MP Pu Vena thusawi leh a behbawm
Kan Rajya Sabha MP Pu K Vanlalvena chet ṭhin dan hi a 'Mizo pa' riau a, Mizo mipui tam tak duh chi a ni a, kei pawhin a ruk tak chuan ka lo ṭan ru ve ṭhin!
Kum 2022 khan a ni tain ka hria, ramri chungchanga kan buai chiam ṭum, kan police-te'n Assam police-a mi panga paruk lai an kah hlum ṭum kha, kan MP Pu Vena hian Delhi-a media hmaa a interview-naah 'An rawn kal leh chuan kan lo chimit vek ang' a ti riap mai a. Kha a thil sawi kha kan ram tan hian a ṭha zawngin a thawk nge, a chhe zawngin a thawk tih chu ka hre hauh lo, mahse, Mizo pa tam takin 'pa' an tih chi a ni. Mi ṭhenkhatin atthlak an tih laiin, ṭhenkhat chuan ṭha an ti viau thung.
Pu K Vanlalvena hian tun Pathianni (November 24) pawh khan New Delhi-a All Parliamentary Leaders Meeting-ah Manipur tualchhung buaina tihtawpna atan Manipur state chu President's Rule-a dah ṭul a tih thu a sawi leh riap mai a ni awm e.
Pu Vena'n Manipur state chungchang MP rual hmaa a sawi hi a danglam khawp mai a. MP dangte nena official meeting pawimawh em em mai, Central-a hotu lawk tak tak–Defence Minister Pu Rajnat Singh, Rajya Sabha Leader Pu JP Nanda leh Parliamentary Affairs Minister Pu Kiren Rijiju te telnaa kan Mizoram MP-in Manipur state chungchang leh an state sawrkar leh mipui thin tirim thei hial tura ngaih a sawi hi mi ṭhenkhat chuan ṭha an ti viauin a rinawm a, âtthlak ti pawh an awm nual bawk awm e.
Kan MP Pu Vena hi ram leh hnam hmangaihtu tak niin a lang a, ram chhan pawh a tina ve viau niin a hriat. Vaupûng a'n tina ṭhinte pawh hi a ṭha a, a awm tâwk chinah chuan ti zel rawh se. Chutih rualin, fimkhurna erawh hloh lo se. A ṭawng hmain a thil sawi tur chuan Mizoram leh hnamah eng nge a nghawng theih, ram leh hnam tan a ṭha zawk dawn nge, a ṭha lo zawk dawn, tihte uluk takin ngaihtuah hmasa ṭhin turin ka chah ve a ni.
A tawpkhawkah chuan politician tan chuan politics-a hlawkpui khawp thusawi leh chet a pawimawh a, chu chu an tum ber pakhat a ni ṭhin. Pu Vena thil sawi ṭhinte leh a ṭawngkam hmante hi Mizo tam takin 'pa' tiin, ṭan viau ṭhin mah se, ram hruaitu ṭhaah an ngaih phah chuang lo a ni ve thei tho mai. A chhan chu–nikum 2023-a MLA inthlanpuiah an thlang tling duh chuang lo a, kumin 2024-a Lok Sabha MP inthlanpuiah pawh an thlang tling duh chuang lo bawk.
Engpawhnise, mi state buainaah hian aw lo chhuah dan tawk leh inrawlh dan tawk hriat a ngai hlein a rinawm. Vaupûng tina taka ṭawng chhuah a ṭulna chin a awm thei a, insum a ṭul chin pawh a awm ang. Ram hruaitu pawimawhte hian fimkhur takin, sawi awm tawk leh sawi tur chin fim takin ngaihtuah chiang hmasa se ṭhin a ṭha awm e.
- Lalduhmawia