Hunpui leh Pawltlak Thla

Tlangsâm pâr a vul a, sikri leh meihawl chuan hmun laili ber a luah a. Khua lah chu a hik sar a, puan lum pawh in tin maiin kan sin fer fur ta a. Rilru lam chuan Bethlehem a hawi ta bawk. Chu hun chu tam tak tan chuan kan hun nghahhlelh tak a ni a, âmte’n hman kan tum ṭhin. Chutiang zelin hunpui pui taka hun hmanpui tumtu keini ho hian he hun lo thleng tur hi âm tak leh fim tak siin hmang ila, nun darthlalang neitu kan nih angin kan nun hi hmang ṭangkaiin neitu rilru pu tak chungin malsawm tak siin hman kan tum dawn lawm ni tir’u?

Pâwltlâk Thla leh Krismas

Mizote chauh ni lo, India ram chauh ni lo, a khawvêl huap hian Krismas lo thleng tur kan nghakhlel ṭheuh hian a rinawm. Lal Isua Krista piancham a nih avang te, Krismas boruak hîp châk vangte leh kawng dang tam tak hian Pawltlâk Thlaa Krismas lo thleng tur hi kan phûr tlâng kum tin ṭhin a ni tir’u? Mizote leh Krismas tih phei hi chu Hrangchhuana hming lam ruala Chawngmawii rilruaa lo lang nghal zat ang maia lak hran theih miah loh ang hi a ni a, a inhne rem bik riau asin. Kan ram thlasik awm dan hi chu a dangdai a ni.

Pawltlâk Thla kan hmang ṭan ta mek a, ‘Masi’ pawh kan hnaih chho viau zel a. Hunpui boruakah hian khawi hmunah pawh mi dangte tana malsawmna nih tumin hun hmang thei ila, he kan nun darthlalang neitu kan nih ang ngeiin kan nun darthlalang tibâltu ni lovin, mi dangte pawhin malsawmna an rawn chan ngei theih nan a ṭha leh malsawm tlâka nun i tum ṭheuh ang u khai.

Charles M. Schulz chuan, “Krismas hian mi dangte tan a ṭha zawngin thil pakhat tal a keng tel tur a ni rêng a ni,” a ti. Mi dangte thil ṭha thlensak tur hian i kut lo chu kut dang a awm lo va, i thawh loh chuan tu nge thawk bik ang le? He hunpui khêl lova kan nghahah hian boruak chhe lai siamṭhatu zâwk nih tum ila, kan awmna hmun ṭheuhah Pawltlâk Thla ro tling tak leh Krismas ro tling tak, nakin huna sawi chhuah leh tlak tur kan hnutchhiah thei a nih chuan chu tluka rotling leh nun darthlalang neitu kan nihna hman chhuah dan ṭha chu a awm dawn em ni?

Pâwltlâk Thlaa pâwl tlâk

Mi chi tin maiin kum khat chhunga thleng tura kan duh ber pâwlte zinga mi Krismas thla hi hlut ila, kan hma lawka Lal Isua Krista piancham lo awm tur hi hlim leh lâwm taka hmang a, mal min sawm tura vankhuaa roreltu hre chung zelin kan rilru pawh kan siamrem theih chuan thil duhawm tak a va ni dawn em!

Khawtlang kaihruai leh enkawl turin khawtlang hruaitute an awm a, ralmuang tak leh dam taka min vên hi an hnial lo. Chutihrualin, keini lamah thu zawm tur harsa lo tak tak an rawn sawi leh ngei ang a, chutih hunah chuan khawtlang hruaitute thu ngaichang chung zelin he Krismas duhawm tak lo thleng tur hi hlim leh lawm tak siin hmuah i tum tlat ang u hmiang. Chutiang taka kan hmang tlang thei a nih chuan Pâwltlâk Thla tluka pâwl tlâk hi a lo awm lo a ni tih kan hmu thar ṭheuhin a rinawm. Engpawhnisela, a laiah Isua Krista lo tel ve zel se, Pawltlâk Thla pâwl tlâkzia a nihna tur tak a ni ngei ang. A ralmuang zawnga hun hman leh a dam zawnga hunpui hmachhawn hi i duh dan pawh a ni ve ngei hian ka ring.

Krismas leh zai

Mizote nuna bet nghet tlat mai chu zai hi a ni a, Krismas-ah mai ni lovin, kan ni tin nunah hian zai hi a bet a ni ber. Krismas a nih ngat phei hi chuan kan zai nasa deuh deuh hian a hriat; nang pawhin i ti ve tho ang. Ṭingṭang leh khuang a awm chuan Krismas hla sakte hi a nuam zual a, mei han chhem ngat ila zai pawh a tui zual. Krismas leh zai hian zûn nghet tak mai hi a nei a, Krismas hla kher lo pawh sa ila, a Krismas em em tho va, a Krismas zual sauh emaw tih tur a ni. Ṭum khat, ‘Min tuahrem thuai se chûn leh zuate’n…’ tih hla ṭingṭang leh khuang nen chiah lenrualte nen kan sa a, Krismas lai mah ni se, Krismas hla ai khan kan sa tui mah zawk a, a zahthlak lek lek. Hei hian Krismas leh zai inzawmna thûkzia a tilang chiang awm e.

‘Sikpui leh sûlhnu’ tih Pu Lalhruaitluanga Chawngte ziak, a bu kawm hnungah khan a ziaktu ngeiin, “Kan Krismas hlate hi Zo fa tawh phawt chuan kan thiam vek zel a, chutiang hla, khuang khat hla pawh, khuang hnih hla pawh, chhim leh hmar, chhak leh thlanga Zo fa tawh phawtina kan sak thiam hla hi eng zat nge kan neih ang aw?” a lo ti hial a; a thusawi hi pawmawm ka ti viau mai. Hei hian Krimas leh zai inkungkaihna thûkzia leh Mizote hi zai ngaina hnam kan nihzia a tilang a tih theih ang. Kumin Krismas pawh suihlung rualin hlim zai i vâwr leh suau suau mai ang aw. Chu aia hlu leh nuam a awm chuang si lo va.

Hunpui lam biahthu hi kan ziak seng lo va, a hlutna te, a ropuinate leh ngaihawmna chen hian kan thaikawi seng lo va; he thupui hi ziak thiam tak nih pawh a chakawm hle mai. Chutihrualin, kawng khat tala lo hlâwk kan awm chuan chu tluka lawmawm chu a awm thei lo vang.

- Vanlalbuatsaiha Pachuau