Home Secretary atana MCS officer dah hi

Kum eng emaw ti liam taah khan Mizoram sawrkara Home Secretary-ah Mizo IAS officer, MCS aṭanga IAS-a kai kha a awm a, chutih lai chuan DGP-ah Mizo IPS officer (direct recruit) a awm bawk a. Home Secretary khan meeting a koh velah DGP kha a ko kal ve mai ṭhin niin an sawi–DGP ai chuan Home Secretary chu post sang zawka ngaih a ni miau alawm.

Mizo DGP chu a pension a, a hnuah Mizo IPS (direct recruit) tho DGP a ni ve leh a, Home Secretary erawh chu a ngai (MCS aṭanga IAS-a kai) a la ni. DGP thar erawh chu Home Secretary-in meeting velah a ko kal thei tawh lo an ti. A chhan chu, direct IPS officer khan MCS aṭanga IAS kai officer koh kal theiha awm a tum lo a ni awm e. Mi titi aṭanga ka hriat, 'an ti' tih a ni a, a dik leh dik loh ka hre chiang bik lo.

All India/central service officer-te hian mahni indahsanna (ego) an nei lian hlea sawi a ni ṭhin a, a dik ka ring. Chu an ego chu thup thiam tak, tilang chhuak mang lo erawh an awm thei ang. State service aṭanga all india service-a kai chhote hi chu an dah hniam deuh a, an ngaisang vak lo tih erawh phat tur a awm lo.

Tunah hian Mizoram sawrkara Home Secretary hi MCS officer a ni a, ka hriat ve chinah Home Secretary-a state service mi an awm ka hriat vawi khatna a ni. DGP hian eng angin nge a ngaih ang aw, tihte ka lo ngaihtuah ve mai mai. A chunga kan sawi lan, Mizo IPS officer hmasa zawk ang khi nge a nih ang a, a hnuhnung zawk ang khi ni ang? DGP tan amah aia rank hniam daih hnuaia awm chu 'thiam' a har viau mai thei a ni.

DGP ni pha tawh direct IPS officer aia post sang zawk Home Secretary post-ah promoted IAS dah pawhin neuh neuh a awm theih tawh lai a, IAS em pawh la kai lo MCS officer han dah hi chu a zialo deuh chuan ka hria; Centrall/All India Service officer ten ego an neih len dah ngaihtuah tel chungin. Ama (tuna Home Secretary) tan pawh Home Department-a post sang bera awm a, amah aia rank sang zawk leh hlawh pawh sang zawk police officer (IPS)-te a post aia hnuaia an awm si a, han hrawn vel chu a nuam vak lo ang; awm thiam pawh a har ngawtin a rinawm.

Mizote'n all india service officer kan nei tlem tawh tih kan hria, direct IAS kan nei tam tawh lo; direct IAS kan neih mek zingah Home Secretary ni thei remchang an awm kher lo mai thei. Mahse, MCS leh state service dang aṭanga lut IAS kan nei nual tho a, Home Secretary-ah ngat hi chuan promoted from state service pawh ni se, IAS tal chu dah a ṭha lawm ni, ka ti a ni.

- Zoramchhana