CHAWHMEH LAM
Mi sawi duh loh kan phak tawk thu fahrah te te sawi leh ang aw.
Mizoram thar zikhlum, a bik takin Cherhlun thar chhuahte kha hralhna hre ṭha lo an inti a. Kawng sirahte khan an dah tlar dul niin TV lamah kan lo hmu a. Aizawlah hian eng lai pawhin zikhlum leh parbawr hi a to em em reng tho si a, engtizia nge ni le? Aizawl an rawn thlen zo lo nge, phurh man a to lutuk vang zawka to reng ni ang le? Phurh man to vanga zikhlum leh parbawr leh thlai dangte hi to an nih chuan sawrkar, Horticulture leh Agriculture te khan motor lian kha in la nei a ni lawm ni? Khangte khan phurhsak mai ta u la, mipuiin kan lei tlawm thei deuh ang a, a chingtu lamin an hralh ṭha bawk ang. Sawrkarin mipui leh ram rawng a bawlna ṭha tak a ni mai lo maw. Department motor a rem lo a nih pawhin transportation hi sawrkarin ngaihtuahpui a va ṭha ve.
Hman deuh khan Mizorama tomoto ching khaw hrang hrang inhmukhawmte khan, 'A hmunah Rs. 30, hmun dangah Rs. 35' ni tura an sawi TV lamah kan lo hmu. Tunlai (November 2024) hian Aizawlah tomoto man a tlahniam hle tawh chungin kg-ah Rs 80 aia hniam a la awm lo. Kha an rate sawi kha khârchhawngtute tan chauh em ni zawk le?
Mizoram tomoto hi itawm viauin lei duh hle mah ila, phai lam tomoto aiin a thûr a, kan ei ṭha duh mang lo tlat. To deuh phei chuan lei a chakawm loh ṭhin. Duh zawk pawh an awm ṭeuh tho ang. A thûr lutuk tihziaawm dan hi a awm lo em ni le? Sawrkar ang hian eng thil pawh hi an han sawi hluai a, a taka zawh chian leh belhchian dawn hian kan thil hriat duh min hrilh thei emaw, min kawhhmuh fak thei emaw hi an awm fumfe leh tlat ṭhin lo hi a buaithlak ṭhin.
Sangha pawh hi Mizorama tuikhuah, dil sangha aiin phai sangha, luipui, tuipui sangha hi tui ti zawk kan tam; a tharlâm dan inang rau rauah. Mahse, inhnialna a tam khawp ang. Mizorama thar a nih vanga itawm kan tih vang leh kan rilruin tui hmel a tih avanga tui ti zawk kan tam ang. Vai ram hnaiha kan awm lai chuan dil sangha hi hralh a kal ngai lo va, nilengin an zuar kual a, a uih dawnah an rêp a, tute emaw bum nan luipui sangha rêp zawrhin an zuar leh ṭhin. Mizoram hmun dangah pawh tih an ching.
Parbawr, zikhlum, tomoto, sangha, artui leh arsa, chawhmeh leh sa lam chi eng pawh phai lam aṭanga lo kal hi dan siam chawp hmang emaw, mobe rule-in emaw, mahni hmasial vang ringawtin i lo dang ngawt ṭhin lo ang u. Mi zawng zawng hi mahni remhriat dan leh thiam dan ang anga theihtawpa sum hai luhna zawng ṭheuh kan nih hi. Hman ni lawk aṭanga Mizoram aṭanga eng emaw thar chhuaktute chauh tan hian he khawvel sumdawnna ram hi hawn a ni lo.
Eng thilah pawh Mizoram thar chhuah a awm ang a, hmun dang aṭanga lak luh a awm bawk ang a. Mi tinin kan duh zawng, ṭha kan tih zawng leh tui kan tih zawng chu kan lei mai tur a ni. A tlangpuiin phai lam aṭanga lo kal hi a tlawm zawk ṭhin lehnghal. Duhthlanna hi Pathianin zalen taka mihringte a pek a ni.
- K Hmingthankaia