A hua hua chu an ni mai

Teaching line-ah kum 10 emaw lek pawh la thawk lo mi eng emaw zatin ngamtlak vang leh School Education Department nuthûri zuam vang emaw leh thil dang vangtein Education Department kum 40 zet chu sawisela chirhtheh zawngin thu an ziak ṭhin. Duhsakna, siamṭhatna, fuihna lam aiin kamchhe tleuh nan an hmang ta mai emaw tih khawpin an thu leh hla pawh a hriam thei hle. Minister incharge, Directorate staff, district, sub-division staff-te bakah, institution hrang hranga thawkte hian hmasawn leh fak tlaka thawh chu ṭha an tiin an tum ber a nih avangin an thlavang hauh zawng leh fuih ṭang zawngin thu fahrah te te ka ziak ve fo a, a chang phei chuan anmahni demna lam pawh ka zep tel zeuh ṭhin. Zirtirtute lah hian Aizawl/khawpuia awm hi an tum vek mai si a... tih phei hi chu a dik lo. School-ah leh office-a ka thawh ve lai khan thingtlanga zirtirtu hna thawk zingah Aizawl/ khawpuia transfer duh hlek lo an tamin ka hre ṭeuh mai, transfer dil leh beiseite aiin an tam zawk daih.

Thupui kan tarlan ang hian, institution-a thawkte’n huatah lo la lo se la, duhthawhna avangin dengkhawng deuhva ngaih theihte pawhin pehhêl vak lovin han sawi ila, a hua hua chuan mahni inenfiaha insiamṭhat nan hman ka duh e.

PRIMARY LEH MIDDLE SCHOOL

Teacher indaih loh sawi luai luai laiin headmaster (promotee) tam tak chu subject pawimawh bitum ahnekin head nihna changchawiin class an la peih lo nia! A zia lo va, a zahthlak mang e. Teacher-te lahin period neih tam an hlau ngawih ngawih a, pelhê an ching hle.

Elementary stage-ah hian B.Ed. ka training kum tiam lovin kum 10 ka thawk a, ka thiam bik lem loh English ka bitum tluan ṭhak. Indaih loh changin class hnih kawp chang ka nei ṭhin a, kum khat phei chu ka ṭhiante an thlawn vek avangin September–November chhungin class IV-VI keimahin ka thawk tluan ve. Middle school (MESLC) board exam lai hun khan kan naupangte an fail ve ngai lo. Mizoram topper, top ten, top twenty kan nei thei. (Ka chanchin hian zelthelte fuih rawh se). Kan result ṭha ziah kha ringhlelin MESTA hruaitute’n DIS-ah min hêk vel maw le! Sub-Inspector of Schools (SIS) Pu K Biaktluanga (RIP) kha kan centre-ah officer in-charge (superintendent kan tih tak hi) hna thawkin rawn dah a ni (kei chu Gauhati-ah MA class chhimin ka zin bo daih – 1976). Hemi kum hian candidate 18-te 1st division-ah, a dang 5-te 2nd division-ah, 100% an pass. Ka hmuna O/C thawk khan Zion Street Tea Stall-ah thingpui leh chhang min khilai a, “A hêk vei che a, in school result a ṭha hle si a, an hek ropui che,” min ti. Ka ṭhiante nena kumtluana kan thawhrimna kha Lalpa;n mal min sawm a ni.

Primary school-te’n indaih loh vanga zirna (academic standard) hniam ta leh student hmu zo lova an insawi hi thil awihawm loh tawp a ni. Pawl A, B leh I-III kha putar class VI pass-in single teacher-in min ho va, PSLC (board) exam chu 1st division -ah kan pass thei tho. Primary school-ah chuan class hnih/thum kawpin a harsa lo ve, thawhrim leh taimak a ni ber. Mahni naupangte hmangaih leh duhsak hi tunlai teacher-te hian an nei peih ngang lo a ni zawk. School ṭha din se la, student chu an hip ṭeuh mai ang chu. Free textbook, free uniform, mid-day meal-te hi nu leh pate’n thlahlel mah se, zirna chhia chu harsa tak chungin an tlansan ṭhin. Medium of instructuion vang ngawt a ni lo ve. Teacher-te’n naupang an hip zo lo a ni zawk. “As the teachers, so is the school” tih hi kan pian hma aṭanga vawiin thlenga thu dik a ni si a.

HIGH SCHOOL

CCE (elementary stage-ah) kan kalpui ta, hlawhtling taka kalpui theih nan Monitoring Cell rintlak din a ṭul e, tiin vawi duai lo au chhuahpui mah ila, tun thlengin kan la nei lo; kalphung thar sorkarah hian beisei ila. CCE hmanga eng mah thiam nei lova an rawn thawn chhoh avangin class IX & X-ah enkawl ṭhat theih a ni lo ve tih chu H/S teacher tam berte’n chhuanlam atana an hman a ni. Class VIII pass-te chuan ‘Shape’ mumal an nei emaw nei lo emaw, an thiam lohte lo thiamtir a, an nih loh nihtir chu an duty liau liau a ni.

Headmaster-ah promote an han ni ve hlawl mai a, eng subject teacher mah ni lova office-a ṭhut mai mai kha an nihnain a ken tel niin zu ngai tlat hlawm a! Teaching hrim hrim hi nuam tihna leh hlimpuina an lo nei ngai lo a ni ngei ang. High school stage hi class VII–X kan neih lai aṭanga vawiin thlengin medium of instruction chu English a ni (Mizo subject tel lovin). Teacher zahve (50%) pawh hian English-in class teaching an la thei lo, ngam lo zu nia! An student-te English-ah hmasawn ngaihna a awm lo. Headmaster ka nih laiin non-Mizo 4/5-te’n an hmang ṭhin tih loh chu English hmang ka hmu tlem hle. Headmaster ho lahin subject chanpual an nei peih si lo. Thiam lo chungin mahni inzir reng chungin kum 25 chhung H/S headmaster hna ka thawh ve khan English subject ka bitum tluan zak a, peih se la chuan tuna kan headmaster-te hi kei aia thiam zawk an tam ang, mahse, peih hek lo le.

Headmaster tan office work buaipui tak tak tham a awm lo va, kar khata period 10-12 lak ve chu an hman em em. Indaih deuh chuan period 8 lek lain supervision uar se la. Headmaster ni ve vung siin supervision nei ngam lo te, teachers log book checking/inspection nei ngam lote an tam mai (hei hi zawng anmahni thawhrimna leh inpeknate’n a phu ngang lo a ni mai).

Teacher pakhatin kar khat chhunga period 10 aia tlem nei an tam viaute hian indaih an nihzia a sawifiah hle, period 16-20 neih hi hahthlak a ni lo ve. Class la tura muang hle si a, period tawp hmaa chhuak leh daihte hi chu corrupted teacher an ni. Mahni period theihnghilh theite pawh zu awm a! Routine en miah lo pawha week day-tea kan period neih hun chu hre ngei tur kan ni. First period neih hreh tlatte’n last period neihtir an hlau lehnghal!

HIGHER SECONDARY

Education Commission 1964-1966 (Kothari Commission tia kan hriat lar) khan Pre-degree course kum hnih PUC tih ṭhin kha HSS-ah class XI & XII-a transfer tura a recommend daih tawh chu keini state chuan kum 30-naah, kum 1996 khan kan ṭan ve ṭawk a. Master degree holder-te’n an daih ṭha lo va, a dil apiangte appoint zel an ni mai.

Chutiang pawh ni se la, master degree neite chu mi puitling leh thiam turah ngaih an ni. Mizo subject lovah chuan medium of Instruction-ah English ngei ngei tur a ni a, heti chungin 60% lai chuan English-in teaching an pe thei lo, pe ngam lo tlat asin ! Engati nge? Engvang nge? Tih luihtir a ṭha ang em? Tih luihtir ila, an mualpho mai ang em? Principal hna ka chelh laiin 70% tal chu hmang ila, tiin meeting-ah appeal ka siam a, ka colleague-te’n min hnial lem lo. Mahse, supervision ka neih ṭhin khan an room bula ka kal laiin English han hmang ṭhin mah se, ka kal sawn hnuin translation method an kalpui tih ka hria. An thiam lo ni lovin, zirlaite an hrilhfiah tâwk lovah an inngai em ni aw, ka ti ṭhin.

PGT (post graduate teacher) an nih lai leh lecturer tia an hming thlak a nih hnu thlengin school ṭan hnua mahni period nang tawk leka school thlen ching leh class neih tawh loh vanga working hour tawp hmaa eng emaw excuse siama haw hma dil ni tin kan tawng ṭhin; a ṭhen phei chu a rûka lo haw daih pawh an awm. College lecturer (tunah professor) tih dan an thîk nia rinna kan nei a, school kan nih an hai der emaw tih mai tur a ni. Professor-te pawhin UGC norm angin college an ṭhut chilh lo nasa e.

Stage hrang hrangah felhlel awmte kan tarlang ta nual a, heng stage hrangahte hian higher secondary stage hi an ziaawm deuh ber em aw, tih theih a ni a; mahse, anni pawh hian hmasawnna tur tam tak an la nei. Principal zingah lecturer-te’n log book maintain tura la introduce ngam lo emaw, quarterly inspection pawh nei thei lo leh ngam lo an awm a ni awm e. Class teaching laia internal supervision nei hlei thei lo principal pawh kan nei nual hi a ṭha lo. Friendly, motivating & encouraging taka supervision neih hi lecturer tan leh student tan a ṭha hle a ni.

Thupui ngaihno bei lem lo neiin, a contents pawhin my fellow teacher-te lawm zawng a keng lo a ni thei e. Service hun tawp ka hmanna office lam hawiin remchangah thupui pangngai lam hawia ziak ka tum. Institution/school-ah rural & urban-ah hun tam ber hmangin, office dawr ṭhintu zinga ka awm hun lai leh office-ah ṭhu vea school aṭanga min rawn dawr ṭhintea ka tawnhriat leh ka hmuhte’n min hmuak zut zut mai.

- JH Biakmawia