Opposition-te politik khelh dan tenawm lutuk hi!

Kan ram hi Kristian kan nihna ang zawna thlir chuan kan engkim hi ring lo mite khawsak dan leh mizia ai chuan a thianghlim zawk a, a felfai zawk tura ngaih theih a ni. Mahse, ring lo mite ai pawhin kan politik khelh duh dan hi a ṭawp zawk a, a level a hniam êm êm reng a nih hi. Mahni bial zîm têa ṭawngkam kan thlahdah a nih chuan, a âwm vena lai a awm thei. Mahse, Zoram mipui hriat tura dâwt chiang bal tih hriat chhuah leh ngei tur ang, politik hmanraw bawlhhlawh leh tenawm kan hmang duh zel hian, eng ang ringtu nge kan nih a lantir lo thei lo.

Hman ni lawkah buhfai sem chungchang hmanga sawrkar beihna thu mi pakhatin huai takin a rawn post a nih kha. A thu post han chhiar mai chuan Supply Minister nih kha thil zahthlak tàwp ni theiin a lang. Mahse, tuibûr hmuam dâk pawh tling lo turah, dâwt chiang bal hmanga inpuh hmingchhiat tumna mai a nihzia kan hre leh thuai si! Tun hnaiah tho mi pakhat chuan minister pathum bânna thehluh chungchang thu a rawn post leh a. Hei pawh thu belhchian dâwl lo tih hriat nghal a ni bawk. Mipui rilru tihchiai tumna hmanraw tenawm tak a ni.

Chutih mek laiin tun hnaiah Congress Vice President Pu Lalnunmawia'n sawrkar thar hnuaia dan anga contract chhan theih dan hniam zawng leh san zawng fiah taka rawn tarlang a, sawrkar hmalak dan dik lo a rawn post angte kha a changkangin a bengvarthlak hle thung a nih kha. Party tinin Media Dept lama sûlsu tura mi an dah, a bikin vantlâng puipunna hmun (social media) lama thâwm nei tura an dahte hi, an thu post duh dan han enin tlema fuih pawrh theih deuh roh, mahni tih duh loh ti tura bawngpa chhawr theih ang mi an ni ṭhin hi a fuh lo a ni.

Tun hma khan a hluar zual a. Mi sawi ngam loh leh sawi duh loh ṭha zawng zawng, a dik a dawk thlu lova ruling beihna tur a nih phawt chuan eng hmanrua pawh chelek duh ang kha an tam êm êm a. Kan politik khelmual ṭawpzia kha sawiin a siak lo a ni ber. Ram hmangaihtu mi pangngai tana han tei luhte kha a ngamawm loh. Mi pangngai tan chuan lo inthiar fihlim mai a thlanawm ta ṭhin a nih kha. Mipui lam pawh kan dik bik chuang hauh lo bawk. Heng thu dukdaklo leh ṭawphnawk hnualsuat ahnêka Pathianni zing sermon ang maia lo ngai thutak tâwk kan awm zel a nih hi.

Politik khawvela kan chîm chin hi a changkang mawh hle mai. Mi tam tak chuan kan politik khawvel hi duh duh sawi theihna hmun, thu dik aia thu thinṭhâwng leh mi bengverh tur dah sanna, dâwt muhlûm hmanga mi hmaia chirhthehna hmun emaw an la ti fan a. Mipuite beng tivar zawng leh an hriatna tipung tur leh finvarna pe tura thil chhui peih leh chîk peih nih kan tum em em ngai tlat lo. Pu Lalnunmawia'n tender chhanna tura rate bithliah (fix) hi dan kalh a nihzia, induhsakna hmanruaa chang thei a nih dan a rawn tarlante ang hi tam leh zual zawk hmu thei ila, mipui pawh kan bengvar phah tulh tulh ngei ang.

Opposition lamin ruling kan beih dan te, ruling lamin chhanna an pêk dan aṭang hian kan nihna a lang ṭhin a. Chu chu mipui vengva tak takte'n ngun takin an lo thlithlai ve reng a ni tihte hi hre renga kan fimkhur a hun tawh ngei mai. Tun hnaia inhnialna tam tak paw chhuaktu VC ṭhiah chungchangahte hian, danin engtin nge a sawi, VC ṭhiah hi dan kalh a ni rêng em, etc tih lam hawi thu ziak hmuh aiin, inchirhthehna lam ngawt chhiar tur kan han hmute hi mipui tan chuan a bengvarthlak viau loh a nih hi.

Mahni hmelma ngawih ngawihte chunga kan tih duh tur ang hi politika kan pâwl lo lam beih nan kan hmang hreh hauh lote hi sim a hun ta. Chutih rual vekin, ruling lam pawhin opposition thlan tlin an ni lo a, mipui thlan tlin an ni tih an inhriat reng a, an hmalakna chungchang sawifiahna an neih reng rengin mipui lamin kan hriat thiam theih ngei turin, opposition lam ngawt ni lo, Zoram mipui zawkte dah pawimawh an uar sauh sauh a hun ta bawk. Mipuite lakah zawk mawhphurhna an nei tih an inhriat a, min ngaihsak hi an tih ngei ngei tur a ni si a.

Kan politik khelh dan ṭawphnawk lutuk tihziaawm nan hma la pâwl an awm ngei pawh a ngai ta niin a lang. Hetianga dâwt chiang bala intihhmingchhiat tumna reng reng hi chu thuneitute hnenah thlen ni ta zel se. Hrem tuar awm zel se la, a ziaawm maiin a rinawm. A nih loh zawngin, opposition lam hian eng hmanrua pawh, direct taka Setana hnen aṭanga an dawn pawh ni se, ruling beih nan an hmang duh zel dawn a nih hi! Chu chu Kristian rama thleng atan chuan a mawi lovin a zahpuiawm hle si a.

- Lalremliana Pachuau