Zoram kohhrana harsatna kan tawh mêk

Mi tam takin an sawi, mahse, a chhan chhui zui peih awm meuh si lo, mêna kan thlak liam mêk Zoram kohhrana harsatna lo thleng mek hi i han thlir dawn teh ang. Kan ram anga thu sawi tamna, thu ṭha tak tak leh nunga thu hril ṭhin rawngbawltu tamna ram hi, ram dang hriat tur a tam lutuk lo mai thei. Mahse, thu sawi kan ngaihthlak tam berte'n kan nunah sâwtna, danglamna an thlen thei si lo. Hei hi kan harsatna, kohhran tinin kan tawh mêk chu a ni.

Ezekiela, Pathian zawlnei leh a rawngbawltu chungchang thuah he thu hi kan hmu a. Ezekiela 33:32 kan en chuan, "Tin, ngaiteh, nang chu an tan chuan hmangaihna hla, mawi taka sak leh tum ang i ni ang: i thute chu an ngaithla a, mahse, an zawm chuang lo vang," tih thu hi. Ezekiela hi Israel mite'n a thu sawi ngaithla châka an pan hum hum ang bawkin, Zoram kohhrante pawhin Pathian mi hman nia kan hriat tawh phawtte chu an thu sawi ngaithla turin kan pan peih a nih hi.

Heng Pathian thu ngaithlatu tam zawkte nihna erawh kan hmu fiah lo fo. "Tin, a hlawp hlawpin i hnenah an lo kal ang a, ka mite ang maiin i hmaah an ṭhu ang a, i thu an ngaithla ang a, mahse, an zawm chuang lo vang: an kâin hmangaihna nasa tak an tilang ang a, an thinlung erawh chuan hlêpna lam a pan ang," (Ezekiela 33:31) tih thu hi kan nihna a ni tlat a ni. Kan ṭawngkam mai chuan hmangaihna fahrin kan ni ngei a, kan thil tih aṭanga kan nihna erawh, thluaka sum lut natna vei deuh hlir, duhamna fa chuam kan ni lawi si a ni.

Kohhran pawh thlarau lama ṭhan len aiin, tisa thilah kan tlan nasa ta em em a. Khawvel thilah kan hausain kan nei nung tial tial a, kan thlarau nun erawh a khawro tulh tulh thung si. Tin, hun hnuhnungah kan chen tawh avangin, hun hnuhnunga thil lo thleng ngei turte chuan min uap khup tawh bawk. Chung zinga thil lo thleng pakhat hmangin, kan hmaah dârthlalang i han hûng dawn teh reng ang. Amosa 8:11-ah chuan, "Lalpa PATHIAN thu chhuak chuan, Ngai teh u, nite chu a lo thleng mek a ni; chung ni-ahte chuan ramah chuan ṭâm ka tir ang a, chaw ṭâmna ni lovin, LALPA thu hriatna ṭâmna zâwk chu," tiin min hrilh.

Tunah hian mite hriatpui loha thlaraua rilṭâm ngawih ngawihna nun neitu kan ramah hian an tam hle. Kal chhuakin Pathian thu an va ngaithla a, mahse, an nunin a thlamuanpui zo tlat si lo, an nunah danglamna a thleng thei lo. "Lalpa thu chu zawng turin kil tinah an tlan ang a, an hmu lo ang," tih hi Pathian thu hrilh lâwk a ni tlat a ni. Eng vang nge ni ta ang? Lal Isua tana inpumpek nun, a duh ang taka kan ni tin hun Pathian tana pe phal, kan eizawnnaah leh ni tin khawsaknaah kan awm tak tak lo tlat a ni. Simna nun thleng phâka fianriala kan thu ngaihthlak ṭhin te, kan nunah nunga a thawh theihna tura tisa taka Pathian buan peih kan tlem pharh a nih hi!

Hun hnuhnunga mihring mizia lo lang tur II Timotheaa kan hmuhte zinga mi kha kan ramah hian kan tam ta hle bawk. Mahni inhmangaihtu, tangka ngainatu, ṭha duh hauh lo, insûm thei lo leh mi chapote an lo chhuak ta sup sup a, thlaraua kan saltânna pawh a thûkin a nghet tulh tulh bawk. Chuti maia vawi hnih khat thu sawi ṭha leh nung ngaihthlaka chhanchhuahna leh siam thar lehna chan mai mai a harsa tawh tlat a. Hun khirh tak, lo thleng ngei tura chuan min nanchin tak miau vang a ni.

Hman angin camping kal tlanga awlsam taka piantharna leh siamtharna chan theih a ni tawh lo. Jakoba anga fianriala mahnia chauha Pathian buan peih lo chuan nun danglam an nei thei tawh bawk hek lo. Tun huna Pathian mi kan tihte hi chutianga Pathian tana inserh hranga bungbel thianghlim ni tura invawngte an ni tawh tlat. Pathian ngaihsak lote lahin a der pawhin Pathian an ngaihsak peih tawh bawk hek lo. "Hun hnuhnungah chuan mi tam takin rinna an la tlûksan ang tih Thlarauin chiang takin a sawi," tih thu kan hmu bawk.

Hengte avang hian thuhril rawngbawlna leh tihdam rawngbawlna ropui tak tak kan ramah hian la thleng reng mah se, kan ringtu nun dazât tak, rinawm bawk si lohna hi ṭhiahin a awm tak tak thei ta lo niin a lang. Kohhran chu rualpâwlna hmun, fashion show platform pakhat, khawvela kan thuam mawi leh neihnunna kan lantirna hmun berah a chang ta mek bawk. A tawp berah chuan Zoram ringtu tam zawkte nihna chu hei hi a ni.

Kan kohhran mi em em vek a; mahse, kohhran neitupa Lal Isua hmelhriata hre chiangtu erawh kan tlem em em thung! Lal Isua nena inzawmna neih aiin kan nunin kohhran a zawm thûk zawk a, Lal Isua tilawm nun neih aiin kohhran lawmna siam turin kan thawk rim zawk ṭhin. Kohhran zia, inlâk mi tak, inlâk puithu leh zahawm tuma kan thawh rim peih laiin, Lal Isua an tum kawngah erawh kan thâwm chu thlanmual ang maiin a reh si nih hi!

- Lalremliana Pachuau