Congress ṭhalai leh lei dawh muang
Congress ṭhalaite chuan tun hnaiah Sihhmui bula Tlawng lei chunga lei dawh mek thar an tlawh thu te, lei dawh hna thawh chu a muang lutukah ngaiin, chu chu mipui zahlohna leh ZPM sawr inthlahdahnaah an ngai tihte media-a a lang a. "Lei dawh kai hna zawh a la ni lo leh hna thawktu mumal an awm lo hi mipui zahlohna leh ZPM sorkar leh a changtu Minister inthlahdahna dik takah kan ngai," tiin an sawi a ni awm e.
Ni e, Sihhmui bula Tlawng lei dawh mek hi Mizorama hmasawnna hnathawh dangte ang bawkin a muang a nih ka ring. Kan Lengpui Airport khu ka hmang khat ve khawp a, Mamit District lamah ka kal ngai mang bawk si lo va, lei an dawh muan leh muan loh hi ka chiang ve lo. Mahse, Mizoramah hmasawnna hnathawh a muan ṭhin em avangin Tlawng lui chunga lei dawh pawh hi a muan ve tho ngei chu ka ring ve ngawt!
Congress ṭhalaite'n Tlawng lei dawh mek an zuk enfiah hi a ṭha ka ti a, ṭhahnem an ngaih vang a nih ngei ka ring a. An zuk tlawh avanga hna a chak phah a nih phei chuan a ṭha hle ang (hna a chak phah viau phei chu ka ring chuang law).
Congress ṭhalaite hian ka nuih erawh an tiza deuh roh a. Nuih an tihzatna lai chu media-a ka lo hmuh, lei dawh hna muang "Mipui zahlohna leh ZPM sawrkar leh a changtu Minister inthlahdahna dik takah kan ngai," an tih hi a ni. 'Zawngin a ngûm khâk a hmu lo va, a ṭhiante ngûm khâk a nuihzat' tih Mizo thufing hi rilruah a lang tlat pek a nih chu.
Hmasawnna hnathawh dang chu sawi tel lovin, lei dawh chungchang bik chauh hi han sawi ta ila. Congress sawrkar kha lei dawh chungchangah an ropui bik lohzia rilruah a awm a. Bairabi khaw kianga Tlawnglui chunga lei dawh kha kan la hre hlawm em aw? Kha lei an dawh muanzia te, lei dawhna atana sum rahman zat an revise ngunziate kha. Tuna Sihhmui bula lei dawh tho an pâmṭûl tak ṭhakte pawh rilruah a awm.
Khang hun lai khan Congress sawrkar khan mipui an lo zah lo awm mang e, tih te, khatih laia PWD enkawltu Chief Minister leh a puitu a nau kha an lo inthlahdah awm mang e tihte rilruah a awm a. Congress sawrkar lai khan Mizoramah lei vawi 5/6 vel a chim niin ka hria a, khangte pawh khan mitthlaah a rawn lang zut zut bawk, 'Lei chim hnam kan ni' tih fiamthute pawh a awm kha!
Engpawhnise, thil kal tawh chu thil kal tawh ni se. Congress ṭhalaite hi an sawrkar lai khan thil ṭha lo leh hnathawh muang ang chite hi an vei hman lo a ni mai thei a, tuna an rawn vei ta hi a lawmawm khawp mai. Kan ram leh hnam tana ṭha tur hi vei zel se, ZPM sawrkar pawh dik taka an kal thei nan nawr zel rawh se.
- Lalduhsanga