MBSE-in mark a ren em?

Tunhnaiah Mizo­ram Board of School Education-in HSSLC result a tichuak a, Full mark 100-ah Science Topper - 460 (92%), Commerce Topper - 437 (87.4%) leh Arts Topper - 423 (84.6%) te hi an mark percen­tage hmuh dan a ni.

Tunhnaiah CBSE in HSSLC result ti­chhuak ve lehin sub­ject zawng zawng khaikhawma mark hmu sang ber M Gayatri - New Green Fields school, New Delhi chuan 99.2 % hmu in CBSE topper a ni. Top three a langphak dangte mark score pawh a tlem lo - 99% a ni. CBSE hnuaia HSSLC zirlai pass percentage hi 82% a nih laiin MBSE hnuaia HSSLC pass percentage chu 74.53% a ni thung.

CBSE hnuai leh MBSE hnuaia top ten te mark percentage chhut hian ka rilru a lo lut chu kan Mizo nau­pang te hian lehkha an thiam lo ve hrim hrim nge phai naupang te hian lehkha an thiam zawk? Nge ni a zirtirna an dawn hi a in ṭhat hleih a, zirtirtute an inṭhat hleih viau zawk? Nge ni a CBSE in ren miah lo a mark a pek laiin MBSE hian a ren leh lutuk zawk? Heng zawhna zawng zawng te hi chhan ṭul tak tuna chhanna kan neih mai si loh a ni.

Kan Mizo naupang te'n harsatna an tawh fo ṭhin chu pawl 12 an pass zawh hnu lawka phai college ṭha a luh an tum hian a ni. A bik takin India ram khawpui ber Delhi-a College ṭha te'n an college lut tur tana mark hmuh ngai chin an ruahman hi a sang thei em em a, kan mizo naupang te'n an phu ang tawk college ṭha an hmuh loh phah fo.

Tunah a la ni em ka hre lo a, hman deuh Mizoramin mahni puala University kan neih hma khan NEHU mark ren zia kha an sawi ṭhin a, mark hmu tam tur chuan hmun dang pan a ṭhat zawk thu an sawi ṭhin. A dik a ni maithei, khatih hunlai NEHU hnuaia second division-a pass leh hmun ṭhenkhata first zuk ni nawlh nawlh-ah khan second division vela NEHU aṭanga pass kha an chhawr tlak zawk ṭhin - tiin an sawi.

Vawiina kan nau te harsatna pawh hi MBSE hian a ngaih­thah loh a pawimawh takzet a ni. Mark an ren em a ni tia sawi dawt theih nilo mahse hmun danga an HSSLC top­per te leh kan topper neih ve te mark hmuh zat han khaikhin hian 'ren zawng an ren deuh em ni aw' tih hi ngaih­tuahnaah a lo lut ṭhin.

Kan nau ṭhenkhat zingah India hmun dang private school-a sum tam tak senga lut ka hre ve nual, Mizorama school an kal laia lehkha thiam thei tia sawi tur ni lem lo kha an HSSLC result a chhuah meuh chuan kan HSSLC top ten a langphak ṭhenkhat aia mark hmu sang zawk sawi tur pawh an awm nawk. Zirtirna ṭha an dawn thut vanga hmasawn duai an nih ka ring lem lo.

MBSE hnuaia HSSLC pass ṭhenkhat chu vanneihthlak taka Delhi college ṭha zuk chang hlauh, phai naupang mark hmu sang tak tak aia college-a zuk ti ṭha leh lawi si sawi tur te pawh an awm.

Engpawhnise, tun ang renga kan nau te'n HSSLC-a mark an hmuh zat hi a hniam reng a nih chuan, a tuar­tu tur chu kan naute chauh ni lo in Mizo hnam hi kan ni. Chu chu i theihnghilh lo ang u.