Mizorama chhiah lâkna tur ka la hria

Vanglaini chan­chinbu hi kum tam ka lo la ve tawh a, thu chailai hi a nei ṭhin a, a changin zu an ziak kur nguai a, a chang leh Mizo ṭawng hman dana inhnialna 'V' hman leh hman lohte an buaipui a, tun hnaiah Private sikul sêlna lam an building leh hmunhma neih chhiatzia leh school fee san sizia te ziah lan a ni a. Sikul kai hunte pawh inhnialna ngaihnawm tak a tling a, tuna ka vei ve thung hi chu Mizorama chhiah chhun luh dan inrualkhai lo hi a ni ve thung.

Sumdawng kan tihah pawh hian mi ṭhenkhat sumdawnna hi chu chhiah chawi lo tawp an ni a, a ṭhen chu chhiah chawi sanna bik an ni bawk. Chhiah chawi zat a inang lova, a chhan chu mithiamte sawifiahah dah ta ila. Sorkarin sum a neih tak lovah chuan chhiah chi hrang hrang a tipung a, hei hi chu state dang pawhin an chawi ṭhin a nih vangin kei chuan ka sawisel hran lo.

Ka sawisel chu chhiah pek harsa leh pekna hmun nei tlem bawk si, chhiah petute tana awlsamna an zawng lote hi a ni. Office-a induh zet zet hmaa kan pawisa pek hi kan peih lo hlawm a niin ka hria a, ka sawi tum takah ka han lut dawn tawh ang e.

Mizoram sorkar hian private school-ah hian chhiah a la lo an ti a, hei hi engvanga la lo nge a nih a, a la ngam lo nge danin a remti lo zawk? tih hi kei mimawl zawhna a ni. Kei ni ang kawla ni chhuak chhiara hnathawka mahni chenna in khawr pum ve thei chang chang pawhin kan in leh in hmun chhiah kan pek a ngaih tawh dawn chuan private school hian chhiah an pek a ngai a ni.

Sumdawngin a sumdawnna bungrua a lakluh aṭanga chhiah a pek chuan private school dintute hian school fee aṭanga eng percent emaw tal an pek luh ve hi a âwmin ka hria.

Kan chhiar tawh ang khan state dangah chuan mi hausa ni sain school lian tak tak an din a, Mizoramah chuan school din hi hausakna kailawn a ni a, kan private school neitute hi an hausa tawh a, an school buil­ding chhiat aṭanga teh chi a ni lova, school luah man tlawm deuh­te an zawn vanga hetia awm mai mai an ni a, an hausa tih hi mipuiin kan hmu a ni.

Tichuan anni hian tax pe ve se, school fee a san leh tax pe tam se, a percentage hian pe se, student ngahin an pe tam ang a, a nei tlemin an pe tlem ang a, hei hian school fee tihsan tur veng siin a fee aṭang ber khan percentage hi la se tih hi mawl taka ka rawtna chu a ni a, private school-a tax lak hi danin a khap leh khap loh ka hre lova, a khap si loh chuan sorkar hi ka hrilhru ve duh a ni e.