Vai lakah a duai lo a, a takin Zo fate a hmangaihna a lantir ṭhin

November ni 7, 2024 khan Mizo pa pakhat chu bazar aṭanga mamawh châkkhai a lei haw lam chu Delhi-a kawng pengṭhuam pakhatah taxi pakhat chuan a car khalh lai hnung lam a su bur mai a. A sutu zawk chu inthlahrunga ngaihdam dil tur awm zawk tak a nih lain, motor aṭangin a chhuak a, a mi suta chu a ân khum nghal ta chiam chiam mai a. Mizo pa lah chuan vai laka duai ngai lo a nihna lantirin, inhnial buaina chu a thleng a ni ta mai a. Traffic an ti jam nasa hle a, kawng sirah car park ṭha hmasa te te dunin, an buaina bul chu a inṭan ta der mai.

Mizoramah pâwr tak mai a, 'Vai ka ngam' ti fo ṭhinte pawh vai ram khawpuiah chuan han pâwr ve vak chu thil awlai lo tak a ni. Mizo pa tan pawh inphah hniam a, insiamremna neih pui mai chu a awl khawp ang. Mahse, Mizo pa huaisen chuan zam mai bik lovin, biak ṭul a tihte a phone hmangin a be hmasa a. Delhi Police-te pawh thleng khawm nghalin, a hmuna duty CRPF hote pawhin Mizo pa chu a dik zawk tih an hre chiang a, CCTV aṭangin a dikzia an hmu vek bawk.

Vai ram police-te chuan vai taxi driver chu criminal case siamsak an tum ta mai a. A thiam zawk Mizo pa hnenah chuan Delhi police officer chuan, "Ka pu, he taxi driver hi engtia hrem nge i duh?" a ti a. Mizo pa thinlungah chuan Kristiante Pathian aṭanga chhuak, khawngaihna leh lainatna, Mizo Kristian rilru dik tak a lo lang ta tlat mai a. Taxi driver-in a va sut tâk motor siam mante chawi a ngai ang a, taxi neitu/driver chhawrtu beng a thlen chuan a thinrim ang a, taxi driver chu bânin, a chhungte châwm nana a ei bel ber, a eizawnna chu a tawp mai ang tih a hlauhthawnpui ta daih a. Delhi Police officer hnenah chuan, "Ngaihdam min dil duh chuan ka ngaidam ang," tiin a lo chhang a. Thiam lo zawk ni mah se, a tira pâwr viau kha vai taxi driver chuan ngaihdam a dil tak avangin Pu K. Vanlalvena, MP (RS) chuan a ngaidam ta a ni.

Amah Pu K. Vena hi vai ram khawpuiah pawh a huaisen a, mahse, Pathian a ṭih tak zet tih chu a lang chiang hle. Ngaihdamna changtu nih hlutzia a hria a, amah ngei pawhin a lo tawng ve tawh fo bawk. Ngaihdamna hi amah hian chang lo se, Mizoram aiawhin MP a ni lo ang a, Delhi tlangah hian a awm bawk lo ang. He mi nung ramah hian a awm ve lohna a rei tawh viau zawk mai thei tih chu a rilruah a lo lang ta hial zawk a. Kristian ringtu dik tak chu a lo va ni tehreng em.

November ni 13, 2024 khan a Instagram-ah Central Reserve Police Force-te’n ṭan zawk nei ang maia mahni ram leh hnam chhana duty Zo fate village volunteer 10 lai an kap hlum kha khawvel hriatah na takin a dem tawh a, pawmzam harsa a tihzia leh mawhphurtute chungah dan anga action na taka lak a phutna Pu K. Vena hian a lo tarlang tawh a ni.

November ni 20, 2024 khan telephone-in national media palaite’n Manipur buaina chungchanga a ngaihdan an zawt a. Manipur hi President's Rule-ah dah phawt rawh se, hemi hun chhung hian central team-te’n army-te venna hnuaiah Manipur-a Meitei leh tlang mite chenna chin zawng zawng zir chiangin thliar hrang hmasa se la, Meitei luah chin zawng tan hian administration thar, 'Meitei land' din ni se, Zo fate luah chin zawng tan administration hran siam ni bawk se, a lo ti a.

Media-te chuan President's Rule-a dah a duhna chhan zawt letin, chutianga dah a nih loh chuan buaina hi Manipur state sorkar leh police-te tihtawp phak a ni tawh lo. Manipur police-te aiin Meitei leh tlang mite ralthuam neih inbelh khawm chu an chak zawk daih tawh a, Central military force-te lo chuan an tihtawp thei tawh loh tur thu Mizoram MP (RS) chuan a lo chhang.

Parliamentary Leaders Meeting November ni 25, 2024 khan Manipur buaina tihtawp nan President's Rule-a dah a ṭul thu sawi nawn lehin, Mizoram MP ni chunga Manipur chungchang a sawi fo chhan a sawifiah a. British lo luh hma aṭanga Mizo hnahthlak hnam hrang hrangte Manipur-a an chen tawh thu te, Manipur-ah hian Mizo hnam peng hrang hrang nuai ruk chuang an chen mek avanga an harsatna chu sawi chhuak ṭhin a nih thu a sawi. Nikum May thla aṭanga tun thlengin pawisawilo nunna tam tak a luan ral tawh thu leh Manipur-ah central sorkarin direct-a hma a lak theih nan President's Rule-a dah chu hna pawimawh hmasa ber a nih thu a sawi a ni.

Mizoram chheh vel Myanmar leh Bangladesh Chittagong Hills-ahte inkahna a la awm reng thute sawi chhuakin, raltlan tam tak Mizoramah an awm mek a, chung zingah chuan naupang tam tak enkawl ngai an awm thute a sawi a. Shillong leh Gauhati-a UNICEF awmte chu a ṭangkai phak loh avangin Mizoramah ngei UNICEF din turin central sorkar chu na takin Pu K. Vena hian a nawr bawk.

Tlem lai deuh tawh khan Thinghlun daiah Thangram indigeneous hovin Cultural Meet an buatsaihah chief guest-a a ṭang tur kal lam chu Assam police-te’n an state-a luh phal lovin ramriah, ramhnuaiah an lo dang tlat mai a, kir leh ngei ngei turin an lo ti a. Assam police pawh an thinrimin boruak pawh a sang viau. Zing dar 8 vel aṭangin an dang ṭan a. Amah pa sehhel tak mai chu kir duh lovin, vai police dan mai mai nih kha tlawmah a la tlat a, kir a tum lo bur mai, motor chhungah a ṭhu lui tlat a. Chawhnu dar 1:30 velah chuan an chhuah ta tawp mai a ni. An chhuah hnu chuan Assam ram chhung Shingla Valley-ah Thangram Cultural Festival-ah khuallianah a ṭan lai chuan amah Pu K. Vena vengtuah Assam police ho kha an ṭang ta daih zawk bawk a nih kha.

Assam nen kan buai a, ramriah inkapin Assam police eng emaw zat an thi a. Khati taka state pahnih inkarah kan boruak a sosan hle lai khan Parliament tualah media-te’n interview lo neih puiin, 'If they come again, we shall kill them all' huaisen taka lo titu kha amah Pu K. Vena tho hi a ni. Assam police leh CID-te pawhin Delhi-ah Mizoram MP (RS) chenna chu luhchhuah tumin an veh reng bawk a nih kha.

Pa danglam tak mai, rilru huaisen tak, Zo hnahthlak hnam peng hrang hrangte insuihkhawma rorelna pakhat hnuaia awm thupui reng, politics buai avanga state pawna kan unau mangangte tana a theihna zawnah chawl lova hma la mar rengtu chu amah Pu K. Vena hi a ni. 

- R. Lalhmangaiha, Bethlehem