Inenfiah kan ngai vek e

Traffic SP chuan tun hnai lawk khan thupek kan ti dawn nge, hriattirna kan ti dawn, December ni 9, 2024 aṭangin Aizawlah Aizawl traffic police-te'n No Tolerance Drive an kalpui dawn thu a puang a. Hei vang hian motor document nei felfai lote chu an phu leh ta suau mai niin a lang.

Thupek an chhuahah chuan, No Tolerance Drive chu lirthei kaihhnawih dan bawhchhiatna hrang hrang vanga vanduaina thleng thei venna atan a nih thu an ziak a. Motor khalhtute chu dan zawm a, fimkhur taka lirthei khalh tur leh motor document felfai tak nei turin an chah nghal a ni.

Traffic Police-te'n No Tolerance Drive an nei tur hi a ṭha ka ti hle. Ka duhthusamah phei chuan kum tluanin No Tolerance Drive kalpui se ka ti.

Lirthei neitute i inenfiah ang u. Dan ang taka thuneitute kal an tum leh an kal apianga kan buai phili ṭhin hi a dik lo. Khauh zawnga dan kenkawh an tum chang chauha motor document hrang hrang neih felfai kan tum a, motor endik a nih loh laia dan zawm kan tum lo a nih chuan kan dik lo tihna a ni. Kohhran velah a kul a taia inhmang leh Pathian ringtu ṭha ni awm takin lang mah ila, khua leh tui ṭha kan ni lo tih i hria ang u. Ṭha taka dan zawm hi khua leh tui ṭha tih tur a ni.

Sawrkar lam pawh an inenfiah hle a ngai. Sawrkarin motor tam tak a nei a, chung sawrkar motor-te chuan dan an zawm kim bik reng em? Ka ring lo. Sawrkar motor, tuna tlan chhuak mek ṭhin zawng zawngah hian insurance an tih vek ka ring lo va, pollution free certificate an neih vek ka ring miah lo. Motor chungchanga dan kenkawh tumtu, No Tolerance Drive kalpui tumtu Traffic Police-te leh Police Department hrim hrim pawh, an motor zawng zawng hi dan zawm kim veka an enkawl ka ring hek lo. Thil hre tak sawi ka hriat chu–sawrkar motor leh Police motor zingah dan zawm kim lo a tam thu a ni.

Traffic Police-te hian No Tolerance Drive kalpuia motor-te an endik dawn a nih chuan an mimal motor-te leh sawrkar department motor zawng zawng pawh an endik vek ka beisei a, ka phût bawk. Sawrkar motor endik tel duh si lo a, private motor leh commercial vehicle-te chauh an endik a nih chuan thil dik lo hulhual a ni ang. Hleih nei taka chetna leh sawrkara an thuneihna hmansualna a ni ang.

Kan ram hi dan lalna ram a nih dawn chuan motor kaihhnawih dante a nihna ang taka kenkawh a ṭul. Dan hi hun bik neia kenkawh tur a ni lo va, englai pawha kenkawh tur a ni. Mipuiin dan ang takin motor kan nei em, dan ang takin motor-te kan khalh chhuak em tih hi eng drive drive-ah emaw chauh kenkawh tur a ni lo a, hun bik nei lovin, englai pawhin an kengkawh tur a ni. Chumi tur chuan an ṭang ve tur a ni a; chutiang taka hna thawk tur chuan hlawh ṭha tawk tak an nei bawk.

Sawrkar, Police leh mipuite hian inenfiah kan ngai vek e.

- TL Rinpuia