BIBLE SUNDAY PUAL

Bible Sunday/Bible Sabbath 2024 chu kan lo thleng leh dawn ta; he ni pawimawh tak pual hian kohhranhote chibai ka buk a che u.

Bible Sunday/Sabbath hi Bible avanga Pathian hnêna lâwmthu sawina hun, Bible hlutzia sawi tharna hun, Bible thehdarh kawnga infuih tharna hun leh Bible Society rawngbâwlna atana thilpek lâk khâwmna hun atante hman ṭhin a ni.

Mizoram Presbyterian Kohhran Assembly chuan kum 1944 khan Bible Society tana thawhlâwm ni bik atan ‘Pentikos champhaphâk nî’ a lo ruat tawh a. Synod Standing Committee chuan Assam Christian Council rawtna zûlzuiin December 4, 1956 chu ‘Bible Society Ni’ atana hman turin a rel leh a, Bible Society pualin thawhlâwm pawh lâk khâwm a ni. Kum 1964 Synod Inkhawmpui chuan ‘December Chawlhni hmasa ber’ hi Bible Society pual ni bik atana hman ṭhin tawh turin a rêl leh ta a ni.

Mizoram Baptist Kohhran pawhin a tir phat aṭanga he nî hi hmang ve nghâlin, kum 2007 thleng khan ‘Bible Society Sunday’ tih a ni ṭhin a, kum 2008 aṭangin ‘Bible Sunday’ tiin an hmang chho ta. Hetiang hian Mizorama kohhran/corps-te chuan Bible Sunday/Sabbath hi lungrual takin kan hmang tlâng ta zêl a ni.

Bible lehlin hna

Bible Society of India (BSI) thil tum bulpuite zinga mi chu mi zawng zawng hnêna anmahni ṭawng ngeia Bible pêk a ni a. A din tirh aṭanga kum 213 chhûng (1811-2024) hian BSI chuan hei hi hna puiah neihin a thawk chhunzawm reng a ni.

Bible lehlin hna hi a hautak hle a, a ṭawng bulte zir chiang zel chunga mi thiamte’n uluk theihtawpa an chinleh fe hnua tichhuak tur chuan hun pawh a duh rei hle. Mizo Bible hmasa ber kha kum 1895 vela lehlin ṭan a nih aṭanga 1959-a Bible bu pum kan neih tak thleng khan a karah kum 64 zet a tla a ni. A kar zau deuh chhan hi chawl lova lehlin hna a kal reng loh vangte leh hmanraw ṭha a la awm tawk loh vangte pawh a ni ang. Tun hma chuan Thuthlung Thar chauh letling tur hian kum 20/30 a ngai ṭhin reng a ni. BSI hian a thar hlaka Bible lehlin hun bituk a siam chu Thuthlung Thar kum 5-8, Thuthlung Hlui kum 8-12 vel a ni a; hemi huna zawh hman loh tam tak a awm bawk. Hmanruate lo ṭha ta zel mah se, chhiar theih tura Bible khawr pum vek nan hian kum 25 vel tal chu a ngai ang.

United Bible Societies (UBS)-in kum 20 chhunga ṭawng 1,200-a Bible lehlinna tur senso ngai zat a tarlan chu US dollar maktaduai 500 a ni a, hei hi India pawisa chuan cheng tluklehdingawn 41 chuang a ni. Heta ṭanga chhut chuan Bible pakhat lehlinna atana an hisap hi cheng nuai 348 chuang a ni. Dinhmun azirin hei aia hniam deuh tak pawha tih theihna a awm erawh a rinawm a, India-ah chuan nuai 80 vel bawrin a zawh theih mai thei e. Mizo Revised Version kan thawh mek hi Bible awm sa vek tawh behchhana thawh mai a ni tawh nâ a, kum nga chhunga senso hi paper leh thil dang neuh neuh chhut tel loh pawhin cheng nuai 50 zet chu a ni ang.

Bible Translation Roadmap 2036

India ramah hian ṭawng chi hrang 1,652 awma chhinchhiah a ni a; chûng zînga ṭawng 85 chuan Bible lehlin tawh niin, ṭawng 88-in Thuthlung Thar lehlin a ni tawh. Tunah hian lehlin hna chi hrang hrang (project) 107 lai kalpui mêk a ni. Kohhranhote inpêkna azârah tangka kum kal ta 2022-23 chhûng khan BSI chuan Bible copy maktaduai 2.5 zet chhûin, copy maktaduai 6.4 zet a sem chhuak bawk a, a ropui tak zet a ni.

Kum 2036-ah hian BSI chuan kum 225 a tling dawn a, he hun a lo thlen huna India ram ṭawng chi hrang hrang 225-a Bible lehlin hman tumin Bible Translation Roadmap 2036 tih chu a ruahman a ni. Bible awm sa enṭhat leh ennawn hna bakah, mahni ṭawnga Bible la nei ngai lote ngai pawimawh lehzual tura theihtawp chhuah tum a ni a, kum 12 chhungin Bible la nei ngai lo ṭawng 21-a Bible lehlin tum a ni. He hnâ hi hautak hlein lang mah se, Pathian awmpuina leh Kohhranhote ṭan hona azârah kan hlen chhuah theih ngei kan beisei tlat a ni.

Mizote leh Bible

Mizorama Kristian pakhat pawh an la awm hma khan Bible-a bu ṭhenkhat chu lehlin leh chhut a lo ni tawh a. Mizo Kristian hmasate khan rinna kawnga anmahni chawmtu tur Thuthlung Thar an nei nghal a ni.

Zosap missionary,Pu Sapupa leh Pu Buanga te khan A AW B min siamsak a, chumi behchhan chuan Bible bu ṭhenkhat – Chanchin Ṭha Luka Ziak, Johana Ziak leh Tirhkohte Thiltih te an letling a. British and Foreign Bible Society, London chuan Mizo Bible bu hmasa ber Luka leh Johana te chu kum 1898 khan chhuin, kum 1899-ah Tirhkohte Thiltih an chhu leh bawk. Hengte hi Mizo ṭawnga Bible lehlin kan neih bu hmasa berte an ni ta a ni.

Kan Zosap missionary dangte leh mi thiam hmasate’n Bible lehlin hna chu an chhunzawm zel a. Kum 1916 khan Mizo Thuthlung Thar hmasa ber chu lehlin zawh niin, hemi kum vek hian British and Foreign Bible Society, Calcutta Auxiliary chuan a tichhuak a. Kum 1955-ah Thuthlung Hlui lehlin zawh a ni a, Mizo Bible hmasa ber chu kum 1959 khan tihchhuah a lo ni ta a ni.

Hemi hma kum 1956 khan Mara Bible chu tihchhuah a lo ni tawh a; BSI, Aizawl Auxiliary huam chhunga ṭawng chi hrang hrangin Bible lehlin a ni ta zel a ni. Tunah chuan Mizo Bible pawh a pianhmang leh a rawng chenin chi hrang hrang kan lo nei ve ta. Kan Zosap missionary-te leh kan mithiam hmasate ṭhahnemngaihna leh inpekna azara keimahni ṭawng ngeia Bible kan nei hi a hluin a lawmawm tak zet a. Kan mamawh ang zela min chhutsak ṭhintu Bible Society kan nei hi a hlu tak meuh bawk.

Hetih lai mek hian, mahni ṭawnga tlar khat pawh Bible chhiar tur la nei lo mi tluklehdingawn tel khawvelah an la awm mek a. Khawvela ṭawng 7,396 awmah Bible la nei reng reng lo hi ṭawng 3,710 an la awm nia chhut a ni. Heng mite hian anmahni ṭawnga Bible an neih ve hun tur an la nghak mek a. Pathian mite thawhrimna leh thilpek avanga Bible nei tawhte hian a la nei ve lote’n anmahni ṭawng ngeia Pathian thu an lo chhiar ve theih nan mawh kan phur a, theihtawp i chhuah zel ang u.

“Keini, Chanchin ṭha hre si, ênna hmu tate hian, Chatuan nunna eng thu hi an hriat kan phal lo'm ni?”

– Rev. Remlalfaka