Hruaitu hmasate an zahawm

Tunlai hian Lengpui Airport Indian Air Force (IAF) kuta hlan tumna thawm a rik bakah, Power Minister-in Tuirial HEP chungchang a sawi nawi leh deuh a. Tlem ka han sawipui ve teh ang.

Kum 2016 (?) khan kan MLA Lt.Col. Zosangzuala khan bus fare min pe a, Congress Unit khan Tuirial HEP kha a hmunah kan zuk tlawh tak asin. An la peih lo deuh a, tun hnu hian tlawh leh a chak awm ngawt mai.

Kan ram hi a la naupang a, kan hnufual em em. Motor lut hmasa ber, kum 1944-a kan veng pa Pu Rochhinga’n Aizawla a rawn khalh luh kumte khan Gauhati–Shillong–Silchar te khu national highway a lo ni daih tawh.

Kan hruaitu hmasate kha an ropui hle hlawmin ka hria. UT kan nih kum 1972 aṭangin mahni sawrkar kan nei ve chauh a. Ka hriatreng chu, 1985 UT sawrkarah khan Pu R Thangliana kha Supply Minister a ni a. May thla khan Delhi-ah furpuia buhfai qouta dil belh turin a kal a, metric ton 2,000 a rawn hmuh belh a, kan lawm hle a ni. A lo haw tukah a inah kan leng a, a titi ka la hriatreng ka han sawi teh ang.

"... Fûr a nasa dawn si a, buhfai qouta kan hmuh belh loh chuan kan mite thingtlang khuaa a tam zawk an ṭâm ngei dawn tih kan hre si. Delhi-a kan liason officer nen minister kan va hmu a, chumi chu hmu rawh u... ti reng rengin khaw lumah kan vak kual a. Tlai lam dar 5 velah Joint Secretary pakhat kan va hmu a, kan dil angin July-August quota atan metric ton 2,000 min pe ta a. Lawm em emin Mizoram House kan thleng a. Trunk call kan book a, Aizawl lam kan hrilh nghal a, nangni lah in lo lawm. Chanchinbuah kan chhuahtir dawn in lo ti… A tuk zing kan han tho a, dar 9 a lo ri a, khaw lum hnuaiah suit hain, necktie kan han awrh a. Minister pangngai hnen a, "Ka pu, nimina buhfai qouta min pek kha kan lawm teh asin. Kan mite pawh an lawm... mahse... ih… Kan mite’n buhfai leina tur an nei lo. Chuvangin, buhfai leina an neih theih nan EGS (ṭâm inhlawhna kan tih mai ṭhin)-ah kan mite inhlawhna tur pawisa min pe leh hram rawh u aw…" ti tura han chhuah leh chu huphurhawm ngang ngang tak a ni, Mizopa tan chuan. Mahse, kan mite rilṭâma an thih dawn ai chuan kal chhuak lo thei kan ni si lo," a tih kha ka hre reng ṭhin.

Hemi ka han sawi chhan chu, tunlai ṭhangtharte hian tuna kan ram hmasawnna zawng zawng hi amah a lo awm mai a ni lo tih an hriat hi ṭul hlein ka hria a ni. ZMC, Airport leh Tuirial HEP-te hi hruaitu hmasate’n awlsam taka an siam a ni lo. Lengpui Airport ngat phei hi chu, khatihlaia kan Finance Minister kha Mission Veng pa, Zo fate zinga pa rintlaka an sawi Pu J Lalsangzuala ni lo mi dang ni ta se la, (mi dang a thawhpuite’n beng lo chhu ngawng se la) a hlawhtling kher angemaw chu kati hial a ni. A bul ṭanna kum 1995 tawp lamah ṭhalai min hruai a, tlang bâwk tê tê, ruam leh thing leh mau hmun kan thlir a, Airport mitthla thiam kha a har teh asin. An zawhfel hnu kum 1998-a kan zuk tlawh kha chuan mumang ang mai a ni. Harsatna kha a challenge kim vek a ni ber e. Tuna kan sawrkarin IAF, etc. te pek a tum tihte hi hre pha se engtin ngai ang maw, ka ti ṭhin.

Kan ram timawitu leh tizahawmtu, awm lo ata awma siam thei an awm chuan enkawl zui chu harsa lutuk tur emaw ni dawn le, ka ti ṭhin. Tuirial HEP pawh hi hruaitu hmasate’n an theih leh phâk tawka an lo din, uluk leh fel zawka enkawl tum tâk aruanga a fel lohna lai zawn chhuah a, kal hmasate dem nan hmanrua a hman hi a hrisel lo ngawt mai. Heng kan assets hi chhuanlam eng emaw siama ram pawn lam mite enkawl tura pek tum hi hriatthiam a har a ni.

Kan ram hruaitu hmasate hian tihfel tawk loh te, kum a lo veia siamṭhat ngaite a lo awm ngei ang; khawvel dan a ni. Chungte chu sawrkar lo kal zelte enkawl zui tur a ni dawn lawm ni? Chutih ahneka heng kan ram chhunga thil kumhlun, assets kan neih chhunte hi hnam dang, hausak belhna zawnga vâk ruai ho kutah hian tlu lut lo hram se, ram tan a va ṭha em aw.

- LTKA, Mission Veng