Krismas pualin ti tlâwm ve tawh ila
Thlasik a inṭan a, mut a nuam leh ta hle mai a, zing lamah pawh thawh a har leh ta ṭalh mai. Ni, Kristiante hunpui Krismas a hnai ta a, masi kawr mawi lei pawh a hun chho leh ṭan dawn ta.
Ṭum khat chu kum 20 dawn lai kal taah khan Krismas hma deuhin Aizawl bazarah hian pheikhawk lei ka tum ve a. Dawr pakhatah chuan pheikhawk ka duh zawng tak ka hmu a, lei ka'n tum deuh uau uau a, mahse, to ka tih deuh ngang avangin ka lei ta lo. Mahse, ka duh deuh ngang si a, Krismas zawhah ka va en leh ngat a, Krismas deuha a man an chhiar aia tlawm daih a lo ni tawh a, ka lei ta hmak mai asin le!
Mizo sumdawngte'n Krismas dawn, Mizo mipui tam takin thil chi hrang hrang an lei uar hun laiin thil an ti to sawt ṭhin a, a bik takin mi tam takin masi thawmhnaw, masi kawr mawi neih ngei an duh ṭhin avangin thawmnhnaw a tozia sawi a ni ṭhin. Chutih laiin, vai ho chuan an hunpui puja laiin thil man an titlawm zawk hlauh ṭhin tihte sawi a ni ṭhin bawk.
Mizo pawh, vai ho pawh, kan hunpui lai hi kan pawk hun lai a ni ṭheuh mai a. Vai hoin puja lai leh a dawn hnaiah thil chi hrang hrang lei an uar a, Mizote pawhin kan hunpui ber Krismas dawnah thil lei kan uar ve thung a, chumi tur chuan chhungkaw tam tak chu an inkhawl ṭâng ṭâng ṭhin a nih hi. Kan inan lohna langsar tak erawh chu, vai ho chuan an hunpuiah thil man an titlawm ṭhin a, Mizote erawh chuan kan tito zawk hlauh thung.
Puja lai hi India ramah chuan sumdawngte inhralh tam lai a ni a, mipuite'n an sum neih ang anga thil thar lei an tum hun lai a ni. Mipuiin thil an lei tam hun lai chu sumdawngte leh company-te pawhin inhralh tam hunah hman an lo tum ve rân a, an hralh tam theih nan an thil neihte hun dang zawng aiin an titlawm ṭhin. Puja hun laia thil a tlawm ṭhin avangin, puja ve ngai lem lo Mizote pawhin Puja Discount ka lo châng ve ṭhup ṭhin a nih. Online hmanga thil chah dawn pawhin, mi tam tak chuan puja discount kan bawh hle a nih hi. Puja lai na nâ nâ hi chuan vai company-te leh sumdawngte'n an thil neihte an intihtlawmsiak a ni ber mai! A zo a vai tan malsawmna a ni.
Vai ho sumdawn dan h Mizo tam takte sumdawn dan nen chuan a inletling thawk a ni ber mai. Vai hoin an hunpui puja-ah thil an intihtlawmsiak laiin, Mizote erawh chuan kan hunpui Krismas dawnah hun dang zawng aiin thil kan tito sawt zawk ṭhin zu nia! Kristian, mi dangte tana malsawmna ni tura inzirtir ṭhin Mizo Kristiante hian kan hunpui, min chhandamtu pian champha lawm tura kan inbuatsaihnaa thil man kan tito sauh ṭhin hi chu a mak ngawt mai!
Mizorama nu leh pa tam ber chuan Krismas dawnah an fate thawmhnaw thar leisak ngei an tum a, chu chu remchangah lain, lei lo thei lo emaw, lei ngei ngei duh emaw an nih avangin kan sumdawngte hian an thil zawrhte an tito sauh ta ṭhin niin a lang.
Mizoramah hian, a bikin thingtlangah khawsak harsa tak tak chhungkua an la tam mai a, chu'ng mite chuan an fate masi kawr mawi leisak ve ngei an duh a. Mi eng emaw zat phei chuan pûk chawpte pawhin fate tan masi kawr mawi an leisak ṭhin awm e. Chutiang a nih laia kan sumdawng tam takin thil man an lo tihto khum sauh ṭhin hi chu, an khawngaihthlak ṭhin teh e.
Sumdawng, khawsak nuam zawk leh hausa zawkte hi mi rethei zawkte dinhmun hi an hriatthiam a va ṭul em. Chhandamtu pian champha pual hian Krista rilru pu in, an thil zawrhte hi han titlawm ve zawk hlauh se, mi dangte tan malsawmna thlentu an ni ngei ang.
- Zoramchhana