OFFICE LEH THINGPUI DAWR

Tun hma deuhte kha chuan Mizote hian kan eizawnna ber chu lo neiha ei zawn a ni a, ni tinin ram hna thawkin kan pi leh pute kha an feh chhuak ṭhin a ni. Hetia ram hna an thawhnaah hian chhun chaw an fâk tur an fûn mai ṭhin a. Tunah chuan ni tina ram hna thawk tawh lova sawrkar hna office-a thawk kan tam ta em em a, heng ho hian chaw fûn tawh loin thingpui dawra ei leh in an siamte chu inhnangfâk nan an hmang ta ber a nih hi. Sawrkar hnathawk a lian ber aṭanga a tê ber thlengin thingpui dawra ei leh in tur an siam hi kan ring a ni ta ber e.

Sawrkar hnaah hian hna sang leh zahawm takte a awm a, chutih rual chuan, hna hnuaihnung deuhte pawh an awm bawk. Amaherawhchu, sawrkar hna hi a hniam leh sang pawh ni se, thla bia hlawh lak vek a ni a, Mizoramah chuan sawrkar hna hrim hrim hi hna ṭhaa ngaih vek a ni. Revd Chuauṭhuama phei chuan, "Mizoram hi sawrkar hnathawkte paradis ka ti mai," a ti hial. Sawrkar hnathawkte tan chuan dam loh leh thil dang vanga an chawlh pawhin an hlawh a kiam chuang lo a, chuvangin, ni tina inhlawhfate ai chuan sawrkar hna thawh hi a ṭha em em a ni.

Heti anga hna ṭha thawkte hna thawhna office bul hnaiah hian a remchan dan ang angin thingpui dawr an inbun ve vat zel a. Heng thingpui dawr buatsaihtute hi a tlangpuiin mi hausa sa leh neinung sa a ni ngai lo tlangpui. An hnathawkte pawh lehkha thiam sang tak an ni ngai lo bawk. Heng thingpui dawra hna thawkte hi an hlawh pawh sawrkar hnathawkte nen khaikhin chuan inthlau tak a nih bakah, an kal loh ni-ah hlawh an nei ve lo a, a hna pawh hi hna zahawmah kan ngai lem lo. Chuvangin, office leh thingpui dawr hi inkawp tlat ni si, an hnathawh leh an hlawh inpersan tak ni lawi bawk si a ni.

Thingpui dawra thawkte hian office-a thawkte hi an zahin an ngaisang em em a, an zara sum lo lak luh ve tumin theih tawpin ṭan lain an bei ve a, sawrkar hnathawkte ei leh in duhzawng berte siam hram hram an tum ṭhin. Chuvangin, zanahte siam lawk theih ang angte siam lawkin, an ei duh huna pek hman loh hlauin zing kar aṭangin an che char char a, an mamawh hun takah pek theih hram an tum ṭhin a ni.

Hetih rual hian, sawrkar hnathawkte hi mi pali panga mai an lo ni lo va, ei leh in an duh hun a lo inrual a, room hran hrana awmte hi thingpui dawra thawkte hian a ruala an pek theih ṭhin loh avangin sawrkar hnathawk zingah thinrim maite pawh an awm ṭhin. Hna hnuaihnung zawk thawkte hi hna sang zawk thawkte hian an hriatthiam a ngai khawp mai.

Sawrkar hnathawkte ei leh in hi thil chi hrang hrang a ngai a, a siam nan hian sum leh pai tam tak sen a lo ngai ṭhin a, neinung lo tan chuan a buaithlakin a hautak hle. Chuvangin, sawrkar hna tawkte hian an thil ei man hi ni tina an pek nghal loh avangin, thingpui dawr siamtute neihin a lo tlin vek bik lo a, an thilsiam tur lei ngaite lei nan hian an bat theihnaah an ba reng a ni.

Office-a thawkte hi an inang lo em em a, ei leh in duh tak te, insûm thei takte an awm a. Phunchiar em em mai, thingpui dawra thawkte thil pek sawisel reng mai, "A dai lutuk, a va thlum lo em em," tia phun phun chi an awm a, an pek ang ang lawm taka lo ei mai ṭhin an awm bawk. Sawrkar hnathawk zingah hian sum leh paia rinawm tak an awm rualin, rinawm vak lote an awm bawk a. A ṭhen chuan thingpui dawra an eina bâte hi an thla hlawh lak veleha pe nghal an awm a, a ṭhen erawh chuan hlawh an lak pawha bâ pe ṭha duh miah lo an awm bawk.

Hengte avang hian thingpui dawra thawkte hi an buai phah em em a, an hlawh ve tur, an lo nghahfak ve ber a ni si a. Chuvangin, sawrkar hnathawk hlawh ngah zawkte hian hlawh tlemte nei thingpui dawra an bâte hi thla hlawh an lak hi chuan pek vat a ṭha khawp mai. Mi harsa zawkte ṭanpuitu nih duh vek an ni awm si a, an hmuh phak rengah ni tina an rilṭâm hlaua ei leh in rawn pe ziahtu, thingpui dawra an leibâ kha pe vat ṭhin se, mi harsa zawkte ṭanpui a ni mai. Eng emaw chen chu office leh thingpui dawra thawkte hi an inkawp a ngaih hmel si a.

Nangni, sawrkar hnathawk duhawm takte, ni tina office kalte u, in awmna vengah chuan kohhranah leh khawtlangah pawh mi ṭangkai tak tak in nih kha. Chuvangin, ni tina thingpui rawn pe ṭhinte hian Pathian mi, piangthar ṭha tak in nih leh nih loh an hre teh mai a nia; hei hi in rawngbawlna tur a ni e, an lakah ṭhat lo chhuah hram hramte u. In rinna kha a taka in nunpui hun ṭur a ni e. Eng tin nge hla phuahtuin a tih khah, "An chhinchhiah bik che, i chetzia an thlir, i sawi apiang an ngaithla, Chhandamtu chu nangmahah ên chhuahtir la, a thu thuin ni tin awm rawh," a tih kha; heng thingpui dawra thawkteah hian inti lang dawn lawm ni? An thlir reng che u a nia. Mahni hnaah rinawm taka awmin Lalpa tan i thawk zel ang u–office leh thingpui dawra thawk zawng zawngte hian.

- Hausanga Hauzel