tam lai a nih avangin an dawr pawh a lûn thei hle a nih hi. He hun hi an tan chuan hun rangkachak a ni ringawt a lawm. Sawrkar hnathawk leh sikul naupangte pawhin fûr laia khawchhe chung chunga office leh sikul kai ngai si, nihliap khum chunga anmahni in lum aṭanga an chhuak ṭhinte kha i la hria em? He thlasik boruak nuam takah hi chuan ruah leh ni sa tibuaitu awm loin engthawl takin an kal thei si a. Chuvangin, a va mawi tak em, he thlasik hun lawmawn tawite hi. Mi tam takin an hmuh phak loh laiin keini chuan kan han hmu leh thei a ni a, kan vannei hle a ni. Nang chhiartu duh tak, he thlasik ni ên chhung hian a mawizia leh a nawmzia hriain hlim takin, i tana nau lo piang fakin zai veng veng mai rawh le.

Zan dai fîm far ri fep fep karah tapchhak zawla meilum kan han ai baka nuam a awm chuang dawn em ni? Leng haw ar phei chu khuang lo phei se la, mut nachang pawh kan hre nang ti raw? Ṭhianpa, pawnah han chhuak ila, arsi pe un mai leh thlasik kawng paw chêk mai thlir chungin, "Kum sûl lâm ang a lo her chang hian, sik ni eng mawi a lo lang leh ta," tiin zai vang vang mai ang aw. Chu, veng lehlam mualah pawh ṭhalai rual an carol a ni ngei ang, "Kumpui sûl a lo vei chângin lunglen a tho leh ṭhin," an tih tuar tuar chu; mi eng zat tak thinlung mu hnu kai tho ang maw? “Awmlai vei leh lusûn fate chan tawk hi dawn ve teh,” an han tih meuh chuan, mahni khum laizawla mittui hru an tam dawn mang e. A dik a ni, par ang kan lawm tlan lai takte kha aw, tunah i awm tawh si lo a maw, tiin khum laizawlah an let tawn sek mai dawn a nih hi. Ran thleng chunga nausen Isua mu kha rinnain hmuhtir lo phei se la chu, mahni inkhawngaihin he hun nuam leh mawi tak hi ṭap chungin an hmang liam mai dawn asin.

Kum khata hunpui kan neih zingah hian eng hun hi nge nuam i tih ber tiin inzawt ta vek ila, thlasik hun hi tia chhang an tam ber lo ang maw? Kohhran tan lah hunpui Krismas leh kumthar lo thleng tur avangin inpuahchahna a kal mup mup a, inkhawm an ṭhain an hlim em em a. Naupangte lah chu Krismas kawr thar an neih avangin an hlim hun lai tak a ni a; ‘Hnung lama sa barh’ ang maiin, dawhthlak an han hmu meuh chu an hlim lutuk an râk chêl chûl mai ṭhin a nih hi.

Krismas leh kumthar ruaiṭhehte hlei hlei hi asin he thlasik tinuamtu chu. Hmun hran hrana awm kan chhung leh khatte leh ṭhiante lo haw khawm lai a lo ni bawk nen, a va nuamin a va hlimawm tak em. He thlasik ni eng zet chu, aw, a mawizia ka sawi thiam lo, heng ang hun nuam leh mawi tak mai min siamsaktu Pathian chu fakin awm rawh se.

- Hausanga Hauzel