Mizo hmeichhe chhuanawm

Mizo hmeichhia te hi ram pawnah Mizo hnam tihmingchhetu anga puh ni ṭhin mah se an thiltihah Mizo mipa aia laktlak zawk leh hlawhtlinna chhinchhiah tlak tak tak neite sawi tur an tam ta hle.

Sorkar hna lak leh thildangah hmei­chhiate hi hmeichhia an nih avanga mipa aia duhsak bik nia sawi awm mahse duhsak bik vanga tling emaw hlawhtling vek an ni lo tih chu tun hnaia thilthlengte hian a tichiang a ni. Tun hnaiah HSLC result a chhuak a, Mizoram tiṭha ber chu hmeichhia a ni a, HSSLC result chhuak leh a, Arts bikah a tiṭha ber chu hmeichhia a ni a, Arts top ten-ah hmeichhe pariat an lang. Science leh Commerce-ah top ten-a lang mipa leh hmeichhia an intluk a, panga ve ve an lang. HSSLC vocational course-ah Mizo mipa-in hmeichhia an tluk lo leh a, top ten-ah hmeichhe pariat an lang leh a ni.

Zirna mai ni lo infiamnaah pawh kan Mizo hmeichhiate hi an duai lo hle a, tun hnaia National Hoc­key Sub-Junior(Girls) inelna Ranchi-a khelhah an champion leh a, tun ṭum hi an vawi khat champion-na ni loin vawi nga an champion-na a ni! National Sub-Junior Championship for Girls, Odisha-a neihah tun hnai khan champion nomawi an rawn hawn leh bawk.

Mizoram Civil Service exam result leh Mizoram University aṭanga Ph.D dawng thar kan hriat leh tun hnaia master degree result chhuaka gold medalist tam zawk chu hmeichhia zel an ni.

Tun hma kha chuan kan hmeichhiate hi inchhung sekrek khawiha, chhungkaw inrelbawlna lam buaipuitu bika ngaih an ni ṭhin a, mipate chu pawn chhuaka eizawng tur leh hna rum thawk tura ngaih an ni ṭhin. He kalphung leh ngaihdan hi kan hmeichhe huaisen tak tak te'n an thlak mek a, zirna leh eizawnna mai ni lo infiamnaah pawh Mizo mipa te a hnunga kan awm chan a tam ta hle. Mahni pasalte chawm sawi tur pawh veng tinah an ther fur tawh a nih hi! Kan sorkar office-ah pawh hna sang leh pawimawh chelhtu chu hmeichhia an ni deuh fur a, Aizawl bazara chawhmeh leh thawmhnaw zuar tam zawk chu hmeichhia tho an ni.

Phaia hnathawk leh lehkhazir Mizo hmeichhia zingah mi hnuaia inhlawhfa chunga mahni unau zirlai te leh chhungkua enkawl pawh tam tak an awm a, chhungkaw enkawl kawngahte Mizo mipate hi hmeichhe hnungah kan awm tawh a, kan la hnungtawlh zel lo ang tih a sawi theih ta lo.

Hetihlai hian hmei­chhia nihna hi politics leh thildangah hmanruaa hman chi erawh a ni lo a, hmeichhia nih vanga mipa aia an hnuai­hnung bikna a awm lo, hmeichhia nihna avangin mipate aiin an chungnung bik hek lo. Mizo mipate hi er loin inelna thianghlim awm zel se, Mipa thu­neitute pawhin sorkar hna emaw school leh college admission-ah pawh ni se, hmeichhia duhsak bik loin mipa nena intluk an nihna hriain, mipa leh hmeichhia inkarah inelna thianghlim siam ni zel rawh se. Kan Mizo hmeichhiate hi a duhsak bikna hmanga dawm kân ngai a ni tawh lo e.