Overbridge-ah i kal hram hram ang u
Khi thupui hmang khian kum 7 vel kal taah khan ka lo ziak tawh. Chutah chuan, “Kei pawh cervic spine chhe tawh, hmun sang leh hmâwra awm thei lo, luhai zel ka ni chungin, a sîr vuanin ka kal hram hram ṭhin,” ka ti nghe nghe. Tun thleng hian Bungkawna mi-ah saw chuan ka la kal deuh ziah. Buai taka kawng kân tumte hi ka en ru deuh ṭhin a, ka kalna lama kal tum ve thote leh overbridge aṭanga an kal tumna pawh ve thei thote an ni ṭhin.
Kawng pêngṭhuam kânna tur awm se tiin mipui kan phun ṭhin a, sawrkarin hmun ṭhenkhatah min siamsak ta chêng a, overbridge-a kal hreh tlat, kal duh lo tlat kan tam em em lei lawi si! Overbridge awm rengna hmunah pawh hlau chung chung leh rem leh rem lovin, phili deuha motor tlan lai leh traffic police tibuai zawnga kawng kân tum kan la tam em em a ni. Hetia kawng kan kân chhunga motor kan tihdin hian motor inzui tlan tluang lai, traffic flow kan tibuai a, chu chuan thui tak nghawng a nei a, thil pawi tak pawh a thleng thei a ni.
Chuvangin, overbridge awmnaah chuan keimahni leh mi dang him nan leh driver leh police tibuai lo zawngin overbridge-ah i kal hram hram ang u. Kan kal tumna kâwk lo deuh pawh ni se, lêt leh hret pawh inhuamin, kan ṭhat tlanna turah chuan khua leh tui ṭha nih i hreh lo ang u. Overbridge kal hreh vang hian tawhsual pawi zawk kan tâwk thei reng bawk.
Sawrkar hian kawng chhâwng min siam thei lo a nih pawhin, pedestrian overbridge tal hi heng hmun hrang hrangah hian min siamsak turin tun sawrkar, ZPM sawrkar hi tlangnêl tak leh ngênngâwl takin ka phut a ni.
Pawimawh em em–Bawngkawn pêngṭhuam pahnihah, Chaltlang Dawrkawnah, Chandmari kâwn leh HBC pengah, Zarkawtah, Israel point-ah, Thâna pêng leh Civil Hospital pêngah, Temple Square-ah, Raj Bhavan north gate leh south gate bulah, Sikulpuikawnah, Mission Veng Biak In bulah, Mission Veng Bazarah, Kulikawnah.
Tuna Bazar Bungkawna mi hi Saron Veng lam panna siam belh ni se; Treasury Square pêngṭhuam chhak leh thlang hi inzawm veka siam ni bawk se. Khing hmunte khi mipui hlauthâwng tak leh mangang philia kan awmna hmun a ni.
Overbridge siam hian ṭhatna tam tak a nei. Design nalh tak leh uluk taka siam chuan khawpui timawitu a ni a; miin hahchawlh nan te, phone khawih nante leh meizûk nante an hmang ṭhin.
Nakinah siam a la ṭul dawn tho tho. Khawpui khawsak phung a tâwt lehzual hma leh, siam a buaithlak hma, tuna siam a la awlsam deuh lai hian ZPM sawrkar hian in sawrkar thil tih hriat reng nan leh hming chher nan, in landmark pakhat atan han siam vek teh u. Mipui harsatna leh mangangna aṭanga thlamuanna leh awlsamna siamsak chu sawrkar awm chhan a ni si a.
- K Hmingthankaia