Ṭawngṭai laia ‘Lalpa’ tih chhen hi
Pathian hnena ṭawngṭai hi a pawimawh em em. Engkim chunga thuneitu, nunna min petu, malsawmna min petu, min enkawltu, chakna leh theihna zawng zawng min petu Pathian kan biakna a ni. Chuvangin, ṭawngṭai hi kan uluk tur a ni a, kan ti tak tur a ni a, ṭawngkam pawh kan uluk tur a ni.
Mi ṭhenkhat mi zinga an ṭawngṭai a, ‘Lalpa’ an ti chhen mai ṭhin mi eng emaw zat an awm. Kan ṭawngṭai laia ‘Lalpa’ tih zin lutuk hi insûm deuh a ṭha em? Ṭawngṭai kar lakah ‘Lalpa’ tih zûr zut mai hian ngaithlatu beng a tikham ve thei tlat nia! ‘Lalpa’ tih sawi tam zual ṭhin deuhte phei chu ṭawngṭai lo ngaithlatute’n maimitchhing chungin ‘Lalpa’ an tih zat an lo chhiar ṭhin a ni âwm asin!
Ṭawngṭai bul ṭanna leh a tawpah ‘Lalpa’ tih hi a tâwk fu mai. Sentence hnih/khat lek kar dana ‘Lalpa’ tih chhen hi ninawm lamah a kal ve thei tih hriat a ṭha. Chutihrualin, ‘Lalpa’ tihna hun remchang bik erawh a awm thei tho ve bawk.
Kan ṭawngṭaia ‘Lalpa’ tih zûr zut lo tur hian inven theih a ni a, pumpelh theih a ni. Mi kan bia a, an hmingin kan koh sek ngai lo a, ko sek ta ila, kan mi biaka leh lo hre vetu mi dang tan a ninawm ngawt ang. Kan Pathian hi khawi kipa awm a ni a, kan bulah a awm reng; kan bula awm reng chu ṭawngṭaiin kan be ṭhin a ni. Chuvangin, ṭawngṭaia Pathian kan biakin ‘Lalpa’ tih chhên a ṭul lem lo a ni.
Heng kan sawi avang hian kan ṭawngṭai laia ‘Lalpa’ tih chhên hi a ṭha lo tihna a ni lo a, tih loh tawp tur a ni, tihna pawh a ni lo. Mi ṭhenkhat chuan ṭawngṭai vawi khatah pawh koh mawlh mawlh mai an duh pawh a ni thei tho àwm e; mahse, chutiang rilru put vang pawh ni lo, chíng laklawh, ti dawklak ve hrim hrim hi a tam zawk mah an ni mai thei!
Mi reng reng hi ṭawngkam kan thiam dan a inchen lo a; mi ṭhenkhat chu ṭawngkam thiam tak, ṭawngṭai pawh ṭawngkam dak thlarha ti thei tam tak an awm. Chutih lain, ṭawngkam thiam lo na lailêng, ṭawng bah em em mai tam tak an awm a; ṭawngkam thiam loh tawh nâk alaiin, ṭawngṭai phei chuan danglamna tak a nei a, mi zinga ṭawngṭai ngat phei chu tam tak tan chuan thil harsa a tling thei. Chu’ngte hre reng chung chuan rilrua awm ka’n sawi hrâm a ni e.
- Kezo