Traffic police leh Aizawl khawpui

Kan Aizawl khawpui zim te, tawt em emah hian a phu loin lirthei a tam a, traffic police-te'n theihtawp chhuaha an enkawl vangin lirthei jam nasa lutuk pawh a awm meuh lo a; hei hi traffic police thawhrim rah tiin fak ila an thawh dan en chuan fak an phu hle mai. Traffic police hi Aizawlah kum 30 vel zet chauh kan la nei a, an din tirh aṭanga hun engemawchen chu SP nei loin Aizawl district SP hnuaiah an awm ṭhin a, tunah chuan SP puitling neiin sipai pawh an nei ve ta ṭeuh mai. SP lo awm tawh zawng zawngin a kum telin lirthei pung chak si, kawng zauh awm si lo karah theihtawp an chhuah a, tun thlengin kan la khalh ve pur pur thei a ni.

Traffic police-te thawhrimzia hi kan hmu ang a. Sorkar hnathawkah chuan anni baka thawkrim an tam loin a rinawm. Duty ṭhenkhat thinchhe deuh pawh awm mahse a awm ve viau mai. Khawng taka lirthei an control hian lirthei khalhtute tan vek a ni tih kan hriatpui ngei pawh a ṭha.

Aizawl khawpuia heti taka lirthei tam si, horn hmehrik chuah chuah awm miah lote hi kan standard a san zia a lang a, horn hmet ri luah luah an awm palh pawhin kan en deuh hu hu a, traffic police pawhin he kan kalphung hi vawng nung reng se a ṭha ngawt ang. Zirtirna pawh lirthei khalhtute hnenah pe tam thei se. Pu C Lalzahngoa Addl. SP-ah a awm lai khan lirthei signal pek dan a duang chhuak a, hei hi tun thlengin lirthei khalhtute pawhin kan la zawm a, a zawm lo leh singal pek dan dik loa pe mi tlema zawng pawh hi traffic police hotute hian tun ai hian hrilhfiah tam thei se a duhawm khawp mai.

Aizawlah chuan Transport minister hoin traffic management committee din a ni a, he committee hian lirthei enkawl leh parking etc. thlengin an duang ṭhin a, amaherawhchu he committee-ah hian traffic police hotute rawtna a tlang lo fo niin a lang. A taka thawktute hian traffic enkawl dan chu an hre ber a, an rawtna fing tak takte ṭhuthmun aṭang lo hnial thlak ngawt chin fo loh pawh a ṭha khawp mai. A taka lirthei control-tute an ni tih hi committee-a awmte chuan hriatpui thei hram ṭhin se.

Tun thla aṭangin lirthei number bithliah chin siamin kawngsira lirthei zan riah pawh khawng takin an vai ṭan tawh a, hei hi media-ah pawh vawi duai lo puanchhuah a ni. MZ01F-7188 leh a hnung lam zawng garrage neia an insawi vanga registration ti thei an ni a, kawngsira an hung leh mai mai anih si chuan dan an bawhchhia tihna a ni. Chuvangin, dan ang taka khawng taka he ruahmanna hi kalpui se a ṭha ngawt ang.