Designation plate - Kohhran leh Officer an inang

Chief Secretary-in designation plate a vuah ve lo tih ka hriat hma aṭang tawhin ka vei em avangin designation plate vuah ka ngaimawh thu hi ka lo ziak ve tawh ṭhin a ni. Tun hnaiah Chief Secretary an fakna kan chhiar tawh a, officer an demna leh ngeiawm taka an chhaihna kan chhiar tawh bawka tun ṭum chu kohhran pawh an bang bik lo tih hi ka han ziak tel ve dawn a ni, tute emaw pawi kan sawi a nih pawhin, "A hua hua chu in ni mai," an tih kha a tak a changah kan ngai dawn a ni.

Kan bul ṭanna atan chuan hman nia ka thil tawn ka sawi hmasa duh a, ITI Veng kawngpui pheiah hian Bolero a rawn tlan a, a fai bakah a thar ṭha khawp mai a, a designation plate chu ka en a, UPC kohhran hruaitu a ni tih a hriat nghal a, ka rilru te te chuan, "An lirtheia kohhrana an nihna an tar hi eng nge a ṭulna? Vantlang kawngpuia kohhran hruaitu nihna show an ang hi mawle," ka ti a.

Designation plate lar lai a nih bawk avangin tun hnaiah bawk ka hmuh leh chu Synod hruaitute lirthei a ni a, chiang takin an nihna an lo tar kuau mai chu niin. Ka hriat chian hnu phei chuan Synod Office-a lirthei dingah hian a tam zawkah chuan a kawltu nihna a intar an la ti hial a, Baptist lam pawh an bang chuang loa, anni pawhin an pastor tu tu emaw nihna hi an lirtheiah an ziak bawk a, hengte hi eng nge a ṭulna. Sorkar officer intivei deuh leh tih tur anga ngaia tar an lo awm pawhin kan kohhran, Pathian kohhran tia kan sawi van lam nena inzawm hian he leiah hian ropui leh lansarh an lo châk ve viau nge nia chhût chiang mang loin tih tur reng emaw tiin an tar ve mai mai zawk? tih zawhna ka inzawt ta a ni. Engpawhnise thutlukna kan siam theih chu kan officer-te ang bawkin kohhran hruaitute hian an lirtheiah an nihna an tar ve tih hi a ni. Ka thu a ni lova, an tar hi ka lakthlak tir thei lova, mahse ka veizawng ka sawi ve duh hrim hrim a ni.

Tin, officer designation plate tar chungchangah bawk ka lo kir ve leh duh a, Vanglaini lama ziaktu pakhat ziah lan tawh ang khan vantlang kawngpuia mahni office-a hnathawh leh nihna han tar kuau mai chu a va han zahtheih loh thlak kan ti dawn nge, a chapo thlak kan ti zawk dawn em ni? ke hrethiam ve lo. A tartu lam hian chapo vanga tar an inti lo vanga, tih ṭhan tawh a nih vanga tar mai mai pawh an awm ka ring a, hetah tak hian Chief Secretary kha a lo lang ta chiah a ni. Ani chuan an tihṭhan tawh tih hre mah se tar kher ngai a ti lova a pawhthlak tir mai, ani phei chu VIP a la ni zawk. Office-a a hnuaia mite hian lakthlak nachang hriat ve phah se.

Keia mimal ngaihdanah hi chuan VIP chin hi chuan an nihna an lirtheiah tar se, dan leh thupek thilah leh VIP sahimna atan a pawimawh vein ka hria a, police leh sipaite pawh hi an tar a ṭul chuan ka ringa mahse hei pawh hi official duty loah chuan khuh vek se a ṭhat ka ring leh bawk a. Designation plate tar leh lakthlak hi officer lamah vei lem lo an awm pawh hian a driver zawk hian tar deuh vahte hi an lo chak ve ṭhin bawk a, ka khaikhawmna atan chuan Chief Secretary entawn hian kohhran motor leh sorkar official motor-a designation plate hi lak thlak vek ni se ka duh.