Khua/veng inelna football hi
Tunlai hian MFA buatsaihin inter village football tournament khel mek a ni. Tun hma, kan hriat ve hma aṭangin Mizoram pum huap emaw, district huap emaw football tournament a awm tawh ṭhin. Naupan lai aṭanga football tuipui ve ta chu, inkhel en rual kan nih aṭangin inkhel kan en ve fo ṭhin–tun thlengin.
Inter village tournament vawi tam tak a awm tawh. Hun eng emaw ti aṭang khan chet ṭhat leh champion duh lutukna avangin mahni khua/veng mi ni miahte khua leh veng ṭhenkhatin khelhtir an ching a, a bikin Aizawla veng ṭhenkhatte'n an ching zual. Veng mi ni lo player ṭha lak ching zualte chu local football tuipuitute chuan in hriat vek kha. Hei hian Aizawl pawn lam pawh a kâng kai zel a, thingtlang khaw ṭhenkhat pawhin an ching chho tawh.
Hengte avang hian Aizawl bikah chuan football thiam veng dik tak hriat theih a ni tawh lo a, tun hmaa football thiam veng kan tih ṭhinte kha tunah chuan an ni thei meuh tawh lo. Football thiam veng aiin, football player ṭha la khawm thei veng an langsar zawk tawh tlat!
Hman deuh aṭanga ka duhthusam ni ve fo chu–football thiam khua/veng dik tak hriat leh theih hi a ni. Chutiang tur chuan inter village football tournament-ah hian veng mi dik tak chauh khelhtir phal a ngai. Tuna inter village tournament awm mekah hian voter ID neihna khua/veng tan chauh khelh phal an tih khan ka lo lawm ve hle. Mahse, voter ID neihna khua/veng an tel loh chuan khua/veng dang tan khelh an phal ta tho si. Ka duhthusam chu a ni leh ta lo.
Inter village football tournament a awm leh dawn hunah chuan mahni khua leh veng mi dik tak chauh khelhtir phal, khua/veng danga mi player lak hrim hrim phal loh ti tawh se ka ti ngawt mai. Mahni khua/veng mi dik tak chauh khelhtir phal ni se, player ṭha tute emaw chu an khua/veng an tel loh chuan tournament an khel ve thei lo tihna a ni mai ang a; a 'fair' ngawt ang. Football thiam khua/veng dik tak kan hre thei leh tawh ang.
A hrim hrimah, mahni khua/veng mi ni lo khelhtir vak vak hi khua/vengin eng nge maw a hlâwkpuina le? Khua/veng hmingṭhat nan ti a, veng pawn lam mi player lak vanga champion-te hian an hmingṭhatpui chiah em? Khua/veng dang mi player ṭha an lak vanga champion an ni tih mipuiin an hre tho a, an ngaisang chuang lo. Miin an ngaihsan loh champion nih hi hmingṭhatna a ni chiah em?
Mahni veng mi ni miah lo khelhtir chingte'n hei hi lo ngaihtuah tel se: In veng mi ni lo in khelhtir khan in veng mi, in veng hminga football khelh châk ve tak takte'n an khelh theih loh phah a, rilru na takin in siam thei, tih hi.
In veng mi dik tak, in veng tlangval kha in vengin chhiat in tawh chânga che ṭhin, mitthi lumennaa kal ṭhin, thlân lai ṭhin, thlân vûr ṭhin, veng tana hnatlang ṭhin an ni. In veng mi ni lo in lakte kha in vengin chhiat in tawhin an rawn lang kher lo ang; mitthi lumennaah an kal lo ang a, thlân an lai lo ang a, thlân an vûr lo ang a, in veng tan an hnatlang kher hek lo ang. In veng tan eng nge hnemhnânpuina awm le?
- Zothana Khiangte, Local football lover