Party worker tam tak hi ram hmelma an ni

Tun hnaiah social media - a bikin Facebook leh Whatsapp-ah Lunglei Municipal Council Board of Councillors (BOC) meeting leh an rorel chungchang Zonet JB, Lunglei TV-in chanchin thara an puan video a darh a. Misual thil tih a ni a, a zialo hle.

Zonet JB-in chanchin thara an puan video an thehdarh chu second 11 emaw lek a ni a, chu chu "LMC BoC chu vawiin khan an ṭhukhawm a, Krismas-ah khawlai leh kawn chei loh ni se an ti a, Krismas bazar buatsaih loh ni se an ti bawk," tih a ni.

Social media-a thehdarh video hi news lead (headline an tih ang chi hi) chauh a ni a, a thu kimchang chu a hnuah an puang zui a ni. News lead hnua a kimchang zawk an puanah chuan, kumin 2024-ah chuan hun a teptêr tawh avangin kâwn chei chungchangah LMC anga hmalak loh an rel mai zawk a ni tih a chiang. Lungleia veng ten anmahni thua local council emaw, YMA emaw hmalaknaa an chei khap thu leh phal loh thu a awm lo. LMC hian Lungleia vengte'n an remchan dan ang leh anmahni sensoa an veng an chei thei a nih chuan an welcome em em zawk a ni.

Krismas bazar siam loh chungchangah pawh, Lunglei khawpuiah Krismas bazar a awm dawn lo tihna a ni lo. A hma daihin LMC leh Lungleia sawrkar department hrang hrangte leh local council ten an hranpaa Krismas bazar siam loh an lo rel tawh chu an nemnghet mai a ni. Tuna dawr leh bazar awm sa Krismas puala thil zawrh hrang hrangte tihtawp an tum tihna a ni lo.

Zonet JB news puan video tawite, second 11 emaw lek cut a, social media-a thehdarhtu hian LMC leh LMC-a sawrkar mek ZPM party tihmualpho a tum vang liau liau a ni. News-a puangtu Zonet JB pawh a timualpho tel bawk. Mipui rilru hruai sual tumna a ni a, mipui hnena dâwt hrilhna a ni. A sualthlak a, a mâwlthlak bawk.

Mizorama politician inti te, party worker tam takte politics khelh duh dan hi chu a tenawm ngawih ngawih. Thu tluantling thehdarh duh si lova video tawite, khingpuite party tihmualphona theihna lai chauh la chhuaka thehdarh hi kan ram leh mipui tan hian a ṭha lo tak zet a ni.

Political party worker tam tak hi ram hmangaihtu an ni lo va, thil an tih duh dan leh an chet duh dan en hian ram hmelma an ni zawk. Kan sawi fo leh kan chhuan em em Mizo nun mawi tichhetu an ni bawk. Chuvangin, politics aṭangin inthiar fihlim se, an phak tâwk hna (mi hnuaia inhlawhfak a ni mai thei) thawk se, Mizoram hian a ṭhat phah zawk ang.

Mipui pawhin party worker-te chet duh dan tenawmzia hi hria ila, thu dik leh dik lo thliar thiam tur leh hre turin inngaithla zauin i inchhiar zau ve ang u.

- KL Thlengliana