2-Wheeler taxi khalhtute hi fai rawh se

Ka vei deuh mai pakhat ka'n sawi teh ang. Chu chu, mihring phurtu taxi khalhtute ṭawp leh bâl mah mah ṭhin hi a ni.

Sawrkar leh private hnuaia hnathawkte hian an hnathawhna, ei an zawnna hmunah an neihin a tlin tawk ang zelin thawmhnaw ṭha leh zahawm pangngai, fai ṭha an ha ṭhin. Ṭawp takin an hnathawhna hmunah an kal ngai lo a, sawrkar hnaa hnuaihnung bera ngaih grade IV mite pawh ṭawp takin an kal ngai lo a, an phak tawkah thawmhnaw zahawm leh felfai tak an inbel ṭhin.

Taxi khalhtute hi tun ai hian fai se a ṭha khawp mai; taxi khalh nih vanga balh tur a ni lo. Mihring phurtu taxi khalhtute hian an hnathawhna hmun, an eizawnnaah hian thawmhnaw ṭha pangngai, felfai tak an inbel ve a ṭha a, anmahni leh an thawmhnawte chu a fai tur a ni. Hei hian zahawmna a keng tel a, kan 'class' a lantir ve tlat a nia.

Two wheeler taxi ngat phei chu an passenger-te nen taksa insi rengin an ṭhu a, an tan fai a pawimawh lehzual. Two wheeler taxi khalhtu zingah taksa bâl deuh, rimchhe deuh, ni nghur mai ṭhin an awm nualin a hriat, a zialo hle. An hnunga chuan an passenger, an taksa si renga awmte tan a hrehawm duh hle.

Two wheeler taxi khalh zingah han en maia balh hmel tak tak, lang ṭawp tak tak an tam hle; chutiang mite taksa si tura an lirthei khalha chuan a châkawm loh. Chuvangin, two wheeler taxi khalhtute hi an taksa leh thawmhnawte fai ṭha rawh se; chu chu anmahni tan leh an passenger-te tana ṭha tur a ni e.

Hawihhâwmna chungchang i'n sawi kai hram teh ang. Tun hma deuh aṭang tawhin taxi khalhtute hian mawl tih an hlawh ṭhin. Hei hian chhan tam tak a awm thei ang. A chhan lian tak pakhat nia lang chu - an hawihhawm lo ṭhin hi a ni. Mi mit tikham tur leh mi dang tana harsatna siam zawnga duhna hmun hmuna inher maite an ching ṭhin a, chu chuan 'taxi driver mâwl' nih a hlawhtir a, amah chauh ni lovin, a taxi driver-pui dang tam tak, hawihhawm tak takte a tihmingchhe tel ṭhin.

Two wheeler taxi khalhtute pawh tunah hian mâwl tih an hlawh leh mek; a chhan chu an chet ṭhin dan vang a ni. An mâwl vek lo va, an che mawi lo vek lo va, hawihhawm tak tak tam tak an awm. Mahse, mawi lo tak leh mâwlthlak taka che ṭhinte hian anmahni anga eizawngte mipui vantlang hmuhah an tihmingchhe tel ṭhin a ni.

Two wheeler khalh zingah taxi khalhtute hian lirthei dang karah rem leh rem lova inzeh zung zung an ching zual a, hei hi sim rawh se. Taxi khalhtute hian hawihhawm an zir a ngai hle. Pawl an nei a, chu an pawl chuan hawihhawm dan ṭha lehzualin inzirtir se a ṭha ngawt ang.

Lirthei khalh hi thil harsa a ni lo. A pawimawh zawk chu, lirthei kan khalh dan hian mi dang a tibuai em, mi dang tan harsatna a thlen em, ka tih dan leh chet dan hi thil mawi lo a ni em, tih a ni. Keima remchan dan ang anga che mai lovin, mi dang kan ngaichangin kan vengthawng tur a ni.

- Zoramchhana