News tawi si ṭha si

Mizoramah hian chanchinbu a tam hle a,mahse kan chhiar tam ber chu Vang­laini hi a ni awm e. Vanglaini-in news a tihchhuah ṭhin zingah hian tawi si, ṭha tih deuh deuh ka nei a. Chungte chu ka rawn tarlang dawn a ni.

Thisen pe: Thisen sawngbawlna man chungchang a party inbeihna ang chi hi sawi ka tum hran lo. Tlawmngaia thisen petute leh an pek zat tawi fel taka tihchhuah a ni ṭhin hi a va ṭha em! Rukru leh tualthat emaw Heroin man chanchin chhiar ai chuan ropui tak a ni. Pi leh pute hunah khan "ṭhian chhan thihngam nun" an nei ṭhin. Tunlai hunah hian a thlawna thisen petute hi 'ṭhian chhan thihngam" te chu an ni mai lawm ni. Hei ai hian ziak sei thei deuh ula a va hlu lehzual dawn em!

Ph.D hmu: Zirna hi a pawimawh em em a. Mi tam takin Ph.D hi awlsam taka hmuh leh neih theih anga kan ngai hi a dik lo. Mizote hi thil chik peih lo tak, teirei peihlo kan ni. Mahni branch YMA hruaitute emaw VC/LC te pawh hre kim theilo khawpa thil chiklo leh chhin­chhiah peih lo kan ni. Chuvangin tha leh zung, ngaihtuahna leh sum senga Ph.D hlawh chhuaktute hi an fakawm tak zet a. An thesis te nakin zela en lêt theia vawn ṭhat a ni hrim hrim hi a hlu bawk. Hetia chanchinbua Ph.D hmu tharte tihchhuah a nih hian zirlai naupang zawkte cho phura fuihtu ṭha tak a ni thei tlat.

Lehkhabu Re­lease: Lehkhabu ziah hi thil har tak a ni. Tin, lehkhabu chhiar hi tui loh chuan a peihawm loh hle. Amaherawhchu, thiamna sang tawh tak, internet hmanga thil hmuh zung zung theihna khawvelah cheng mah ila leh­khabu hlutna hi chu a tlahniam chuang lo. Lehkhabu chhiar hi tam tak tan finna, nun kaihruaitu, hunawl hnawhkhahna ṭha tak ni bawk si a ni. Chanchinbu kal tlanga lehkhabu chhuak thar apiang kan lo hre thei hi a lawmawm tak zet zet a ni. Party press release thutak pai lo chhiar fo ai chuan lehkhabu chhuak thar hian min tihlim zawk ṭhin.

Painting Exhi­bition: Lemziak thiamte an hlu a, mihring suangtuah­nate chu lemziak hmangin an lantir ṭhin. Hnam fing apiangin lemziak hi an ngaihlu a, Lemziak thiamte pawhin ngaih­san an hlawh hle. Mizoramah pawh lemziak zirnate a awm ve zel a. Sikul naupang ten an chawl laiin an zir bawk a, mi tam tak tan eizawnna a ni bawk. Mimal emaw pawl anga "painting exhibition" a awmin Vanglaini hian a lem nen an tarlang ṭhin a, a hlu takzet a ni. Lemziak hi art chi khat, eizawnna chauh ni loin a tuipuitute leh a thlirtute tan hlimna pe theitu a ni. Chanchinbua lem­­ziakthiamte kut­chhuak tihlan hi an­mah­ni chawisanna leh fuihna ṭha tak a ni. Lo tichhuak zel teh u.