Designation Plate - Kohhran leh Sorkar an inang in ti ami?

Vanglaini, June 2, 2015 Issue-a Lal Muanpuia inti thuziak - ‘Designation Plate - Kohhran leh Sorkar an inang’ tih thu-ah khan mipuiten thudik finfiah lem loin thil ni ve rengah kan ngai mai ang tih ka hlau deuh a, ka han sawifiah duh a ni.

Kohhran zingah Synod leh UPC ten an lirhtei-ah an nihna ‘Designation’ an tar a hmuh thu leh‘Baptist Kohhran pawh an bang chuang lo a, anni pawhin an pastor tu tute emaw nihna hi an lirtheiah an ziak bawk a, hengte hi eng nge a ṭulna’ tih lai kha thil hriat chian loh vang niin a lang. Synod leh UPC chungchang hi chu sawi tur ka hre ve lem lo. Baptist Kohhran chungchang kha chu thu dikhlel deuh niin a lang.

Tunah hian Bap­tist Kohhran hian an Office motor-ah tuma’n Designation hi an tar lo va, ‘Baptist Church of Mizoram’ tih hi Headquarters Office leh Aizawl/ Lawngtlai Executive Secretary Office ten an tar a, Institution ṭhenkhatin Institu­tion hming - e.g (‘HATIM’, ‘BHSS’, ‘R&D’etc.) tihte an ziak tel leh mai a. Mission Field motor-te pawhin ‘Baptist Church of Mizoram’ tih vek an tar bawk. Chutiangin, President, General Secretary leh AGS te, Director leh Motor kawl hrangho pawhin an designation ni loin, Kohhran hming - ‘Baptist Church of Mizoram’ tih an tar mai a, duh chuan finfiah theih a ni.

Media kaltlanga mipui hriata thudik zik tluak lo leh belhchian dawl lo sawi hi a ṭha loin a pawi thei em em a. A bik takin sakhua leh kohhran ang zawng te, hnam thil leh khaw hminghmerh ang phei chuan fimkhur lehzual a ṭha hle, mi tam tak, ngaihdan dik lo leh thlir dan dik loah kan hruai lut thei a ni. Synod leh UPC-te pawh hian an lirthei-ah a kawltu nihna (designation) an lo tar a nih pawhin, lansarh tumna leh intih ropui tumna lam ni loin, an administration-ah chhan pawimawh tak a nei a ni mai. Midang tan a hnawkna leh harsatna a siam pawh ka ring hran lo. Tin, rem leh rem loa sorkar leh kohhran tehkhin leh sawi zawm fote pawh hi a ṭha-in a ṭul ber lo. Inawpna (administration) hrang daih a ni e.