Harhna a lo thlen hian

Tunlai hian Zoram hmun hrang hrangah harhna a thleng nasa a, Kohhran pawh kan hlim tlang hle. Taksa chetna chang ṭhenkhat lamtual leh khawlaiah te a ṭhen an vir zak zak a, a ṭhen au-rualin hnehna an puang luih luih a, a ropui hle mai. Kan rau chante a danglamin, ṭhenkhat ten an sawisel a ni thei e; tupawh Thlarauin a pawlte chuan kan thlarau chan hi Thlarau Thianghlim, Pathian aṭanga chhuak a ni em? tih kan in zawh a, ṭawngṭaina nen tihtakmeuha kan infiah a pawimawh hle a ni.

Isua hunlai a, Pentecost nia Thlarau Thianghlim a lo thlen pawh khan ṭhenkhat chuan, "Wine thar an rui a ni" an ti hial a, an hrethiam lo takzet a ni. Pathian Thlarau Thianghlim hi ruih chi a ni lo a, khawvel mite'n an hrethiam lo fo a ni, mahni pawhin kan hriatthiam loh thlarau pawh kan chang thei a ni, chung hunah chuan ṭawngṭaina nen Pathian kan rawn tur a ni.

Tun ṭum harhna lo thleng (Kelkang harhna in a rawn hrin a ni ber ang chu) ah pawh hian zoram mipuite kan fimkhur a, kan in enfiah a ngai hle. Harhna a lo thlen hian mihlim kalsual hi an awm duh viau a, zawlnei leh thuhriltu mak danglam tak tak leh inlarna hmute an lo chhuak fo tawh ṭhin a ni. Kohhran ziding bak kalsan a, pawl din leh Kohhran aṭanga tal hran tum tlat thlarau hi zofate hian kan mamawh lo a, kohhrana kan awm mai hi kan himna ber chu a ni mai.

Kohhran leh ramah harhna a lo thlen hian Kohhran, rawngbawltu leh Pastor-te hi an pawimawh zual em em a, ṭawngṭaina nen kohhran mipuite an umzui reng a. Inkhawm leh zaikhawmna hmunah pawh an hmel a lan tam a, rorelna kawngah pawh Pathian rawn reng chunga thulai leh Kohhran mipuite ngaihdan an lak thiam a ngai hle ṭhin a ni. Pastor leh Kohhran Upate tel lo chuan kohhran a phuisui tak tak thei lo a ni. Chutiang bawkin nu leh pate pawh kan nupui leh pasal te, kan fate'n harhna thlarau an chang a nih chuan Pathian rawn chungin ṭawngṭaina nen kan vil a, Thlarau Thianghlim malsawm tlaka kan harhna leh hlimna chan hi kan chhem alh zel a pawimawh hle.

Mi ṭhenkhat, a bikin, tleirawl leh rawltharte an ṭhalai puite'n taksa chetna an lo chang a, lamtualah a bu lawp lawp an hmuhin an chan ve loh avangin piang thar ta lo riaua inngai tlat te, Pathian Thlarau Thianghlimin a pawl nep bika inngai an lo awm ni te pawhin a lang. Taksa chetna chauh hi mihringte a Pathian inpuanna leh piantharna dik ber a ni lo tih thlenga kan in zirtir te hi thil pawimawh tak a ni.

Pathian chuan talent chi hrang hrang min pe a, amah fak a lo zai tur te, awmhmuna ding a, ban lo phar tur leh kut lo beng tur te an awm a; midang chan ang chan ve tum vek kher pawh hi a Pathian thu lo zawk maithei a ni. Mi chan ang kan chan ve loh avang khan kan lo phi buai a, kan chan ve chak avanga a dera kan nung a nih chuan kan tlakna tur hremhmun mei kan tuah-alh sauh a ni thei bawk. Zai awm loin a lam tui theih loh a, khuang vawtu awm lo chuan a zai hlim theih hek loh, kan thlarau dawn ṭheuh kan lan chhuah tir a, mite tan a malsawmna tura kan aw, kan kut leh ke kan lo hman khan Pathian a ropui ang a, Kohhran nung kan lo ni mai zawk dawn a ni.

Khawtlang leh Kohhrana kan mi rin vak lohte'n taksa chetna emaw, eng rau emaw pawh an lo chang a ni thei. "Thlarau Thianghlim a ni lo, a tider a ni," lo ti hauh suh ang che. An chunga roreltu i ni lo a, an chan kha chhungrilah i hriatpui tak tak lo, thlarau lam aṭang i hria a nih pawhin i tan sawi chhuah kher kha hlawkna leh malsawmna a nih loh chuan ngawi mai la. An lo tider a nih chuan an chunga roreltuin ro a la rel sak ngei ang.

Mi rau chan hi sawisel ngawt chi a ni lo, kan ṭawngṭaipui pawh a ngaih hun a awm ngei ang. Thlarau Thianghlim chu sawi chhiat rual a ni si lo a. Lehlam kan thlir chuan kan hmelma pa hi pulpit leh kan Biakbukah hian a ngampa a, nunna chauh pe thei lo, Pathian pawh dodal ngam a nih avangin engkim deuhthaw hi a ti ve thei a ni. Keini mihringte pawh hi min zial a thei viau a ni tih pawh kan hriat a ngai.

Tun ṭum Zoram harhna lo thleng hi a bul berah chuan Kelkang aṭanga rawn irh chhuak chu a ni mauh mai. Amaherawhchu, kan tun dinhmunah hi chuan Kelkangah chauh hian harhna chang thei tura inngai kan awm lu deuh emaw ni chu aw, a tih theih awm e. Hei vang tak hian kan Kohhran hruaitu lu, Pastor-te leh Kohhran upate hian, inkhawm leh bial fan, zaikhawm thlenga ṭan kan lak a, a Kelkang kal ve thei lote leh, kal ngaihsak hauh lo leh, Pathian thu pawh ngaihsak nachang hre lote thlenga he harhna hmanga kan tlawhchhuah a, ṭan kan lak hi a hun viau awm e.